ಸುರಕೋಡ: 15 ಕುರಿಮರಿ ಕೊಂದ ತೋಳದ ಹಿಂಡು

ನರಗುಂದ: ತಾಲ್ಲೂಕಿನ ಸುರಕೋಡ ಗ್ರಾಮದ ಕಲ್ಲಪ್ಪ ಹನಮಂತಪ್ಪ ಮಜ್ಜಗಿ ಅವರು ಜಮೀನಿನಲ್ಲಿ ಹಾಕಿದ್ದ ಕುರಿ ದೊಡ್ಡಿಗೆ ತೋಳದ ಹಿಂಡು ನುಗ್ಗಿ 15 ಕುರಿ ಮರಿಗಳನ್ನು ಕೊಂದು ಹಾಕಿದ ಘಟನೆ ಗುರುವಾರ ನಡೆದಿದೆ.

ಕಲ್ಲಪ್ಪ ಮಜ್ಜಗಿ ಅವರು ನೂರು ಮೇಕೆ ಹಾಗೂ ಕುರಿಗಳನ್ನು ಸಾಕಿದ್ದು, ಈಚೆಗೆ 19 ಕುರಿಮರಿಗಳು ಜನಿಸಿದ್ದವು. ಅವರು ಅವುಗಳನ್ನು ದೊಡ್ಡಿಯಲ್ಲಿ ಕೂಡಿ ಹಾಕಿ ಊಟಕ್ಕೆ ತೆರಳಿದ್ದ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ. ಇದರಿಂದ ಅಂದಾಜು ₹1 ಲಕ್ಷ ಹಾನಿಯಾಗಿದೆ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.

ಸ್ಥಳಕ್ಕೆ ಗ್ರಾಮ ಪಂಚಾಯ್ತಿ ಅಧ್ಯಕ್ಷರು, ಸದಸ್ಯರು ಭೇಟಿ ನೀಡಿ ಪರಿಶೀಲಿಸಿದರು.