ಗಾಮನಗಟ್ಟಿ ಕೈಗಾರಿಕಾ ಪ್ರದೇಶದ ಸುತ್ತ ಚಿರತೆ ಚಲನವಲನ ಕ್ಯಾಮೆರಾದಲ್ಲಿ ಸೆರೆ

ಹುಬ್ಬಳ್ಳಿ: ಸಮೀಪದ ಗಾಮನಗಟ್ಟಿ ಕೈಗಾರಿಕಾ ಪ್ರದೇಶ ಹಾಗೂ ವಿಮಾನ ನಿಲ್ದಾಣದ ಸುತ್ತಮುತ್ತಲಿನ ಪ್ರದೇಶದಲ್ಲಿ ಕಾಣಿಸಿಕೊಂಡು ಆತಂಕ ಸೃಷ್ಟಿಸಿರುವ ಚಿರತೆಯ ಚಲನವಲನಗಳು, ಶುಕ್ರವಾರ ಮತ್ತು ಶನಿವಾರ ಕ್ಯಾಮೆರಾ ಟ್ರ್ಯಾಪ್‌ನಲ್ಲಿ ಸೆರೆಯಾಗಿವೆ.

ಚಿರತೆ ಸೆರೆಗೆ ಅರಣ್ಯ ಇಲಾಖೆ ಅಧಿಕಾರಿಗಳು ಪ್ರತ್ಯೇಕ ಕಡೆ ನಾಯಿಗಳ ಸಮೇತ ಎರಡು ಬೋನು, ವಿಮಾನ ನಿಲ್ದಾಣ ಮತ್ತು ಗಾಮನಗಟ್ಟಿ ಹೊರವಲಯದಲ್ಲಿ ಕ್ಯಾಮೆರಾ ಟ್ರ್ಯಾಪ್‌ಗಳನ್ನು ಅಳವಡಿಸಿದ್ದಾರೆ.

ಚಿರತೆಯು ಶುಕ್ರವಾರ ಸಂಜೆ 6.40ಕ್ಕೆ ವಿಮಾನ ನಿಲ್ದಾಣದ ಕಾಂಪೌಂಡ್‌ನಿಂದ ಹೊರಗೆ ಜಿಗಿದು, ಶನಿವಾರ ಬೆಳಗಿನ ಜಾವ  ಗಾಮನಗಟ್ಟಿ ಕಡೆಯಿಂದ ಪುನಃ ವಿಮಾನ ನಿಲ್ದಾಣದ ಆವರಣದ ಒಳಗೆ ಹೋಗಿರುವ ದೃಶ್ಯಗಳು ಟ್ರ್ಯಾಪ್‌ಗಳಲ್ಲಿ
ದಾಖಲಾಗಿವೆ.

‘ಚಿರತೆ ಓಡಾಡುವ ಮಾರ್ಗದಲ್ಲೇ ಎರಡೂ ಬೋನುಗಳನ್ನು ಇಟ್ಟಿದ್ದರೂ, ಅದು ಬೋನಿಗೆ ಬಿದ್ದಿಲ್ಲ. ಗಾಮನಗಟ್ಟಿ ಹೊರವಲಯದಲ್ಲಿ  ಹಂದಿ, ಮೊಲ, ನವಿಲು, ನಾಯಿಗಳು ಹೆಚ್ಚಿನ ಸಂಖ್ಯೆಯಲ್ಲಿವೆ. ಬೋನಿನಲ್ಲಿನ ನಾಯಿ ತಿನ್ನಲು ಚಿರತೆ ಬಂದಿಲ್ಲ’ ಎಂದು ಅರಣ್ಯ ಇಲಾಖೆ ಅಧಿಕಾರಿಗಳು
ತಿಳಿಸಿದರು.