ಬೇಲೂರು: ಕಾಡು ಹಂದಿಯಿಂದ ಬೆಳೆ ನಾಶ

ಬೇಲೂರು: ಹೆಬ್ಬಾಳು ಗ್ರಾಮದ ಜಯದೇವಪ್ಪ ಮತ್ತು ಪರ್ವತೇಗೌಡ ಎಂಬವರಿಗೆ ಸೇರಿದ ಮುಸುಕಿನ ಜೋಳದ ಕಟಾವಿನ ಹಂತದ ಬೆಳೆಯನ್ನು ಮಂಗಳವಾರ ರಾತ್ರಿ ಕಾಡು ಹಂದಿಗಳು ನಾಶಪಡಿಸಿವೆ.

ರೈತರಾದ ಜಯದೇವಪ್ಪ ಹಾಗೂ ಪರ್ವತೇಗೌಡ ಮಾತನಾಡಿ, ‘25ಕ್ಕೂ ಹೆಚ್ಚು ಕಾಡು ಹಂದಿಗಳು ನುಗ್ಗಿ, ಜೋಳವನ್ನು ಅರೆ-ಬರೆ ತಿಂದು ಹೊಲವನ್ನು ಧ್ವಂಸ ಮಾಡಿವೆ. ನಮಗೆ ದಿಕ್ಕು ತೋಚದಂತಾಗಿದೆ. ಹಂದಿಗಳು ತಿಂದು ಬಿಟ್ಟ ಜೋಳದ ತೆನೆ ಮತ್ತು ಕಡ್ಡಿಯನ್ನು ಜಾನುವಾರುಗಳು ಕೂಡ ತಿನ್ನುವುದಿಲ್ಲ.   ಅಧಿಕಾರಿಗಳು ಭೇಟಿ ನೀಡಿ, ಪರಿಶೀಲಿಸಿ, ಪರಿಹಾರ ಕೊಡಿಸಲು ಕ್ರಮವಹಿಸಬೇಕು’ ಎಂದು ಆಗ್ರಹಿಸಿದರು.