ಮಡಿಕೇರಿ ದಸರೆ | ಕಾರ್ಯಕ್ರಮಗಳು ವಿಳಂಬ

ಮಡಿಕೇರಿ: ಮಡಿಕೇರಿ ದಸರೆಯ ಆಕರ್ಷಣೆಗಳಲ್ಲಿ ಒಂದಾದ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಸಮಯ ಪಾಲನೆ ಎಂಬುದು ಮರೀಚಿಕೆಯಾಗಿದ್ದು, ಈ ಇತಿಹಾಸ ಈಗಲೂ ಮುಂದುವರಿದಿದೆ.

ಇಲ್ಲಿನ ಗಾಂಧಿ ಮೈದಾನದಲ್ಲಿ ನಡೆಯುತ್ತಿರುವ ಪ್ರಸಕ್ತ ಸಾಲಿನ ದಸರಾ ಸಾಂಸ್ಕೃತಿಕ ಕಾರ್ಯಕ್ರಮಗಳ ಉದ್ಘಾಟನಾ ಕಾರ್ಯಕ್ರಮ ಹಾಗೂ ಗೋಣಿಕೊಪ್ಪಲಿನ ದಸರಾ ಸಾಂಸ್ಕೃತಿಕ ಕಾರ್ಯಕ್ರಮಗಳೂ ತಡವಾಗಿ ಪ್ರೇಕ್ಷಕರಿಗೆ ಅಸಮಾಧಾನ ತರಿಸಿತು. ದೂರದ ಊರುಗಳಿಂದ ಬಂದಿದ್ದ ಕಲಾವಿದರೂ ಕಾದು ಕಾದು ಬಸವಳಿದರು.

ವೇದಿಕೆ ಕಾರ್ಯಕ್ರಮಕ್ಕೂ ಮುನ್ನವೇ ನಿಗದಿತ ಸಮಯಕ್ಕೆ ಸರಿಯಾಗಿ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಆರಂಭಿಸಿದರೆ ನಿಶ್ಚಿತವಾಗಿಯೂ ಪ್ರೇಕ್ಷಕರು ಮೈದಾನದತ್ತ ಬರುತ್ತಾರೆ. ಆದರೆ, ವೇದಿಕೆ ಕಾರ್ಯಕ್ರಮವೇ ಮೊದಲು ಆರಂಭವಾಗಿ ನಾಲ್ಕಾರು ಮಂದಿಗೆ ಮಾತನಾಡಲು ಅವಕಾಶ ಕೊಟ್ಟರೆ ಪ್ರೇಕ್ಷಕರು ಬರುವುದೇ ಇಲ್ಲ.

ಮಡಿಕೇರಿ ದಸರಾ ಸಾಂಸ್ಕೃತಿಕ ಕಾರ್ಯಕ್ರಮ ಆರಂಭವಾದ ಮೊದಲ ದಿನವಾದ ಮಂಗಳವಾರ ಕಾರ್ಯಕ್ರಮ ಆರಂಭವಾಗುವಷ್ಟರಲ್ಲಿ 7.30 ದಾಟಿತ್ತು. ಸ್ವಾಗತ, ಭಾಷಣಗಳು ಮುಗಿದ ಬಳಿಕ ಕಾರ್ಯಕ್ರಮಗಳು ಆರಂಭವಾದವು.

ಸಾಕಷ್ಟು ಪ್ರಚಾರದ ಕೊರತೆ ಇದ್ದುದ್ದರಿಂದ ಮೊದಲ ದಿನ ಪ್ರೇಕ್ಷಕರಿಲ್ಲದೇ ಮೈದಾನ ಬಣಗುಡುತ್ತಿತ್ತು. ಎಲ್ಲೆಲ್ಲೂ ಖಾಲಿ ಕುರ್ಚಿಗಳೇ ಕಂಡು ಬಂದವು. ಸಾಂಸ್ಕೃತಿಕ ಕಾರ್ಯಕ್ರಮಗಳು  ಆರಂಭವಾದ ನಂತರ ಒಂದಷ್ಟು ಸಂಖ್ಯೆಯಲ್ಲಿ ಜನರು ಬಂದರು. ಇನ್ನಾದರೂ, ನಿಗದಿತ ಸಮಯಕ್ಕೆ ಕಾರ್ಯಕ್ರಮಗಳನ್ನು ಆರಂಭಿಸುವ ಸಮಯ ಪಾಲನೆ ದಸರಾ ಕಾರ್ಯಕ್ರಮಗಳಲ್ಲಿ ಆಗಬೇಕಿದೆ.

ನಿಗದಿತ ಸಮಯಕ್ಕೆ ಕಾರ್ಯಕ್ರಮ ಆರಂಭಿಸುವುದು ಯಾವಾಗ? ಸಭಿಕರಿಂದ ವ್ಯಕ್ತವಾಗುತ್ತಿದೆ ಅಸಮಾಧಾನ ಕಾರ್ಯಕ್ರಮ ನಿರ್ವಹಣೆಯಲ್ಲಿ ಬೇಕಿದೆ ಸುಧಾರಣೆ