ಚಿತ್ತಾಪುರ: ‘ಭೀಮ ನಡೆ’ ಯಶಸ್ವಿ, ಶಾಂತಿಯುತ

ಚಿತ್ತಾಪುರ (ಕಲಬುರಗಿ ಜಿಲ್ಲೆ): ಸಂವಿಧಾನ ಸಂರಕ್ಷಣಾ ಸಮಿತಿ ನೇತೃತ್ವದಲ್ಲಿ ಸೋಮವಾರ ಇಲ್ಲಿ ನಡೆದ ‘ಭೀಮನಡೆ’ ಮೆರವಣಿಗೆ ಹಾಗೂ ಸಂವಿಧಾನ ಸಮಾವೇಶ ಶಾಂತಿಯುತವಾಗಿ ಜರುಗಿತು.

ನ.16ರಂದು ಆರ್‌ಎಸ್‌ಎಸ್‌ ನಡೆಸಿದ್ದ ಪಥಸಂಚಲನಕ್ಕೆ ಪರ್ಯಾಯ ಎಂಬಂತೆ ನಡೆದ ಈ ‘ಭೀಮ ನಡೆ’ಯು ‘ಸರ್ವಧರ್ಮ ಸಮನ್ವಯ’ದ ಸಂದೇಶ ವನ್ನೂ ಸಾರಿತು.

ಪಟ್ಟಣದ ಚಿತ್ತಾವಲಿ ಚೌಕ್‌ನಿಂದ ಶುರುವಾದ ಮೆರವಣಿಗೆ ಪ್ರಮುಖ ರಸ್ತೆ, ಚೌಕಗಳ ಮೂಲಕ ಒಂದೂವರೆ ಕಿ.ಮೀ.ನಷ್ಟು ಸಾಗಿ ಸಮಾವೇಶ ನಡೆದ ಬಜಾಜ್ ಕಲ್ಯಾಣ ಮಂಟಪ ತಲುಪಿತು. 

ಬಿಳಿ ಅಂಗಿ, ಖಾಕಿ ಪ್ಯಾಂಟು, ನೀಲಿ ಟೊಪ್ಪಿಗೆ ಧರಿಸಿದ್ದ ಸಮತಾ ಸೈನಿಕದಳದ 500ಕ್ಕೂ ಅಧಿಕ ಕಾರ್ಯಕರ್ತರು ಶಿಸ್ತಿನಿಂದ ಹೆಜ್ಜೆ ಹಾಕಿದರು. ಮಹಿಳೆಯರು ಸೇರಿದಂತೆ ಸಾರ್ವಜನಿಕರು ಪುಷ್ಪವೃಷ್ಟಿಗೈದು ಗೌರವಿಸಿದರು. 45 ನಿಮಿಷಗಳಲ್ಲಿ ಮೆರವಣಿಗೆ ಸಂಪನ್ನಗೊಂಡಿತು.

ಮುಂದೆ ಸಾಗಿದ ಬ್ಯಾಂಡ್‌ ಅನ್ನು ಸಮತಾ ಸೈನಿಕದಳದ ಕಾರ್ಯ ಕರ್ತರು ಹಿಂಬಾಲಿಸಿದರು. ಸಂವಿಧಾನದ ಮಹತ್ವವನ್ನು ಸಾರುವ ಯತ್ನವು ಮೆರವಣಿಗೆಯುದ್ದಕ್ಕೂ ನಡೆಯಿತು.

ಬಳಿಕ ಪುಷ್ಪಾಲಂಕೃತ ರಥದಲ್ಲಿ ‘ತೆರೆದಿಟ್ಟ ಸಂವಿಧಾನ ‍ಪೀಠಿಕೆ’ಯ ಸ್ತಬ್ಧಚಿತ್ರ ಸಾಗಿತು. ಡಾ.ಬಾಬಾಸಾಹೇಬ್‌ ಅಂಬೇಡ್ಕರ್, ವಿಶ್ವಗುರು ಬಸವಣ್ಣ, ಅಂಬಿಗರ ಚೌಡಯ್ಯ, ಶಿವಾಜಿ ಮಹಾರಾಜ್‌, ಟಿಪ್ಪು ಸುಲ್ತಾನ್‌, ಹರಳಯ್ಯ, ಸರ್ವಜ್ಞ, ಸಂತ ಸೇವಾಲಾಲ್‌, ವಿಶ್ವಕರ್ಮ ಮಹರ್ಷಿ ಸೇರಿ ವಿವಿಧ ಮಹನೀಯರ ಭಾವಚಿತ್ರಗಳನ್ನು ಹೊತ್ತ, ತ್ರಿವರ್ಣಧ್ವಜ ಸಹಿತ ಆಟೊಗಳು ಸಾಗಿದವು.

ಬಳಿಕ ಪಟ್ಟಣದ ಬಜಾಜ್ ಕಲ್ಯಾಣ ಮಂಟಪದಲ್ಲಿ ಸಮಾವೇಶ ನಡೆಯಿತು. ಸಂವಿಧಾನ ಪರ ಭಾಷಣಗಳು ಅನುರಣಿಸಿದವು. ಬಿಗಿ ಬಂದೋಬಸ್ತ್‌ ವ್ಯವಸ್ಥೆ ಮಾಡಲಾಗಿತ್ತು.