ಪತ್ರಿಕಾ ವಿತರಕರ ದಿನ: ‘ವರ್ತಮಾನ’ ಹೊತ್ತು ತರುವ ಯೋಧರು

ಕಲಬುರಗಿ: ಮಹಾನಗರವೆಲ್ಲ ಇನ್ನೂ ಕತ್ತಲೆ ಹೊದ್ದು ಮಲಗಿರುತ್ತೆ. ನಾಗರಿಕರೆಲ್ಲ ಸವಿನಿದ್ದೆಯಲ್ಲಿ ಗೊರಕೆ ಹೊಡೆಯುವ ಹೊತ್ತು. ಆದರೆ, ನಗರದ ಕೆಲವು ತಾಣಗಳಲ್ಲಿ ಮಾತ್ರ ವಿಪರೀತ ಗಡಿಬಿಡಿ. ಯುವಕರು, ವೃದ್ಧರು ಬಂಡಲ್‌ ಹೊಂದಿಸುವಲ್ಲಿ ಬ್ಯುಸಿ. ಪಟಪಟನೆ ದಿನಪತ್ರಿಕೆಗಳನ್ನು ಲೆಕ್ಕಹಾಕಿ, ಒಪ್ಪವಾಗಿ ಜೋಡಿಸಿ, ಸೈಕಲ್‌–ಬೈಕ್‌ಗಳ ಹೆಗಲೇರಿಸುತ್ತಿರುತ್ತಾರೆ. ಆಗಸದಲ್ಲಿ ಬೆಳಕು ಮೂಡಿ, ಜನರು ಎದ್ದೇಳುವ ಮುನ್ನ ಸೈಕಲ್‌, ಬೈಕ್‌–ಸ್ಕೂಟರ್‌ಗಳ ಮೇಲೆ ಏರಿಸಿದ ಭಾರ ಇಳಿಸಿಕೊಳ್ಳುವ ಧಾವಂತ ಅವರದು. ಇಲ್ಲದಿದ್ದರೆ ವಾಕಿಂಗ್‌ ಮುಗಿಸಿ ಬರುವ, ಎದ್ದು ಚಹಾ–ಕಾಫಿ ಹೀರುವ ಹೊತ್ತಿಗೆ ಪೇಪರ್‌ ಹೇಗೆ ಸಿಗುತ್ತೆ?

ಇದು ಪತ್ರಿಕಾ ವಿತರಕರ ನಿತ್ಯ ಪ್ರಪಂಚದ ನೋಟ. ಮೂಡಣದಲ್ಲಿ ಸೂರ್ಯ ಮೂಡಲಿ ಬಿಡಲಿ, ಈ ಕಾಯಕ ಜೀವಿಗಳ ಕೆಲಸಕ್ಕೆ ಮಾತ್ರ ಬಿಡುವಿಲ್ಲ. ಗಾಳಿ ಬೀಸುತ್ತಿರಲಿ, ಮಳೆ ಸುರಿಯುತ್ತಿರಲಿ, ಇಲ್ಲವೇ ಚಳಿ ಮುತ್ತುತ್ತಿರಲಿ. ಇವರ ಕೆಲಸ ಮಾತ್ರ ನಿಲ್ಲುವುದಿಲ್ಲ. ಓದುಗರು ಹಾಗೂ ಸುದ್ದಿಮನೆಗಳ ನಡುವೆ ಕೊಂಡಿಯಾಗಿ ಪತ್ರಿಕಾ ವಿತರಕರು ಕೆಲಸ ಮಾಡುತ್ತಾರೆ.

ನಾವೆಲ್ಲ ನಸುಕಿನ ಸವಿನಿದ್ದೆಯಲ್ಲಿ ಇರುವಾಗಲೇ ಅವರನ್ನು ‘ಕರ್ತವ್ಯ’ ಎಚ್ಚರಿಸಿ ಬಿಡುತ್ತೆ. ಬೆಳಿಗ್ಗೆ 4 ಗಂಟೆ ಹೊತ್ತಿಗೆಲ್ಲ ಅವರು ಸೈಕಲ್‌, ಬೈಕ್‌–ಸ್ಕೂಟರ್‌ಗಳೇರಿ ಮನೆಗಳಿಂದ ಹೊರಟು ನಿಗದಿತ ಜಾಗ ಸೇರುತ್ತಾರೆ.

ಅಷ್ಟೊತ್ತಿಗೆಲ್ಲ ಸುದ್ದಿ ಮನೆಗಳಲ್ಲಿ ಸಿದ್ಧವಾಗಿ ಮುದ್ರಣಾಲಯಲ್ಲಿ ಪ್ರಿಂಟ್‌ ಆದ ಪತ್ರಿಕೆಗಳ ಬಂಡಲ್‌ಗಳನ್ನು ವಾಹನಗಳು ‘ಧೊಪ್ಪ–ಧೊಪ್ಪ’ವೆಂದು ಬಿಸಾಡಿ ಹೋಗಿರುತ್ತವೆ. ಆ ಬಂಡಲ್‌ಗಳನ್ನು ಒಡೆದು, ಅದರಲ್ಲಿರುವ ಬರುವ ಪತ್ರಿಕೆಗಳನ್ನು ಒಪ್ಪವಾಗಿ ಪೇರಿಸಿಕೊಂಡು ಹಂಚಲು ಅವರೆಲ್ಲ ಅಣಿಯಾಗುತ್ತಾರೆ. ತಮ್ಮಲ್ಲಿನ ಕೊನೆಯ ಪತ್ರಿಕೆಯನ್ನು ಓದುಗರ ಮನೆಗೆ ‘ಧೊಪ್’ ಎಂದು ಹಾಕಿದಾಗಲೇ ಅವರಿಗೆ ನೆಮ್ಮದಿ. ತಿಂಡಿ ತಿಂದು ಅಲ್ಲಲ್ಲಿ ಬಿಲ್‌ ಸಂಗ್ರಹಿಸಿದ ಬಳಿಕವೇ ಒಂದಿಷ್ಟು ವಿಶ್ರಾಂತಿ.

