ಅಳ್ನಾವರ: ಆಮೆಗತಿ ಕಾಮಗಾರಿಗೆ ಸವಾರರು ಹೈರಾಣು!

ಅಳ್ನಾವರ: ಪಟ್ಟಣದ ಮಧ್ಯೆ ಭಾಗದಲ್ಲಿ ಹಾಯ್ದು ಹೋಗಿರುವ ಬೆಳಗಾವಿ- ತಾಳಗುಪ್ಪಾ ರಾಷ್ಟ್ರೀಯ ಹೆದ್ದಾರಿಯನ್ನು ಕಾಂಕ್ರೀಟ್ ಮಾಡುವ ಸಲುವಾಗಿ ವಿವಿಧೆಡೆ ರಸ್ತೆ ಅಗೆಯಲಾಗಿದೆ. ಮಳೆ ಆರಂಭವಾಗಿರುವುದರಿಂದ ಕಾಮಗಾರಿ ಅರ್ಧಕ್ಕೆ  ನಿಂತಿದೆ. ಇದರಿಂದಾಗಿ ರಸ್ತೆ ಕೆಸರುಮಯವಾಗಿದೆ. ಇದರಲ್ಲಿ ಸಂಚರಿಸಲಾಗದೆ ವಾಹನಗಳು ಸಿಕ್ಕಿಬೀಳುತ್ತಿದ್ದು, ವಾಹನ ಸವಾರರು ಹೈರಾಣಾಗಿದ್ದಾರೆ.

ರಸ್ತೆಗೆ ಕಾಂಕ್ರೀಟ್ ಮಾಡುವ ಕಾಮಗಾರಿ ಆರಂಭವಾಗಿ ತಿಂಗಳು ಗತಿಸಿದೆ. ವಿದ್ಯಾನಗರ ಬಡಾವಣೆಯ ಹತ್ತಿರದ ರಸ್ತೆಯನ್ನು ಕಾಂಕ್ರೀಟ್ ಮಾಡಲು ಅಗೆಯಲಾಗಿದೆ. ಈಗ ಬಿಟ್ಟು ಬಿಡದೆ ಮಳೆ ಸುರಿಯತೊಡಗಿದೆ. ಹದಿನೈದಕ್ಕೂ ಹೆಚ್ಚು ದಿನ ಗತಿಸಿದ್ದು, ಕಾಂಕ್ರೀಟ್ ಹಾಕುವ ಕೆಲಸ ಅರ್ಧಕ್ಕೆ ನಿಂತಿದೆ.

ಮಳೆಯಿಂದಾಗಿ ರಸ್ತೆ ನಡುವೆ ದೊಡ್ಡ ಕಂದಕಗಳು, ಹೊಂಡಗಳು ನಿರ್ಮಾಣ ಆಗಿವೆ. ಕೆಸರುಮಯ ರಸ್ತೆಯಲ್ಲಿ ಸಾಗುವ ಭಾರಿ ವಾಹನಗಳು ಸಿಕ್ಕು ಬಿದ್ದು, ಜೆಸಿಬಿ ಯಂತ್ರ ಬಳಿಸಿ ಲಾರಿಗಳನ್ನು ಎತ್ತಲಾಗುತ್ತಿದೆ. ಕಳೆದ ಒಂದು ವಾರದಲ್ಲಿ ಹಲವಾರು ವಾಹನಗಳು ಕೆಸರಿನಲ್ಲಿ ಸಿಲುಕಿದ್ದವು. ದ್ವಿಚಕ್ರ ವಾಹನ ಸವಾರರು ಬಿದ್ದು ಏಟು ತಿಂದ ಘಟನೆ ನಿತ್ಯ ಘಟಿಸುತ್ತಿವೆ. ಕೆಸರು ತುಂಬಿದ ರಸ್ತೆಯಲ್ಲಿ ವಾಹನ ಸವಾರರು ಮಾಡುವ ಸರ್ಕಸ್ ದಿನನಿತ್ಯ ಕಾಣಬಹುದಾಗಿದೆ. 

ರೈಲ್ವೆ ಸೇತುವೆ ಕೆಳಗೆ ಹಾಗೂ ಸಾಲು ಮರದ ತಿಮ್ಮಕ್ಕ ಉದ್ಯಾನವನ ಹತ್ತಿರ ರಸ್ತೆಯ ಒಂದು ಬದಿಯಲ್ಲಿ ಮಾತ್ರ ಕಾಂಕ್ರೀಟ್ ಹಾಕಿ, ಇನ್ನೊಂದು ಬದಿ ಸಂಚಾರಕ್ಕೆ ಬಿಡಲಾಗಿದೆ. ಇದರಿಂದ ವಾಹನ ಸವಾರರು ಸರಿಯಾಗಿ ದಾಟಲು ಆಗದೆ ಹರ ಸಾಹಸ ಪಡುತ್ತಿದ್ದಾರೆ.

ಗುಡ್ಡ ಕುಸಿತ ಉಂಟಾಗಿ ಗೋವಾ ರಾಜ್ಯಕ್ಕೆ ಹೋಗುವ ಅನಮೋಡ ರಸ್ತೆ ಬಂದ್‌ ಆಗಿದೆ. ಸರಕು ತುಂಬಿದ ಲಾರಿಗಳು ಅಳ್ನಾವರ ಮಾರ್ಗವಾಗಿ ಕಾರವಾರ ಮೂಲಕ ಗೋವಾ ತಲುಪಲು ಇದೇ ರಸ್ತೆ ಅವಲಂಬಿಸಿವೆ. ತಕ್ಷಣವೆ ಕಾಮಗಾರಿ ಆರಂಭಿಸುವಂತೆ ವಾಹನ ಸವಾರರು, ಸಾರ್ವಜನಿಕರು ಒತ್ತಾಯಿಸಿದ್ದಾರೆ.