ಕಲಬುರಗಿ | ಮೊಹರಂ: ನೈವೇದ್ಯ ಸಮರ್ಪಣೆ

ಕಲಬುರಗಿ: ನಗರವೂ ಸೇರಿದಂತೆ ಜಿಲ್ಲೆಯ ವಿವಿಧೆಡೆ ಮೊಹರಂ ಆಚರಣೆಯ 9ನೇ ದಿನವಾದ ಶನಿವಾರದಂದು ಅಲಾಯಿ ದೇವರುಗಳ ಮೆರವಣಿಗೆ ಹಾಗೂ ನೈವೇದ್ಯವನ್ನು ಸಮರ್ಪಿಸಲಾಯಿತು.

ನಗರದ ಹಳೇ ಜೇವರ್ಗಿ ರಸ್ತೆಯಲ್ಲಿರುವ ಹಳೇ ದರ್ಗಾ, ಸ್ಟೇಷನ್ ರಸ್ತೆ, ರೋಜಾ ಬಡಾವಣೆಯ ಹುಸೇನಿ ಆಲಂ ಪ್ರದೇಶ, ಪಾಶ್ಚಾಪುರ ಬಡಾವಣೆಯ ಹಳೇ ದರ್ಗಾ, ಅಂಜುಮನ್ ಏರಿಯಾ ಸೇರಿದಂತೆ ಹಲವೆಡೆ ದೇವರುಗಳನ್ನು ಪ್ರತಿಷ್ಠಾಪನೆ ಮಾಡಲಾಗಿದೆ.

ಮುಸ್ಲಿಮೇತರರು ಬೆಳಿಗ್ಗೆಯಿಂದಲೇ ಅಲಾಯಿ ದೇವರ ದರ್ಶನ ಪಡೆದು, ನೈವೇದ್ಯ ನೀಡಿದರು. ಮೊಹರಂ ಕೊನೆಯ ಮೂರು ದಿನಗಳ ಎರಡನೇ ದಿನದಂದು ಮಹಿಳೆಯರು ಮತ್ತು ಪುರುಷರು ಉಪಾಸನೆ (ರೋಜಾ) ಕೈಗೊಂಡು, ಸಂಜೆ ವೇಳೆ ಇಫ್ತಾರಿ ಮುಗಿಸಿದರು. ಇದೇ ಉಪಾಸನೆಯನ್ನು ಹಬ್ಬದ ಕೊನೆಯ ದಿನವಾದ ಭಾನುವಾರವೂ ಆಚರಿಸಲಿದ್ದಾರೆ.

ಸಮಾಪನ ಇಂದು:

10 ದಿನಗಳ ಮೊಹರಂ ಆಚರಣೆಯು ಭಾನುವಾರ ಸಂಪನ್ನಗೊಳ್ಳಲಿದೆ. ಐತಿಹಾಸಿಕ ಖಾಜಾ ಬಂದಾ ನವಾಜ್‌ ದರ್ಗಾದಲ್ಲಿ ಕುಟುಂಬದವರು ಹಾಗೂ ಧರ್ಮಗುರುಗಳ ನೇತೃತ್ವದಲ್ಲಿ ಮೊಹರಂ ಸಂಪ್ರದಾಯಗಳು ನೆರವೇರಲಿವೆ. ನಗರದ ಎಲ್ಲ ಆಶ್ರಖಾನಿಗಳಿಂದ ಹೊತ್ತು ತರುವ ಅಲಾಯಿ ದೇವರುಗಳ ಮೆರವಣಿಗೆ ಸಮಾಪನಗೊಳ್ಳಲಿದೆ.