ಪೇಪರ್‌ ಹಾಕುವುದು ಕೆಲವೇ ತಾಸುಗಳ ಪಾರ್ಟ್‌ಟೈಂ ಕೆಲಸ ಎನಿಸಿದರೂ ಪತ್ರಿಕಾ ವಿತರಕರು ತಮ್ಮ ಕೆಲಸವನ್ನು ಇನ್ನಿಲ್ಲದಂತೆ ಪ್ರೀತಿಸುತ್ತಾರೆ. ಕೋವಿಡ್‌ ಆವರಿಸಿದಾಗ ದೇಶದಲ್ಲಿ ಜನ ಮನೆ ಸೇರಿ ಬೀದಿಗಳೆಲ್ಲ ನಿರ್ಜನವೇ ಆಗಿದ್ದವು. ಅಂಥ ಅಂಥ ಸಮಯದಲ್ಲಿ ಹಲವರು ವೃತ್ತಿಗಳನ್ನೇ ಬದಲಿಸಿದ್ದರು. ಆದರೆ, ಪತ್ರಿಕಾ ವಿತರಕರು ಆ ಸವಾಲು ಧೈರ್ಯದಿಂದ ಮೀರಿ ನಿಂತರು. ಕೋವಿಡ್‌ ವಾರಿಯರ್‌ಗಳೆಂಬ ಮೆಚ್ಚುಗೆಗೂ ಪಾತ್ರವಾಗಿದ್ದು ಈಗ ಇತಿಹಾಸ.

ಕೋವಿಡ್‌ ಇಲ್ಲದಿದ್ದರೂ, ಮಳೆ–ಚಳಿ, ಬೀದಿ ನಾಯಿಗಳ ಕಾಟ, ಕೆಸರು ತುಂಬಿದ ರಸ್ತೆಗಳಂಥ ಹಲವು ಸವಾಲುಗಳನ್ನು ನಿತ್ಯ ಎದುರಿಸುತ್ತ ನಿತ್ಯ ಮನೆ–ಮನೆಗೆ ಜ್ಞಾನದ ಹೂರಣ ಒಳಗೊಂಡ ಪತ್ರಿಕೆಗಳನ್ನು ಜನರಿಗೆ ತಲುಪಿಸುವ ಈ ಕಾಯಕ ಜೀವಿಗಳಿಗೊಂದು ‘ಸಲಾಂ’.

‘ಕ್ಷೇಮ ನಿಧಿ ಸ್ಥಾಪಿಸಲಿ ಪಿಂಚಣಿ ಕೊಡಲಿ’

‘ಪತ್ರಿಕಾ ವಿತರಕರಿಗೆ ಸರ್ಕಾರ ಕ್ಷೇಮನಿಧಿ ಸ್ಥಾಪಿಸಬೇಕು. 70 ವರ್ಷ ಮೀರಿದ ಹಿರಿಯ ಪತ್ರಿಕಾ ವಿತರಕರಿಗೆ ತಿಂಗಳಿಗೆ ₹5 ಸಾವಿರ ಪಿಂಚಣಿ ಕೊಡಬೇಕು. ಪತ್ರಿಕಾ ವಿತರಕರ ಸೇವೆ ಗುರುತಿಸಿ ಜಿಲ್ಲಾ ಹಾಗೂ ತಾಲ್ಲೂಕುಮಟ್ಟದ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿಗೆ ಪರಿಗಣಿಸಬೇಕು. ತಾತ್ಕಾಲಿಕವಾಗಿ ಸ್ಥಗಿತಗೊಂಡಿರುವ ಸ್ವ–ನಿಧಿ ಯೋಜನೆಯನ್ನು ಪ್ರಾರಂಭಿಸಬೇಕು. ಪತ್ರಿಕಾ ವಿತರಕರ ಪ್ರತಿಭಾನ್ವಿತ ವಿದ್ಯಾರ್ಥಿಗಳ ಉನ್ನತ ಶಿಕ್ಷಣಕ್ಕೆ ಸರ್ಕಾರ ಆರ್ಥಿಕ ನೆರವು ನೀಡಬೇಕು. ಪತ್ರಿಕೆಗಳನ್ನು ಮನೆ–ಮನೆಗೆ ತಲುಪಿಸಲು ಸರ್ಕಾರ ಸಬ್ಸಿಡಿ ದರದಲ್ಲಿ ಎಲೆಕ್ಟ್ರಾನಿಕ್‌ ಬೈಕ್‌ ಒದಗಿಸಬೇಕು’ ಎನ್ನುತ್ತಾರೆ ಕಲಬುರಗಿ ಜಿಲ್ಲಾ ಪತ್ರಿಕಾ ವಿತರಕರ ಸಂಘದ ಅಧ್ಯಕ್ಷ ರಮಾಕಾಂತ್ ಜಿಡಗೇಕರ್.

ಪತ್ರಿಕಾ ವಿತರಕರ ಅಂಬೋಣ...