ಕುಶಾಲನಗರ: ಪ್ರಯಾಣಿಕರ ಬ್ಯಾಗ್‌ನಿಂದ ₹ 2.5 ಲಕ್ಷ ಕಳ್ಳತನ

ಕುಶಾಲನಗರ: ಪಟ್ಟಣದ ಸರ್ಕಾರಿ ಬಸ್ ನಿಲ್ದಾಣದಲ್ಲಿ ಗುರುವಾರ ರಾತ್ರಿ ಬಸ್‌ಗಾಗಿ ಕಾಯುತ್ತಿದ್ದ ಪ್ರಯಾಣಿಕರೊಬ್ಬರ ಬ್ಯಾಗ್‌ನಿಂದ ₹2.5 ಲಕ್ಷ ನಗದು ಕಳ್ಳತನವಾಗಿದೆ.

ಪಿರಿಯಾಪಟ್ಟಣ ತಾಲ್ಲೂಕಿನ ಚಿಕ್ಕಕಮರಹಳ್ಳಿ ನಿವಾಸಿ ಸೋಮಶೇಖರ ಅವರು ಮೈಸೂರಿನ ಸಂಬಂಧಿಕರಿಗೆ ಮದುವೆ ಕಾರ್ಯಕ್ಕೆ ಹಣ ನೀಡಲು ಹೋಗುತ್ತಿದ್ದರು. ಕುಶಾಲನಗರ ಬಸ್ ನಿಲ್ದಾಣದಲ್ಲಿ ಬ್ಯಾಗ್ ಸಮೇತ ಬಸ್‌ಗಾಗಿ ಕಾಯುತ್ತಿದ್ದ ವೇಳೆ ಕಳ್ಳರು ಬ್ಯಾಗ್ ಅನ್ನು ಬ್ಲೇಡ್‌ನಿಂದ ಕತ್ತರಿಸಿ ₹2.5 ಲಕ್ಷ ದೋಚಿ ಪರಾರಿಯಾಗಿದ್ದಾರೆ.

ಸೋಮಶೇಖರ್ ಪಟ್ಟಣದ ಬ್ಯಾಂಕ್‌ನಿಂದ ₹9.5 ಲಕ್ಷ ಮತ್ತು ಮನೆಯಲ್ಲಿದ್ದ ₹50 ಸಾವಿರ ಸೇರಿ ಒಟ್ಟು ₹ 10 ಲಕ್ಷ ಹಣ ತೆಗೆದುಕೊಂಡು ಹೋಗುತ್ತಿದ್ದರು. ಬ್ಯಾಗ್‌ನಲ್ಲಿ ಬಾಕಿ ₹7.5 ಲಕ್ಷ ಉಳಿದಿದ್ದು, ₹2.5 ಲಕ್ಷ ಕಳವಾದ ಬಗ್ಗೆ ಟೌನ್ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ಬಸ್ ನಿಲ್ದಾಣದ ಸಿಸಿ ಟಿವಿ ಕ್ಯಾಮೆರಾ ಪರಿಶೀಲನೆ ನಡೆಸುತ್ತಿದ್ದು, ಆರೋಪಿ ಪತ್ತೆಗೆ ಕ್ರಮ ಕೈಗೊಂಡಿದ್ದಾರೆ.