ಸೇಡಂ: ಮೈದುಂಬಿದ ಕಾಗಿಣಾ ನದಿ ದಾಟಿದ ಅಪ್ಪ-ಮಗಳು

ಸೇಡಂ: ತಾಲ್ಲೂಕಿನ ಯಡ್ಡಳ್ಳಿ-ಸಂಗಾವಿ(ಟಿ) ಗ್ರಾಮದ ಮಧ್ಯೆ ಇರುವ ಕಾಗಿಣಾ ನದಿ ಸೇತುವೆ ಮೇಲೆ ಅಪ್ಪ-ಮಗಳು ಜೀವ ಭಯದಲ್ಲಿಯೇ ನದಿ ದಾಟಿದ ಪ್ರಸಂಗ ಬುಧವಾರ ಬೆಳಿಗ್ಗೆ ನಡೆದಿದೆ.

ತಾಲ್ಲೂಕಿನ ಸಂಗಾವಿ (ಟಿ) ಗ್ರಾಮದ ಭೀಮಶ್ಯಾ ಮತ್ತು ಆತನ ಪುತ್ರಿ ರಾಣಿಯನ್ನು ಹರಿಯುವ ನೀರಿನಲ್ಲಿ ಮುಳುಗಡೆಗೊಂಡಿರುವ ಸೇತುವೆ ಮೂಲಕ ನದಿ ದಾಟಿಸಿದ್ದಾರೆ.

ರಾಣಿ ಸೇಡಂನ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ 6ನೇ ಸೆಮಿಸ್ಟರ್ ವಿದ್ಯಾರ್ಥಿನಿ. ಬುಧವಾರ ಹಿಂದಿ ಪರೀಕ್ಷೆ ಬರೆಯಬೇಕಿರುವ ಅನಿವಾರ್ಯತೆಯಿಂದ ಮಗಳನ್ನು ಕರೆದುಕೊಂಡು ಸೇಡಂಗೆ ಹೊರಟಾಗ ಕಾಗಿಣಾ ನದಿಯಲ್ಲಿ ನೀರಿನ ಪ್ರವಾಹದಲ್ಲಿಯೇ, ಮಗಳ ಬ್ಯಾಗ್ ಹೆಗಲಿಗೆ ಹಾಕಿಕೊಂಡು, ಮಗಳ ಕೈಹಿಡಿದು ನದಿ ದಾಟಿಸಿದ್ದಾರೆ.

ನಂತರ ಮಧ್ಯಾಹ್ನ ಪುನಃ ಕಾಲೇಜಿನಿಂದ ಬರುವಾಗಲೂ ಸಹ ಮಗಳನ್ನು ನದಿಯಿಂದ ದಾಟಿಸಿ ಕರೆದುಕೊಂಡು ಬಂದಿದ್ದಾರೆ. ತಂದೆ-ಮಗಳು ನದಿ ದಾಟುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಸೇತುವೆ ನಿರ್ಮಿಸಬೇಕು ಎಂದು ಹಲವರು ಒತ್ತಾಯಿಸಿದ್ದಾರೆ.

ಎರಡು ದಿನಗಳಿಂದ ಗ್ರಾಮದ ಶಾಲೆ ಬಂದ್: ಸಂಗಾವಿ (ಟಿ) ಗ್ರಾಮಸ್ಥರು ಸೇಡಂಗೆ ತೆರಳಬೇಕಾದರೆ ಕಾಗಿಣಾ ನದಿ ಸೇತುವೆ ದಾಟಿ ಯಡ್ಡಳ್ಳಿ ಗ್ರಾಮದ ಮೂಲಕ ತೆರಳಬೇಕು. ಎರಡು ದಿನಗಳಿಂದ ನಿರಂತರ ಮಳೆ ಬರುತ್ತಿರುವುದರಿಂದ ಕಾಗಿಣಾ ನದಿ ಮೈದುಂಬಿ ಹರಿಯುತ್ತಿದ್ದು, ಸೇತುವೆ ಮುಳುಗಿದೆ. ಗ್ರಾಮದಲ್ಲಿರುವ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯೂ ಎರಡು ದಿನಗಳಿಂದ ಬಂದ್ ಆಗಿದೆ.

ಸಂಗಾವಿ(ಟಿ) ಗ್ರಾಮಕ್ಕೆ ಜಲ ದಿಗ್ಬಂಧನ:  ಸಂಗಾವಿ (ಟಿ) ಗ್ರಾಮದ ಸುತ್ತಲೂ ನದಿ ನೀರು ಇರುವುದರಿಂದ ಗ್ರಾಮಸ್ಥರು ನದಿ ದಾಟುವ ಅನಿವಾರ್ಯತೆ ಇದೆ. ಕುರಕುಂಟಾದ ಹಳ್ಳ ಮತ್ತು ಕಾಗಿಣಾ ನದಿ ನೀರು ಗ್ರಾಮದ ಸುತ್ತುವರಿದಿದೆ. ಗ್ರಾಮದಿಂದ ಸುಮಾರು 30ಕ್ಕೂ ಅಧಿಕ ವಿದ್ಯಾರ್ಥಿಗಳು ವಿದ್ಯಾಭ್ಯಾಸಕ್ಕಾಗಿ ಸೇಡಂಗೆ ತೆರಳುತ್ತಾರೆ. ಕೂಲಿ ಕಾರ್ಮಿಕರು, ರೈತರು ಹೀಗೆ ನೂರಾರು ರೈತರು ನಿತ್ಯವು ಸಂಚಾರಕ್ಕೆ ಇದೆ ಮಾರ್ಗ. ಸಂಪರ್ಕ ಕಡಿತದಿಂದಾಗಿ ಗ್ರಾಮದಿಂದ ಯಾರೂ ಸಹ ಹೊರಗಡೆ ಹೋಗಲು ಸಾಧ್ಯವಾಗಿಲ್ಲ ಎನ್ನುತ್ತಾರೆ ಗ್ರಾಮಸ್ಥ ಶಾಬೋದ್ದಿನ್ ಸಂಗಾವಿ.