ಚನ್ನಗಿರಿ: ಎಲ್ಲೆಡೆ ಸ್ವರ್ಣಗೌರಿ ಹಬ್ಬ ವ್ರತಾಚರಣೆ

ಚನ್ನಗಿರಿ: ಸ್ವರ್ಣಗೌರಿ ಹಬ್ಬವನ್ನು ಪಟ್ಟಣ ಸೇರಿದಂತೆ ತಾಲ್ಲೂಕಿನ ಎಲ್ಲೆಡೆ ಶ್ರಧ್ಧಾ, ಭಕ್ತಿಯಿಂದ ಆಚರಿಸಲಾಯಿತು. 

ಪ್ರತಿ ವರ್ಷ ಭಾದ್ರಪದ ಮಾಸದ ಆರಂಭದೊಂದಿಗೆ ಗೌರಿಹಬ್ಬ ಅಡಿಯಿಡುತ್ತದೆ. ಈ ಅವಧಿಯಲ್ಲಿ ಸುರಿಯುವ ಮಳೆಯಿಂದಾಗಿ ನೆಲ ಬಸಿರಾಗಿ ಹಸಿರು ಚಿರುಗುರುತ್ತದೆ. ಗೌರಿಯು ಪ್ರಕೃತಿಮಾತೆಯ ಸಂಕೇತವಾಗಿದ್ದು, ಗೌರಿಗೆ ಹಸಿರು ಸೀರೆ, ಬಳೆಗಳನ್ನು ತೊಡಿಸಿ ಹಬ್ಬ ಆಚರಿಸಲಾಗುತ್ತದೆ. 

ಅರಿಸಿನದಿಂದ ತಯಾರಿಸಿದ ಗೌರಿ ವಿಗ್ರಹವನ್ನು ಪ್ರತಿಷ್ಠಾಪಿಸಿ, ಗೆಜ್ಜೆ, ವಸ್ತ್ರಗಳಿಂದ ಅಲಂಕರಿಸಲಾಗುತ್ತದೆ. ಮಹಿಳೆಯರು ಉಪವಾಸದಲ್ಲಿ ವ್ರತಾಚರಣೆ ಆರಂಭಿಸುತ್ತಾರೆ. ಹದಿನಾರು ಸುತ್ತಿನ ದಾರವನ್ನು ಪೂಜಿಸಿ, ದೇವಿಗೌರಿಯ ಆಶೀರ್ವಾದ ಎಂಬ ನಂಬಿಕೆಯಿಂದ ಕೈಗಳಿಗೆ ಕಟ್ಟಿಕೊಳ್ಳುತ್ತಾರೆ. ಹೋಳಿಗೆ, ಪಾಯಸ, ಕೋಸುಂಬರಿ ಸೇರಿದಂತೆ ಬಗೆ ಬಗೆಯ ಖಾದ್ಯಗಳನ್ನು ದೇವಿಗೆ ನೈವೇದ್ಯ ಮಾಡಿ ಮಹಿಳೆಯರಿಗೆ ಬಾಗಿನ ನೀಡಲಾಗುತ್ತದೆ.