ಕಲಬುರ್ಗಿ: ಮತ್ತೆ ಮೂವರು ಕೊರೊನಾದಿಂದ ಗುಣಮುಖ

ಕಲಬುರ್ಗಿ: ಕೋವಿಡ್‌ ಸೋಂಕಿನಿಂದ ಗುಣಮುಖರಾದ ನಗರದ ಇಬ್ಬರು ಮತ್ತು ಶಹಾಬಾದ್‌ ಪಟ್ಟಣದ ಬಾಲಕ ಸೇರಿದಂತೆ ಮೂವರನ್ನು ಸೋಮವಾರ ಅಸ್ಪತ್ರೆಯಿಂದ ಬಿಡುಗಡೆಗೊಳಿಸಲಾಗಿದೆ.

ಇಲ್ಲಿನ ಖಾದ್ರಿ ಚೌಕ್ ಪ್ರದೇಶದ 34 ವರ್ಷದ ಯುವಕ (ಪಿ–360), ಮೋಮಿನ್‌ಪುರ ಪ್ರದೇಶದ 30 ವರ್ಷದ ಯುವತಿ (ಪಿ–393) ಹಾಗೂ ಶಹಾಬಾದ್‌ ಪಟ್ಟಣದ‌ ಅಪ್ಪರ ಮಡ್ಡಿ ಪ್ರದೇಶದ 16 ವರ್ಷದ ಬಾಲಕ (ಪಿ–361) ಸೋಂಕಿನಿಂದ ಗುಣಮುಖರಾದವರು.

ಇವರೊಂದಿಗೆ ಜಿಲ್ಲೆಯಲ್ಲಿ ಇದೂವರೆಗೆ ಸೋಂಕಿತರಾದ 63 ಜನರಲ್ಲಿ ಒಟ್ಟು 21 ಜನ ಗುಣಮುಖರಾಗಿದ್ದಾರೆ. ಆರು ಮಂದಿ ಮೃತಪಟ್ಟು, 36 ಜನ ಚಿಕಿತ್ಸೆ ಪಡೆಯುತ್ತಿದ್ದಾರೆ.