ಧಾರವಾಡ| ಸತ್ಯಶೋಧನೆ ಗುಣ ಹೊಂದಿದ್ದ ಕಲಬುರ್ಗಿ: ಹಂ.ಪ.ನಾಗರಾಜಯ್ಯ

ಧಾರವಾಡ: ‘ಕನ್ನಡ ಸಾಹಿತ್ಯದ ಮಹತ್ವದ ಕೃತಿಶ್ರೇಣಿಗಳಲ್ಲಿ ಸಂಶೋಧಕ ಎಂ.ಎಂ. ಕಲಬುರ್ಗಿ ಅವರ ಸಮಗ್ರ ಸಾಹಿತ್ಯದ 40 ಸಂಪುಟಗಳು ಅಗ್ರಗಣ್ಯವಾಗಿವೆ. ಇವುಗಳು ಸಾಹಿತ್ಯದ ನುಡಿಯ ಮಾಣಿಕ್ಯ ಇದ್ದಂತೆ’ ಎಂದು ಸಾಹಿತಿ ಹಂ.ಪ.ನಾಗರಾಜಯ್ಯ ಅಭಿಪ್ರಾಯಪಟ್ಟರು.

ನಗರದ ಎಂ.ಎಂ. ಕಲಬುರ್ಗಿ ಪ್ರತಿಷ್ಠಾನ ವತಿಯಿಂದ ಎಂ.ಎಂ.ಕಲಬುರ್ಗಿ ಅವರ 87ನೇ ಜನ್ಮದಿನದ ಪ್ರಯುಕ್ತ ಆಲೂರು ವೆಂಕಟರಾವ್ ಭವನದಲ್ಲಿ ಶುಕ್ರವಾರ ನಡೆದ ರಾಷ್ಟ್ರೀಯ ಪ್ರಶಸ್ತಿ ಪ್ರದಾನ ಹಾಗೂ ಕಲಬುರ್ಗಿ ಅವರ ಸಮಗ್ರ ಸಾಹಿತ್ಯ 40 ಸಂಪುಟಗಳ ಮರು ಬಿಡುಗಡೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

‘ಕಲಬುರ್ಗಿ ಅವರು ಸಹೃದಯತೆ, ಅಧ್ಯಯನಶೀಲತೆಯ ಅಪೂರ್ವ ವ್ಯಕ್ತಿತ್ವವುಳ್ಳವಾರಾಗಿದ್ದರು. ಕೇವಲ ಸಂಶೋಧನೆ ಅಲ್ಲ, ಕಾವ್ಯದ ಒಳನೋಟದ ಅಂತರಂಗ ಪ್ರವೇಶಿಸಿ, ಸತ್ಯಶೋಧನೆ ಮಾಡುವ ಗುಣ ಹೊಂದಿದ್ದರು’ ಎಂದರು.

‘ಹಳ್ಳಗನ್ನಡ ಸಾಹಿತ್ಯದಲ್ಲಿ ವಿಶೇಷವಾಗಿ ಕವಿಗಳು ಮಾರ್ಗ ಮತ್ತು ದೇಸಿ, ವರ್ಣಕ ಮತ್ತು ವಸ್ತು ಕಾವ್ಯ, ಆಗಮ ಇವುಗಳ ನೆಲೆಯಲ್ಲಿ ರೂಪಗೊಂಡಿರುವ ವಿಶ್ಲೇಷಿಸಿ ಆಧುನಿಕ ಕಾಲದ ಓದುಗರಿಗೆ ತಲುಪಿಸುವಲ್ಲಿ ಕಲಬುರ್ಗಿ ಅವರು ಮಾಡಿದ ಕಾರ್ಯ ಶ್ಲಾಘನೀಯ’ ಎಂದು ಹೇಳಿದರು.

‘ಯಾವುದೇ ಕೃತಿಯಾಗಲಿ ಅದನ್ನು ಆಳವಾಗಿ ಅಧ್ಯಯನ ಮಾಡಿ ಅದರ ಜಾತಕ ತೆಗೆದು, ತಪ್ಪಿದ್ದರೆ ತಪ್ಪಿದೆ ಎಂದು ನೇರವಾಗಿ ಹೇಳುವ ಸ್ವಭಾವ ಅವರಲ್ಲಿತ್ತು. ಕಲಬುರ್ಗಿ ಅವರ ಪ್ರಶಸ್ತಿಗೆ ಬಹಳ ಮಹತ್ವದ ಸ್ಥಾನವಿದೆ’ ಎಂದರು.

ಟ್ರಸ್ಟ್ ಸದಸ್ಯ ಬಾಳಣ್ಣ ಶೀಗಿಹಳ್ಳಿ ಮಾತನಾಡಿ, ‘ಕಲಬುರ್ಗಿ ಅವರು ಮೇರು ಸದೃಶ ವ್ಯಕ್ತಿಯಾಗಿದ್ದರು. ನಾಟಕ, ಜನಪದ ಹಾಗೂ ಸಂಪಾದನೆಯಲ್ಲಿ ಸಂಶೋಧನೆ ಕೈಗೊಂಡು ಸಾಹಿತ್ಯ ಸಂಪತ್ತು ಒದಗಿಸಿದ್ದಾರೆ’ ಎಂದು ಹೇಳಿದರು.

‘ಯುವಜನರಲ್ಲಿ ಸಾಹಿತ್ಯ ಸಂಶೋಧನೆಯಲ್ಲಿ ಉಪೇಕ್ಷ ಮನೋಭಾವವಿದೆ. ಇದನ್ನು ಹೋಗಲಾಡಿಸಬೇಕು. ಇಂದಿನ ಯುವಜನರಿಗೆ ಪೂರಕವಾದ ಲೇಖನಗಳನ್ನು ಕಲಬುರ್ಗಿ ಅವರು ಬರೆದಿದ್ದಾರೆ. ಅವರ ಸಂಶೋಧನಾ ಲೇಖನಗಳನ್ನು ಎಲ್ಲರೂ ಓದಿ ಸಾಧನೆ ಮಾಡಬೇಕು’ ಎಂದು ಸಲಹೆ ನೀಡಿದರು.

ಎಂ.ಎಂ. ಕಲಬುರ್ಗಿ ಪ್ರತಿಷ್ಠಾನ ಅಧ್ಯಕ್ಷ ವೀರಣ್ಣ ರಾಜೂರ ಅಧ್ಯಕ್ಷತೆ ವಹಿಸಿದ್ದರು.
ಬಸವರಾಜ ಜಗಜಂಪಿ, ಉಮಾದೇವಿ ಕಲಬುರ್ಗಿ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯ ನಿರ್ದೇಶಕ ಕುಮಾರ ಬೆಕ್ಕೇರಿ, ಟ್ರಸ್ಟ್ ಸದಸ್ಯ ಶಶಿಧರ ತೋಡಕರ ಇದ್ದರು.