ಕಲಬುರಗಿ: ಧಗೆಯಿಂದ ಪಾರಾಗಲು ಈಜು ಮೊರೆ

ಕಲಬುರಗಿ: ನಿರಂತರವಾಗಿ ಏರುಗತಿಯಲ್ಲಿರುವ ತಾಪಮಾನ ಜನರನ್ನು ಕಂಗೆಡಿಸಿದೆ. ದೇಹ ತಂಪಾಗಿರಿಸಿಕೊಳ್ಳಲು ಅವರು ಈಜಿನತ್ತ ಮುಖ ಮಾಡುತ್ತಿರುವುದು ಸಾಮಾನ್ಯವಾಗಿದೆ. ಇದರಿಂದ ನಗರದ ಚಂದ್ರಶೇಖರ ಪಾಟೀಲ ಜಿಲ್ಲಾ ಕ್ರೀಡಾಂಗಣದ ಸಮುಚ್ಛಯದಲ್ಲಿರುವ ಈಜುಕೊಳ ಪ್ರತಿದಿನ ಜನರಿಂದ ತುಂಬಿ ತುಳುಕುತ್ತಿದೆ.

ಹವ್ಯಾಸಿ ಹಾಗೂ ಸ್ಪರ್ಧಾತ್ಮಕ ಈಜು ಸ್ಪರ್ಧಿಗಳು ಸೇರಿ ಹಿಂದಿನ ವರ್ಷಕ್ಕಿಂತ ಸುಮಾರು 200 ಹೆಚ್ಚಿನ ಸ್ಪರ್ಧಿಗಳು ಈ ಬಾರಿ ನೋಂದಾಯಿಸಿಕೊಂಡಿದ್ದು, ಬಿಸಿಲಿನ ಪ್ರಖರತೆಗೆ ಸಾಕ್ಷಿ.

‘ಹಿಂದಿನ ವರ್ಷ ಸುಮಾರು 1,000 ಮಂದಿ ಈಜಿಗಾಗಿ ನೋಂದಾಯಿಸಿಕೊಂಡಿದ್ದರು. ಈ ಬಾರಿ ಆ ಸಂಖ್ಯೆ 1,200 ದಾಟಿದೆ. ಇದು ಇನ್ನೂ ಆರಂಭ. ಏಪ್ರಿಲ್‌–ಮೇ ತಿಂಗಳಲ್ಲಿ ಈ ಸಂಖ್ಯೆ ಇನ್ನೂ ಅಧಿಕವಾಗಲಿದೆ’ ಎಂದು ಅಲ್ಲಿನ ಸಿಬ್ಬಂದಿ ಹೇಳುತ್ತಾರೆ.

ಪ್ರತಿದಿನ ಏಳು ಬ್ಯಾಚ್‌ಗಳನ್ನು ಮಾಡಲಾಗುತ್ತಿದೆ. ಮಹಿಳೆಯರಿಗಾಗಿ ಪ್ರತ್ಯೇಕ ಬ್ಯಾಚ್ ಇದೆ. 60ಕ್ಕಿಂತ ಹೆಚ್ಚು ಮಹಿಳೆಯರು ನೋಂದಾಯಿಸಿಕೊಂಡಿದ್ದಾರೆ. ಈಜುಕೊಳಕ್ಕೆ ಬರುವವರು ಕ್ಯಾಪ್‌, ಸಮವಸ್ತ್ರ ಸೇರಿದಂತೆ ಇತರ ಪರಿಕರಗಳನ್ನು ತಾವೇ ತರಬೇಕು. 50 ಮೀಟರ್‌ ಅಗಲ ಮತ್ತು 21 ಮೀಟರ್‌ ಅಗಲ ಇರುವ ಈ ಕೊಳ ಗರಿಷ್ಠ 6 ಅಡಿ ಆಳ ಹೊಂದಿದೆ. ನಾಲ್ಕು ಜನ ಜೀವರಕ್ಷಕರು ಸೇರಿ 12 ಜನ ನಿರ್ವಹಣಾ ಸಿಬ್ಬಂದಿ ಇದ್ದಾರೆ. ಮಹಿಳೆ ಮತ್ತು ಪುರುಷರಿಗಾಗಿ ಪ್ರತ್ಯೇಕ ಕೋಚ್‌ಗಳು ಇದ್ದಾರೆ. ಸ್ನಾನಕೊಳ ಮತ್ತು ಷವರ್‌ ವ್ಯವಸ್ಥೆಯೂ ಇಲ್ಲಿದೆ. ಪ್ರತಿದಿನ ಒಂದು ತಾಸು ಸಮಯ ಈಜಬಹುದಾಗಿದೆ.

