28ಕ್ಕೆ ಮೂರು ಪಟ್ಟಣ ಪಂಚಾಯಿತಿ ಚುನಾವಣೆ

ಮಡಿಕೇರಿ: ಕೊಡಗು ಜಿಲ್ಲೆಯ ವಿರಾಜಪೇಟೆ, ಕುಶಾಲನಗರ ಹಾಗೂ ಸೋಮವಾರಪೇಟೆ ಪಟ್ಟಣ ಪಂಚಾಯಿತಿಗಳಿಗೆ ಇದೇ 28ರಂದು ಮತದಾನ ನಡೆಯಲಿದೆ ಎಂದು ಜಿಲ್ಲಾಧಿಕಾರಿ ಪಿ.ಐ. ಶ್ರೀವಿದ್ಯಾ ಹೇಳಿದರು.

ನಗರದಲ್ಲಿ ಸೋಮವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ‘16ರಂದು ನಾಮಪತ್ರ ಸಲ್ಲಿಕೆಗೆ ಕಡೆಯ ದಿನ. 17ರಂದು ನಾಮಪತ್ರಗಳ ಪರಿಶೀಲನಾ ಕಾರ್ಯ ನಡೆಯಲಿದೆ. 20ರಂದು ನಾಮಪತ್ರ ವಾಪಸ್ ಪಡೆಯಲು ಕಡೆಯ ದಿನ. 31ರಂದು ಮತ ಎಣಿಕೆ ಕಾರ್ಯ ನಡೆಯಲಿದೆ ಎಂದು ಮಾಹಿತಿ ನೀಡಿದರು.

ಎಷ್ಟು ವಾರ್ಡ್‌ಗಳು: ಸೋಮವಾರಪೇಟೆ 11, ಕುಶಾಲನಗರ 16, ವಿರಾಜಪೇಟೆಯಲ್ಲಿ 18 ವಾರ್ಡ್‌ಗಳಿವೆ. ಸೋಮವಾರಪೇಟೆ ವ್ಯಾಪ್ತಿಯಲ್ಲಿ 5,261, ಕುಶಾಲನಗರ ವ್ಯಾಪ್ತಿಯಲ್ಲಿ 11,599, ವಿರಾಜಪೇಟೆ ವ್ಯಾಪ್ತಿಯಲ್ಲಿ 13,926 ಮತದಾರರು ಇದ್ದಾರೆ. ಒಟ್ಟು 30,786 ಮತದಾರರು ಎಂದು ಮಾಹಿತಿ ನೀಡಿದರು.

ಸೋಮವಾರಪೇಟೆಯಲ್ಲಿ 11, ಕುಶಾಲನಗರದಲ್ಲಿ 16, ವಿರಾಜಪೇಟೆಯಲ್ಲಿ 18 ಸೇರಿದಂತೆ ಒಟ್ಟು ಜಿಲ್ಲೆಯಲ್ಲಿ 45 ಮತಗಟ್ಟೆ ಸ್ಥಾ‍ಪಿಸಲಾಗಿದೆ. ಸೋಮವಾರಪೇಟೆಯಲ್ಲಿ 2, ಕುಶಾಲನಗರದಲ್ಲಿ 3, ವಿರಾಜಪೇಟೆಯಲ್ಲಿ 2 ಅತೀ ಸೂಕ್ಷ್ಮ ಮತಗಟ್ಟೆಗಳಿವೆ ಎಂದು ಮಾಹಿತಿ ನೀಡಿದರು.

ವೀಕ್ಷಕರು: ವಿಶೇಷ ವೀಕ್ಷಕರಾಗಿ ಆರುಂಧತಿ ಚಂದ್ರಶೇಖರ್‌, ಸಾಮಾನ್ಯ ವೀಕ್ಷಕರಾಗಿ ಎಂ.ಜೆ. ರೂಪಾ, ವೆಚ್ಚ ವೀಕ್ಷಕರಾಗಿ ಎನ್‌. ಸುಶೀಲಮ್ಮ ಅವರು ನೇಮಕಗೊಂಡಿದ್ದಾರೆ ಎಂದು ಶ್ರೀವಿದ್ಯಾ ಮಾಹಿತಿ ನೀಡಿದರು.

ಹೆಚ್ಚುವರಿ ಜಿಲ್ಲಾಧಿಕಾರಿ ಪ್ರವೀಣ್‌ ಕುಮಾರ್‌ ಹಾಜರಿದ್ದರು.