ಪಂಚವಾರ್ಷಿಕ ಬಜೆಟ್‌ಗೆ ಕಾಫಿ ಮಂಡಳಿ ಸಿದ್ಧತೆ: ದುಪ್ಪಟ್ಟು ಹಣಕ್ಕೆ ಬೇಡಿಕೆ

ಮಡಿಕೇರಿ: ಒಂದೆಡೆ ಕೇಂದ್ರ ಸರ್ಕಾರ ತನ್ನ ವಾರ್ಷಿಕ ಬಜೆಟ್‌ಗೆ ತಯಾರಿ ನಡೆಸುತ್ತಿದ್ದರೆ, ಮತ್ತೊಂದೆಡೆ ಕಾಫಿ ಮಂಡಳಿಯು ತನ್ನ ಪಂಚವಾರ್ಷಿಕ ಬಜೆಟ್‌ಗೆ ಭರದ ಸಿದ್ಧತೆ ನಡೆಸಿದೆ. ಈಗಾಗಲೇ ಹಲವು ಸುತ್ತಿನ ಚರ್ಚೆ, ಸಮಾಲೋಚನೆಗಳು ನಡೆದಿದ್ದು, ಕರಡು ಸಹ ಸಿದ್ಧವಾಗುವ ಹಂತದಲ್ಲಿದೆ. ಈ ಬಾರಿ ಕಾಫಿ ಮಂಡಳಿ ಕಳೆದ ಬಾರಿಗಂತ ದುಪ್ಪಟ್ಟು ಹಣ ಕೇಳಲು ತೀರ್ಮಾನಿಸಿದೆ.

ಸಾಮಾನ್ಯವಾಗಿ ಕಾಫಿ ಮಂಡಳಿ ಸೇರಿದಂತೆ ಇನ್ನಿತರ ಮಂಡಳಿಗಳು 5 ವರ್ಷದ ಕ್ರಿಯಾಯೋಜನೆ ರೂಪಿಸಿ ಕೇಂದ್ರ ಸರ್ಕಾರಕ್ಕೆ ಸಲ್ಲಿಸುತ್ತವೆ. ನಂತರ, ಸಚಿವ ಸಂಪುಟವು ಅನುಮೋದನೆ ನೀಡಿ, ಬಳಿಕ ಸಂಸತ್ ಒಪ್ಪಿಗೆ ಸೂಚಿಸಲಿದೆ. ಈ ವರ್ಷ ಕಳೆದ 5 ವರ್ಷಗಳ ಅವಧಿ ಮುಗಿದಿದೆ. 2026ರಿಂದ 2031ರವರೆಗಿನ ಅವಧಿಯ ಯೋಜನೆಗಾಗಿ ಕಾಫಿ ಮಂಡಳಿ ಸಿದ್ಧತೆಯಲ್ಲಿ ತೊಡಗಿದೆ.

‘ಕಳೆದ 5 ವರ್ಷಗಳ ಅವಧಿಗೆಂದು ಕೇಂದ್ರ ಸರ್ಕಾರ ಕಾಫಿ ಮಂಡಳಿಗೆ ₹ 900 ಕೋಟಿಯಷ್ಟು ಹಣ ನೀಡಿತ್ತು. ಎಲ್ಲ ಹಣವನ್ನು ಬಳಕೆ ಮಾಡಿಕೊಳ್ಳಲಾಗಿದೆ. ಮುಂದಿನ 5 ವರ್ಷಗಳಿಗೆ ₹ 1600ರಿಂದ 1,700 ಕೋಟಿ ಹಣ ಕೇಳಲು ತೀರ್ಮಾನಿಸಿದ್ದೇವೆ. ಈ ಪಂಚವಾರ್ಷಿಕ ಯೋಜನೆಯ ಕರಡು ತಯಾರಿ ನಡೆಯುತ್ತಿದೆ’ ಎಂದು ಕಾಫಿ ಮಂಡಳಿಯ ಅಧ್ಯಕ್ಷ ದಿನೇಶ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

ಈ ಬಾರಿ ಕಳೆದ 5 ವರ್ಷಗಳಿಗಿಂತ ತೀರಾ ಭಿನ್ನವಾದ ಯೋಜನೆಯನ್ನು ಸಿದ್ಧಪಡಿಸಲಾಗುತ್ತಿದೆ. ಮುಖ್ಯವಾಗಿ, ಕಾರ್ಮಿಕರ ಕೊರತೆಗೆ ಪರಿಹಾರ ಕಂಡುಕೊಳ್ಳಲು ಯಾಂತ್ರೀಕರಣಕ್ಕೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ. ಈ ಯಾಂತ್ರೀಕರಣವನ್ನು ಕಾಫಿ ಬೆಳೆಯಲ್ಲಿ ಹೆಚ್ಚು ಹೆಚ್ಚು ತೊಡಗಿಸಿಕೊಳ್ಳುವುದರಿಂದ ಸಹಜವಾಗಿಯೇ ಕಾರ್ಮಿಕರ ಮೇಲಿನ ಅವಲಂಬನೆ ಕಡಿಮೆಯಾಗಲಿದೆ. ಹೀಗಾಗಿ, ಪಂಚ ವಾರ್ಷಿಕ ಬಜೆಟ್‌ನಲ್ಲಿ ಯಾಂತ್ರೀಕರಣಕ್ಕೆ ಹೆಚ್ಚು ಆದ್ಯತೆ ನೀಡಲಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ.

ಇದರೊಂದಿಗೆ ಸೂಕ್ತ ಬೆಳೆಗಾರರಿಗೆ ತರಬೇತಿಗಳು, ವಿವಿಧ ಬಗೆಯ ಕೋರ್ಸ್‌ಗಳನ್ನು ಆರಂಭಿಸುವುದು ಸೇರಿದಂತೆ ಅನೇಕ ಹೊಸ ಅಂಶಗಳನ್ನು ಈ ಪಂಚ ವಾರ್ಷಿಕ ಯೋಜನೆಯಲ್ಲಿ ತರಲಾಗುತ್ತಿದೆ. ಹೀಗಾಗಿ, ಹೆಚ್ಚಿನ ಅನುದಾನ ನಿರೀಕ್ಷೆಯಲ್ಲಿ ಕಾಫಿ ಮಂಡಳಿ ಇದೆ.