ಪಿಯುಸಿ ಫಲಿತಾಂಶ |ಹುಬ್ಬಳ್ಳಿ: ಸರ್ಕಾರಿ ಕಾಲೇಜಿನ ನಾಗವೇಣಿ ರಾಜ್ಯಕ್ಕೆ 5ನೇ ಸ್ಥಾನ

ಹುಬ್ಬಳ್ಳಿ: ಕಡುಬಡತನ ಕುಟುಂಬದ ಹಿನ್ನೆಲೆಯುಳ್ಳ‌‌‌‌‌ ನಾಗವೇಣಿ ರಾಯಚೂರು ಇಲ್ಲಿ ಗೋಪನಕೊಪ್ಪದ ಸರ್ಕಾರಿ ಪಿಯು ಕಾಲೇಜಿನಲ್ಲಿ ಓದಿ ದ್ವಿತೀಯ ಪಿಯು ಪರೀಕ್ಷೆಯಲ್ಲಿ 593 ಅಂಕ ಗಳಿಸಿ, ರಾಜ್ಯಕ್ಕೆ 6ನೇ ರ‍್ಯಾಂಕ್‌ ಪಡೆದಿದ್ದಾರೆ.

ಅಂಗವಿಕಲರಾದ ತಂದೆ ಅಂಥೋಣಿ ಕೂಲಿಗೆಲಸ ಮಾಡುತ್ತಾರೆ. ಅವರ ತಾಯಿ ಮನೆಗಳಿಗೆ ತೆರಳಿ ಪಾತ್ರೆ ತೊಳೆಯುವ ಕೆಲಸ ಮಾಡುತ್ತಾರೆ. ನಾಗವೇಣಿಯವರು ಸರ್ಕಾರಿ ಶಾಲೆ ಮತ್ತು ಕಾಲೇಜಿನಲ್ಲೇ ಓದಿರುವುದು ವಿಶೇಷ.

‘ರಾಜ್ಯಕ್ಕೆ ರ‍್ಯಾಂಕ್‌ ಬಂದಿರುವುದು ಖುಷಿ ತಂದಿದೆ. ನನ್ನ ಯಶಸ್ಸಿನಲ್ಲಿ ಕಾಲೇಜು ಪ್ರಾಧ್ಯಾಪಕರದ್ದು ಪ್ರಮುಖ ಪಾತ್ರವಿದೆ. ಬಡತನದ ಮಧ್ಯೆಯೂ ತಂದೆ ಮತ್ತು ತಾಯಿಯವರು ಅಕ್ಕ ಮತ್ತು ನನ್ನನ್ನು ಚೆನ್ನಾಗಿ ಓದಿಸಿದರು. ಸರ್ಕಾರಿ ಶಾಲೆ ಮತ್ತು ಕಾಲೇಜಿನಲ್ಲಿ ಓದಿಯೇ ಸಾಧನೆ ಮಾಡಿದ್ದು, ಖುಷಿ ತಂದಿದೆ’ ಎಂದು ನಾಗವೇಣಿ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಮುಂದಿನ ಶಿಕ್ಷಣವನ್ನು ಸರ್ಕಾರಿ ಕಾಲೇಜಿನಲ್ಲೇ ಮುಂದುವರಿಸುವೆ. ಸ್ಪರ್ಧಾತ್ಮಕ ಪರೀಕ್ಷೆಗಳಿಗೂ ಸಿದ್ಧತೆ ಮಾಡಿಕೊಳ್ಳುವೆ. ಸರ್ಕಾರಿ ಅಧಿಕಾರಿ ಆಗಬೇಕು ಎಂಬ ಕನಸಿದೆ’ ಎಂದರು.