ಸಂಪಾಜೆಯಲ್ಲಿ 10 ಸೆಂ.ಮೀ ಮಳೆ

ಮಡಿಕೇರಿ: ಕೊಡಗು ಜಿಲ್ಲೆಯಲ್ಲಿ ಗುರುವಾರ ಬಿರುಸಿನ ಮಳೆ ಮುಂದುವರಿದಿದೆ. ಸಂಪಾಜೆಯಲ್ಲಿ ಕಳೆದ 12 ಗಂಟೆಗಳ ಅವಧಿಯಲ್ಲಿ 10 ಸೆಂ.ಮೀಗೂ ಅಧಿಕ ಮಳೆ ಸುರಿದಿದೆ. ಪೆರಾಜೆಯಲ್ಲಿ 8, ಭಾಗಮಂಡಲ ಹಾಗೂ ಕರಿಕೆಯಲ್ಲಿ 7 ಸೆಂ.ಮೀ ಮಳೆಯಾಗಿದೆ. ಜಿಲ್ಲೆಯ ಬಹತೇಕ ಎಲ್ಲ ಭಾಗಗಳಲ್ಲಿ ಧಾರಾಕಾರ ಮಳೆ ಮುಂದುವರಿದಿದೆ. ಗಾಳಿಯು ರಭಸದಿಂದ ಬೀಸುತ್ತಿದೆ.

ಉಳಿದಂತೆ, ಗಾಳಿಬೀಡು ಹಾಗೂ ಚೆಂಬುವಿನಲ್ಲಿ 6, ಬೆಲ್ಲಮಾವಟಿಯಲ್ಲಿ 5, ವಿರಾಜಪೇಟೆ, ಎಮ್ಮೆಮಾಡು, ಬಿಟ್ಟಂಗಲ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ 4, ಸೋಮವಾರಪೇಟೆಯಲ್ಲಿ 3 ಸೆಂ.ಮೀ ಮಳೆಯಾಗಿದೆ.

ಮುಂದಿನ 24 ಗಂಟೆಗಳ ಅವಧಿಯಲ್ಲಿ ಸಾಮಾನ್ಯಕ್ಕಿಂತಲೂ ಅಧಿಕ ಮಳೆಯಾಗುವ ಸಾಧ್ಯತೆ ಇದೆ ಎಂದು ಕರ್ನಾಟಕ ರಾಜ್ಯ ನೈಸರ್ಗಿಕ ವಿಪತ್ತು ಉಸ್ತವಾರಿ ಕೇಂದ್ರ ತಿಳಿಸಿದೆ.