ಕೊಡಗು: ಅಬ್ಬರದ ಡಿ.ಜೆ ಶಬ್ದಕ್ಕೆ ಬೀಳುವುದೇ ಅಂಕುಶ?

ಮಡಿಕೇರಿ: ಕೊಡಗಿನಲ್ಲಿ ಅಬ್ಬರದ ಡಿ.ಜೆ ಧ್ವನಿವರ್ಧಕಗಳಿಂದ ಇಲ್ಲಿನ ವಯೋವೃದ್ಧರು, ರೋಗಿಗಳು, ಗರ್ಭಿಣಿಯರು ಮಾತ್ರವಲ್ಲ ಆಗತಾನೆ ಜನಿಸಿದ ಶಿಶುಗಳೂ ಸಹ ಹೈರಣಾಗುತ್ತಿದ್ದಾರೆ. ಮಿತಿ ಮೀರಿದ ಶಬ್ದದಿಂದ ಬಳಲುತ್ತಾರೆ. ಈಗ ಜಿಲ್ಲೆಯಲ್ಲಿ ಈ ಅಬ್ಬರದ ಡಿ.ಜೆ. ವಿರುದ್ಧ ಗಟ್ಟಿಯಾದ ಧ್ವನಿಗಳು ಮೊಳಗಳಾರಂಭಿಸಿವೆ.

ಪ್ರಧಾನವಾಗಿ ಇಲ್ಲಿನ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕೆ.ರಾಮರಾಜನ್ ಅವರೇ ಮುಂದಾಳತ್ವ ವಹಿಸಿ ಇದರ ವಿರುದ್ಧ ಜನಜಾಗೃತಿ ಅಭಿಯಾನಕ್ಕೆ ಇಳಿದಿದ್ದಾರೆ. ಮಾತ್ರವಲ್ಲ, ನಿಯಮ ಮೀರಿದರೆ ಪ್ರಕರಣ ದಾಖಲಿಸುವ ಖಡಕ್ ಎಚ್ಚರಿಕೆಯನ್ನು ಹಬ್ಬಕ್ಕೆ ಸಾಕಷ್ಟು ಮುಂಚಿತವಾಗಿಯೇ ನೀಡಿದ್ದಾರೆ.

ಇದಕ್ಕೂ ಮುನ್ನ ಕಳೆದೆರಡು ವರ್ಷಗಳ ಹಿಂದೆ ಹಿರಿಯ ವಕೀಲರಾದ ಅಮೃತೇಶ್ ಸಹ ಹೈಕೋರ್ಟ್‌ನಲ್ಲಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿ ಅಬ್ಬರದ ಡಿ.ಜೆ ಧ್ವನಿವರ್ಧಕಕ್ಕೆ ಕಡಿವಾಣ ಹಾಕಲು ಪ್ರಯತ್ನ ನಡೆಸಿದ್ದರು.

ಡಿ.ಜೆ ಅಥವಾ ಅಧಿಕ ಡೆಸಿಬಲ್ಸ್‌ ಶಬ್ದವನ್ನು ಹೊರಹೊಮ್ಮಿಸುವ ಧ್ವನಿವರ್ಧಕದಿಂದ ಉಂಟಾಗುವ ಹಾನಿ ಅಷ್ಟಿಷ್ಟಲ್ಲ. ಇಂತಹ ಶಬ್ದವನ್ನು ಕೇಳಲಾರದೇ ಬಹಳಷ್ಟು ಮಂದಿ ಉತ್ಸವದ ದಿನ ಊರು ತೊರೆದು ಹೋಗುತ್ತಾರೆ. ಗರ್ಭಿಣಿಯರು, ಬಾಣಂತಿಯರ ಸ್ಥಿತಿಯಂತೂ ಹೇಳತೀರದಾಗಿದೆ. ವಯೋವೃದ್ಧರು, ಅಧಿಕ ರಕ್ತದೊತ್ತಡ, ಹೃದಯದ ಸಮಸ್ಯೆ ಉಳ್ಳವರಂತೂ ಈ ಭಯಂಕರ ಶಬ್ದದಿಂದ ತಮ್ಮನ್ನು ರಕ್ಷಿಸಿಕೊಳ್ಳಲು ಇನ್ನಿಲ್ಲದ ಕಸರತ್ತು ನಡೆಸುತ್ತಾರೆ. ವಿಪರೀತವಾಗಿ ಚಡಪಡಿಸುತ್ತಾರೆ.

ನಾಯಿಗಳು ಸಹ ಈ ಶಬ್ದಕ್ಕೆ ಅಂಜಿ ಬಹುದೂರ ಓಡಿ ಹೋಗುತ್ತವೆ. ಆಸ್ಪತ್ರೆಗಳ ರೋಗಿಗಳೂ ಕಂಗಾಲಾಗುತ್ತಾರೆ. ಹೋಟೆಲ್‌ಗಳಿಂದ ಪ್ರವಾಸಿಗರು ರೂಮ್‌ಗಳನ್ನು ಖಾಲಿ ಮಾಡಿ ಕೆಟ್ಟ ರಿವ್ಯೂವ್‌ ನೀಡಿದ ಉದಾಹರಣೆಗಳೂ ಇವೆ. ಜನರ ಆರೋಗ್ಯಕ್ಕೆ, ಪ್ರವಾಸೋದ್ಯಮಕ್ಕೆ ತೊಂದರೆ ಮಾಡುವ ಇಂತಹ ಅಬ್ಬರದ ಡಿ.ಜೆ. ನಮಗೆ ಬೇಕೇ ಎಂಬ ಪ್ರಶ್ನೆ ಈಗ ಎದುರಾಗಿದೆ.

