ಮಡಿಕೇರಿ | ಅಬ್ಬಿ ಜಲಪಾತ; ಅಭಿವೃದ್ಧಿ ಯಾವಾಗ?

ಮಡಿಕೇರಿ: ಈಗಲೋ, ಆಗಲೋ ಬೀಳುವ ಸ್ಥಿತಿಯಲ್ಲಿರುವ ಶಿಥಿಲ ಸೇತುವೆ, ಮೆಟ್ಟಿಲು ಹತ್ತಲೂ ಭಯವಾಗುವ ಮುರಿದ ವಾಚ್‌ ಟವರ್, ನಡೆಯುವ ಹಾದಿಯಲ್ಲಿ ಕಿತ್ತು ಬಂದ ತಂತಿ ಬೇಲಿ... ಇವೆಲ್ಲವೂ ವಿಶ್ವ ಪ್ರಸಿದ್ಧ ಪ್ರವಾಸಿ ಸ್ಥಳ ಕೊಡಗಿನಲ್ಲಿ ಹೆಚ್ಚು ಮಂದಿ ಭೇಟಿ ನೀಡಿ ವೀಕ್ಷಿಸುವ ಅಬ್ಬಿ ಫಾಲ್ಸ್‌ ಸ್ಥಿತಿ.

ಈ ಜಲಪಾತದ ನಿರ್ವಹಣೆಯನ್ನು ಪ್ರವಾಸೋದ್ಯಮ ಇಲಾಖೆಯು 2023ರಲ್ಲೇ ಕೆ.ನಿಡುಗಣೆ ಗ್ರಾಮ ಪಂಚಾಯಿತಿಗೆ ಹಸ್ತಾಂತರಿಸಿದೆ. ಗ್ರಾಮ ಪಂಚಾಯಿತಿಯೂ ಇಲ್ಲಿಗೆ ಬರುವ ಪ್ರತಿ ಪ್ರವಾಸಿಗರಿಂದ ₹ 10 ಟಿಕೆಟ್ ದರ ಸಂಗ್ರಹಿಸುತ್ತಿದೆ. ಆದಾಗ್ಯೂ, ಅಭಿವೃದ್ಧಿ ಎನ್ನುವುದು ಮರೀಚಿಕೆ ಎನಿಸಿದೆ.

ಕರಿ ಬಂಡೆಗಳ ಮೇಲಿನಿಂದ ಹಾಲ್ನೊರೆಯಂತೆ ಧುಮ್ಮಿಕ್ಕುವ ಜಲಧಾರೆಯ ನೋಡಲು ಇಲ್ಲಿ ಎರಡು ಕಣ್ಣುಗಳೇ ಸಾಲುವುದಿಲ್ಲ. ಬಂಡೆಗಲ್ಲುಗಳೇ ಕಾಣದಂತೆ ಮಳೆಗಾಲದಲ್ಲಿ ಪ್ರವಾಹದಂತೆ ಭೋರ್ಗರೆಯುವ ಕೆಂಬಣ್ಣದ ಈ ಜಲಪಾತ, ಮಳೆಗಾಲ ಮುಗಿಯುತ್ತಿದ್ದಂತೆ ಶಾಂತವಾಗುತ್ತಾ ಬರುತ್ತದೆ. ಚಳಿಗಾಲದಲ್ಲಿ ಶಾಂತ ಚಿತ್ತದಿ ಹರಿಯುವ ಹಾಲ್ನೊರೆಯಂತೆ ಕಂಡರೆ, ಬೇಸಿಗೆಯಲ್ಲಿ ಮತ್ತಷ್ಟು ಕಿರಿದಾದರೂ ಸೌಂದರ್ಯ ಕ್ಷೀಣಿಸದೇ ಇರುವುದು ಇಲ್ಲಿನ ವಿಶೇಷ.

ಮಡಿಕೇರಿ ಎಂದಾಕ್ಷಣ ಹೊರ ಜಿಲ್ಲೆಯ ಪ್ರವಾಸಿಗರಿಗೆ ನೆನಪಾಗುವುದು ಇಲ್ಲಿನ ರಾಜಾಸೀಟು, ಅಬ್ಬಿಫಾಲ್ಸ್. ಮಡಿಕೇರಿ ಬರುವ ಪ್ರತಿ ಪ್ರವಾಸಿಗರೂ ಇಲ್ಲಿಗೆ ಭೇಟಿ ನೀಡೇ ತೆರಳುತ್ತಾರೆ ಎನ್ನುವಷ್ಟು ಇದು ಜನಜನಿತ. ಆದರೆ, ಇಂತಹದ್ದೊಂದು ಮಹತ್ವ ಜಲಪಾತದ ಕುರಿತು ಜನಪ್ರತಿನಿಧಿಗಳು, ಅಧಿಕಾರಿಗಳು ತೀವ್ರ ನಿರ್ಲಕ್ಷ್ಯ ಧೋರಣೆ ತಳೆದಿದ್ದಾರೆ ಎಂದೇ ಇಲ್ಲಿಗೆ ಬರುವ ಪ್ರವಾಸಿಗರು ಅಭಿಪ್ರಾಯಪಡುತ್ತಾರೆ.

ಇಲ್ಲಿಗೆ ಬರುವ ಪ್ರವಾಸಿಗರಿಂದ ಸಂಗ್ರಹಿಸುವ ಟಿಕೆಟ್ ದರದಿಂದ ಗ್ರಾಮ ಪಂಚಾಯಿತಿಗೆ ಆದಾಯವಿದೆ. ಆದರೂ, 2023ರಿಂದಲೂ ಏಕೆ ಈ ದಿವ್ಯ ಮೌನ ಎಂಬುದು ಅರ್ಥವಾಗುತ್ತಿಲ್ಲ. ಹೋಗಲಿ, ಅದಕ್ಕೂ ಹಿಂದೆ ಪ್ರವಾಸೋದ್ಯಮ ಇಲಾಖೆಯಾದರೂ ಏಕೆ ಅಭಿವೃದ್ಧಿ ಮಾಡಲಿಲ್ಲ. ಕನಿಷ್ಠ ಮುರಿದು ತೂಗುತ್ತಿರುವ ಸೇತುವೆಯನ್ನು ತೆರವುಗೊಳಿಸಿ, ವಾಚ್‌ ಟವರ್‌ ಅನ್ನು ದುರಸ್ತಿ ಮಾಡಲೂ ಕಷ್ಟವೇ ಎಂಬುದು ಪ್ರವಾಸಿಗರ ಪ್ರಶ್ನೆ.

ಹೊಸ ಸೇತುವೆ ನಿರ್ಮಿಸುವುದು, ಹೊಸ ವಾಚ್ ಟವರ್ ನಿರ್ಮಿಸುವುದು ಬೇಡ. ಕನಿಷ್ಠ ದುರಸ್ತಿಗೊಳಿಸಿ, ಆಗದಿದ್ದರೆ ತೆರವುಗೊಳಿಸಿ ಜಲರಾಶಿಯ ಸೌಂದರ್ಯವನ್ನು ಸವಿಯಲು ಬಿಡಿ ಎನ್ನುವುದು ಅವರ ಮನವಿ.