ಪ್ರತಿ ಮಂಗಳವಾರ ಈಜುಕೊಳ ತೆರೆಯುವುದಿಲ್ಲ. ಪ್ರತಿದಿನ ಬ್ಲೀಚಿಂಗ್ ಪೌಡರ್‌ ಮತ್ತು ಇತರೆ ರಾಸಾಯನಿಕ ಬಳಸಿ ಕೊಳವನ್ನು ಸ್ವಚ್ಛ ಮಾಡಲಾಗುತ್ತದೆ.

ಶಾಲೆಗಳಿಗೆ ರಜೆ ಇರುವುದರಿಂದ ಪೋಷಕರು ತಮ್ಮ ಮಕ್ಕಳನ್ನು ಈಜು ಕಲಿಯಲೆಂದು ಕರೆದುಕೊಂಡು ಬರುವುದು ಹೆಚ್ಚಾಗಿದೆ. 2008ರಲ್ಲಿ ಈ ಈಜುಕೊಳವನ್ನು ನಿರ್ಮಿಸಲಾಗಿದೆ. ಹವ್ಯಾಸಿ ಈಜುಗಾರರ ಸಂಖ್ಯೆ ಹೆಚ್ಚಾಗುತ್ತಿರುವುದರಿಂದ ಸ್ಪರ್ಧಿಗಳಿಗಾಗಿ ಪ್ರತ್ಯೇಕ ಈಜುಕೊಳ ನಿರ್ಮಿಸಬೇಕು ಎಂದು ಹಲವು ಪೋಷಕರು ಒತ್ತಾಯಿಸುತ್ತಾರೆ.

ಬೇಬಿ ಈಜುಕೊಳ ದುರಸ್ತಿಗೆ ಒತ್ತಾಯ: ಇದೇ ಸಮುಚ್ಛಯದಲ್ಲಿರುವ ಬೇಬಿ ಈಜುಕೊಳವು (ಹತ್ತು ವರ್ಷದೊಳಗಿನವರ) ನೀರಿನ ಸೋರಿಕೆ ಸಮಸ್ಯೆಯಿಂದಾಗಿ ರಿಪೇರಿಗೆ ಕಾದಿದೆ. ಅದನ್ನು ದುರಸ್ತಿ ಮಾಡಿದರೆ ಅನುಕೂಲವಾಗುತ್ತದೆ ಎನ್ನುತ್ತಾರೆ ಸಾರ್ವಜನಿಕರು.

ಈಜು ನೋಂದಣಿ ಶುಲ್ಕ

ತರಬೇತಿ ರಹಿತ (ಪ್ರತಿ ತಿಂಗಳಿಗೆ)

ವಿಭಾಗ;ಶುಲ್ಕ 

16 ವರ್ಷದೊಳಗಿನವರು; ₹ 600

16 ವರ್ಷಕ್ಕಿಂತ ಮೇಲಿನವರು;₹ 1,200

ಸರ್ಕಾರಿ ನೌಕರರು, ಸೀನಿಯರ್ಸ್;₹ 600

ತರಬೇತಿ ಸಹಿತ (15 ದಿನಕ್ಕೆ)

16 ವರ್ಷದೊಳಗಿನವರು;₹1,200

16 ವರ್ಷಕ್ಕಿಂತ ಮೇಲಿನವರು;₹1,800

ಸರ್ಕಾರಿ ನೌಕರರು, ಸೀನಿಯರ್ಸ್;₹1,200