ರಾಣೆಬೆನ್ನೂರು: ಪತ್ನಿ ಮೇಲೆ ಹಲ್ಲೆ ಮಾಡಿದೆ ಪತಿಗೆ ಜೈಲು ಶಿಕ್ಷೆ

ರಾಣೆಬೆನ್ನೂರು: ಪತ್ನಿಯ ಮೇಲೆ ಹಲ್ಲೆ ಹಾಗೂ ಎರಡನೇ ಮದುವೆಯಾದ ಅಪರಾಧಕ್ಕೆ ನ್ಯಾಯಾಧೀಶ ಮಹಂತೇಶ ಭೂಸಗೋಳ್‌ ಅವರು ಡಿ.26 ರಂದು ಆರೋಪಿ ಶೇಖರ ಸಹದೇವಪ್ಪ ಅಂಬಿಗೇರ ಎಂಬಾತನಿಗೆ 2 ವರ್ಷ ಜೈಲು ಶಿಕ್ಷೆ ಮತ್ತು ₹ 5000 ದಂಡ ಹಾಗೂ ಎರಡನೇ ಮದುವೆಯಾದ ಅಪರಾಧಕ್ಕೆ 3 ವರ್ಷ ಜೈಲು ಶಿಕ್ಷೆ ಮತ್ತು ₹3000 ದಂಡ ವಿಧಿಸಿ ತೀರ್ಪು ನೀಡಿದ್ದಾರೆ.

ಪತ್ನಿಗೆ ಕಿರುಕುಳ ನೀಡಿ ಹಲ್ಲೆ ನಡೆಸಿದ್ದಕ್ಕೆ ಮತ್ತು ಎರಡನೇ ಮದುವೆಯಾಗಿರುವುದರ ವಿರುದ್ಧ ಆರೋಪಿ ಶೇಖರ  ಪತ್ನಿ ನಗರ ಪೊಲೀಸ್‌ ಠಾಣೆಗೆ ದೂರು ಸಲ್ಲಿಸಿದ್ದರು. ಈ ದೂರಿನನ್ವಯ ನಗರ ಪೊಲೀಸ್ ಠಾಣೆ ಪಿಎಸ್‌ಐ ಪ್ರಭು ಕೆಳಗಿನಮನಿ ಅವರು ತನಿಖೆ ನಡೆಸಿ ದೋಷಾರೋಪಣೆ ಪಟ್ಟಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದ್ದರು.

ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ನ್ಯಾಯಾಧೀಶರು ತೀರ್ಪು ನೀಡಿದ್ದಾರೆ. ಸಹಾಯಕ ಸರ್ಕಾರಿ ವಕೀಲ ಸಂತೋಷಕುಮಾರ ಎಸ್‌.ಎಂ ಅವರು ವಾದ ಮಂಡಿಸಿದ್ದರು.