ಜಿಲ್ಲಾ ಉಸ್ತುವಾರಿ ಸಚಿವ ಶಿವಾನಂದ ಪಾಟೀಲರು ರೈತರ ಕ್ಷಮೆ ಕೇಳಲಿ: ಶಂಕರಗೌಡ

ರಟ್ಟೀಹಳ್ಳಿ: ರೈತರ ಆತ್ಮಹತ್ಯೆ ವಿಷಯದ ಮೇಲೆ ರಾಜಕೀಯ ಮಾಡುವುದು ತರವಲ್ಲ. ಜವಾಬ್ದಾರಿಯುತ ಸ್ಥಾನದಲ್ಲಿರುವ ಜಿಲ್ಲಾ ಉಸ್ತುವಾರಿ ಸಚಿವ ಶಿವಾನಂದ ಪಾಟೀಲರು ರೈತರ ಆತ್ಮಹತ್ಯೆ ಕುರಿತು ಹಗುರವಾಗಿ ಮಾತನಾಡಿದ್ದು ಅವರ ಗೌರವಕ್ಕೆ ಘನತೆಗೆ ತಕ್ಕುದಲ್ಲ ಎಂದು ತಾಲ್ಲೂಕು ರೈತ ಸಂಘ ಅಧ್ಯಕ್ಷ ಶಂಕರಗೌಡ ಶಿರಗಂಬಿ ಹೇಳಿದರು.

ಪಟ್ಟಣದ ಪ್ರವಾಸಿ ಮಂದಿರದಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಸಚಿವರು ಸೆ.13ರೊಳಗೆ ರೈತರ ಕ್ಷಮೆ ಕೇಳಬೇಕು. ಇಲ್ಲವಾದಲ್ಲಿ ರೈತ ಸಂಘ ಜಿಲ್ಲಾ ಘಟಕದಿಂದ ಹಾವೇರಿ ಜಿಲ್ಲಾಧಿಕಾರಿ ಕಚೇರಿಗೆ ಮುತ್ತಿಗೆ ಹಾಕಲಾಗುವುದು. ಹೆದ್ದಾರಿ ಬಂದ್ ಮಾಡುವ ಮೂಲಕ ಉಗ್ರ ಹೋರಾಟ ನಡೆಸಲಾಗುವುದು ಎಂದು ತಿಳಿಸಿದರು.

ರೈತ ಸಂಘದ ಉಪಾಧ್ಯಕ್ಷ ಫೈಯಾಜಸಾಬ ದೊಡ್ಡಮನಿ, ಕಾರ್ಯದರ್ಶಿ ಶಂಭು ಮುತ್ತಗಿ, ರಾಜು ಮುತ್ತಗಿ, ಬಸನಗೌಡ, ಬಣಕಾರ, ಮಂಜು ಬಾಗೋಡಿ, ಮಂಜನಗೌಡ್ರ, ಮಲ್ಲೇಶಪ್ಪ ಶಿರಗೇರಿ, ರುದ್ರೇಶ ದ್ಯಾವಕ್ಕಳವರ, ಪ್ರಭು ಮುದವೀರಣ್ಣನವರ ಇದ್ದರು.