ಬಂಜರು ಭೂಮಿಯಲ್ಲಿ ದ್ರಾಕ್ಷಿ ಬೆಳೆದು ಮೂರೇ ವರ್ಷದಲ್ಲಿ ಕೋಟ್ಯಧೀಶನಾದ ರೈತ!

ಚಿಂಚೋಳಿ: ಬಂಜರು ಭೂಮಿಯಲ್ಲಿ ದ್ರಾಕ್ಷಿ ಬೆಳೆದು ಯಶಸ್ವಿಯಾಗಿರುವ ಪಟ್ಟಣದ ರೈತ ಅನಿಲಕುಮಾರ ಢಗೆ ಕೇವಲ ಮೂರೇ ವರ್ಷದಲ್ಲಿ ಕೋಟ್ಯಧೀಶರರಾಗಿ ಹೊರಹೊಮ್ಮಿದ್ದಾರೆ.

ಮೂಲತಃ ಚಿಂಚೋಳಿಯವರಾದ ಅನಿಲಕುಮಾರ ಒಂದೂವರೆ ದಶಕದ ಹಿಂದೆ ವ್ಯಾಪಾರ ಅರಸಿ ವಿಜಯಪುರಕ್ಕೆ ತೆರಳಿ ಅಲ್ಲಿಯೇ ನೆಲೆಸಿದ್ದರು.

ಅಲ್ಲಿ 15-20 ಕಿ.ಮೀ ದೂರದಿಂದ ಕೊಳವೆ ಮೂಲಕ ನೀರು ತಂದು ನೀರಾವರಿ ಕೈಗೊಂಡು ದ್ರಾಕ್ಷಿ ಬೇಸಾಯ ನಡೆಸುತ್ತಿದ್ದ ಅವರ ಸ್ನೇಹಿತರಿಂದ ಪ್ರೇರಣೆ ಪಡೆದು ಚಿಂಚೋಳಿಗೆ ಬಂದು 11 ಎಕರೆ ಬಂಜರು ಭೂಮಿ ಖರೀದಿಸಿ 5 ವರ್ಷಗಳ ಹಿಂದೆ ದ್ರಾಕ್ಷಿ ಬೇಸಾಯ ಆರಂಭಿಸಿದ್ದರು.

ಬೇಸಾಯ ಆರಂಭಿಸಿದ ಮೂರು ವರ್ಷದಲ್ಲಿ ಆದಾಯದ ಹರಿವು ಆರಂಭವಾಯಿತು. ಈಗ ಪ್ರತಿ ವರ್ಷ ಎಕರೆಗೆ ₹3ರಿಂದ ₹4 ಲಕ್ಷ ಆದಾಯ ಪಡೆಯುತ್ತಿದ್ದಾರೆ. ಪ್ರತಿ ಎಕರೆಗೆ 12ರಿಂದ 13 ಟನ್ ಇಳುವರಿ ಪಡೆಯುತ್ತಿರುವ ಇವರು, ಸಮೀಪದ ಹೈದರಾಬಾದ್‌ ಮಾರುಕಟ್ಟೆಗೆ ಹಣ್ಣುಗಳನ್ನು ಕಳುಹಿಸುತ್ತಾರೆ.

ಗೌಡನಹಳ್ಳಿಯ ಜಮೀನಿನಲ್ಲಿ ಎಕರೆಗೆ 10 ಟನ್ ಇಳುವರಿ ಬಂದರೆ ಗಾರಂಪಳ್ಳಿಯ ಜಮೀನಿನಲ್ಲಿ ಎಕರೆಗೆ 14-15 ಟನ್ ಇಳುವರಿ ಬಂದಿದೆ. ಇದರ ಜತೆಗೆ ಎರಡು ವರ್ಷದಲ್ಲಿ 20 ಟನ್ ಒಣದ್ರಾಕ್ಷಿ ತಯಾರಿಸಿ ಮಾರಾಟ ಮಾಡಿದ್ದಾರೆ. ಇದಕ್ಕೆ ಪ್ರತಿ ಕೆಜಿಗೆ ₹220ರಿಂದ ₹250 ದರ ಲಭಿಸಿದೆ.

ಹಿಂದಿನ ವರ್ಷಗಳಲ್ಲಿ ದ್ರಾಕ್ಷಿ ಹಣ್ಣುಗಳ ಸಗಟು ಮಾರಾಟದಲ್ಲಿ ಪ್ರತಿ ಕೆಜಿಗೆ ₹ 40 ದರ ಲಭಿಸಿದರೆ, ಪ್ರಸಕ್ತ ವರ್ಷ ₹50ರಿಂದ 60 ದರ ಲಭಿಸಿದೆ ಎಂದು ಅನಿಲಕುಮಾರ ಢಗೆ ತಿಳಿಸಿದರು.

ಬೆಳೆ ನಿರ್ವಹಣೆಯ ವಾರ್ಷಿಕ ಖರ್ಚು ವೆಚ್ಚ ಕಳೆದು ₹ 30ರಿಂದ 35 ಲಕ್ಷ ಆದಾಯ ಬಂದಿದೆ. ಕಳೆದ ಮೂರು ವರ್ಷಗಳಿಂದ ನಿರಂತರ ಆದಾಯ ಹರಿದು ಬಂದಿದ್ದರಿಂದ ಮೂರು ವರ್ಷದಲ್ಲಿ ಕೋಟಿ ಆದಾಯ ಪಡೆದಿದ್ದಾರೆ.