ಡಿ.ಜೆ. ಈ ನೆಲದ ಸಂಸ್ಕೃತಿ ಅಲ್ಲ

ಡಿ.ಜೆ ಹಾಗೂ ಅಬ್ಬರದ ಸಂಗೀತ ಈ ನೆಲದ ಸಂಸ್ಕೃತಿ ಅಲ್ಲ ಎಂಬ ಅಭಿಪ್ರಾಯ ಬಹುತೇಕ ಸಂಸ್ಕೃತಿ ಚಿಂತಕರದ್ದಾಗಿದೆ. ಮೈಸೂರಿನಲ್ಲಿ ಗಣೇಶೋತ್ಸವ ಹಾಗೂ ದಸರೆ ವೇಳೆ ಕರ್ನಾಟಕ ಶಾಸ್ತ್ರೀಯ ಸಂಗೀತ, ಹಿಂದೂಸ್ಥಾನಿ ಸಂಗೀತ ಕಛೇರಿಗಳು, ಭಜನೆಗಳು ನಡೆಯುತ್ತವೆ. ಆದರೆ, ಕೊಡಗಿನಲ್ಲಿ ಇಂತಹ ಸಾಂಸ್ಕೃತಿಕ ಕಾರ್ಯಕ್ರಮಗಳ ಬದಲಿಗೆ ಅ‌ಬ್ಬರದ ಡಿ.ಜೆ. ಮೊಳಗುತ್ತದೆ ಎಂದು ಬಹುತೇಕರು ಅಸಮಾಧಾನ ವ್ಯಕ್ತಪಡಿಸುತ್ತಾರೆ.

ಹಬ್ಬಗಳ ಸಮಯದಲ್ಲಿ ಈ ನೆಲದ ಸಂಸ್ಕೃತಿ ಬಿತ್ತರಗೊಳ್ಳಬೇಕು. ಇಲ್ಲಿನ ಜನಪದ ವಾದ್ಯಗಳು, ಸಂಗೀತ ಮುನ್ನೆಲೆಗೆ ಬರಬೇಕಿದೆ. ಆದರೆ, ಈಗ ಅಂತಹ ಕಾರ್ಯಕ್ರಮಗಳು ಆಯೋಜನೆಗೊಳ್ಳುತ್ತಿಲ್ಲ.

ಹಿಂದೆ ಹಿರಿಯರಲ್ಲಿ ಅಧಿಕ, ಈಗ ಯುವಕರಲ್ಲಿ ಹೆಚ್ಚು!

ಶ್ರವಣ ಸಮಸ್ಯೆಯಿಂದ ಬಳಲುವವರಲ್ಲಿ ಹಿಂದೆ ಹಿರಿಯರೇ ಅಧಿಕ ಇದ್ದರು. ಆದರೆ, ಇತ್ತೀಚಿನ ವರ್ಷಗಳಲ್ಲಿ ಮಕ್ಕಳು ಹಾಗೂ ಯುವ ತಲೆಮಾರು, ಮಧ್ಯವಯಸ್ಕರಲ್ಲೇ ಹೆಚ್ಚು ಶ್ರವಣ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತಿವೆ. ಇವುಗಳಿಗೆ ಮುಖ್ಯವಾಗಿ ಹೆಚ್ಚು ಡೆಸಿಬಲ್ಸ್ ಇರುವ ಶಬ್ದ ಕೇಳುವುದೇ ಕಾರಣ ಎನಿಸಿದೆ ಎಂದು ಇಲ್ಲಿನ ಕೊಡಗು ವೈದ್ಯಕೀಯ ವಿಶ್ವವಿದ್ಯಾಲಯದ ಬೋಧಕ ಆಸ್ಪತ್ರೆ (ಜಿಲ್ಲಾಸ್ಪ‍ತ್ರೆ)ಯ ಕಿವಿ, ಗಂಟಲು ಮತ್ತು ಮೂಗು ವಿಭಾಗದ ಮುಖ್ಯಸ್ಥೆ ಡಾ.ಶ್ವೇತಾ ‘ಪ್ರಜಾವಾಣಿ’ಗೆ ತಿಳಿಸಿದರು.

ಪ್ರೆಷರ್‌ ಮೀಟರ್‌ಗಳ ಬಳಕೆ ಅಪಾಯಕಾರಿ

ಈಚೆಗೆ ನಡೆದ ಸಭೆಯಲ್ಲಿ ಮಾತನಾಡಿದ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕೆ.ರಾಮರಾಜನ್ ಮಾತನಾಡಿ, ‘ಡಿ.ಜೆ. ಧ್ವನಿವರ್ಧಕಗಳಲ್ಲಿರುವ ಪ್ರೆಷರ್ ಮೀಟರ್ ತೀರಾ ಅಪಾಯಕಾರಿ. ಇದರಿಂದ ಹೊರಬರುವ ಅಬ್ಬರದ ಶಬ್ದದಿಂದ ಆಸ್ಪತ್ರೆಯೊಳಗೆ ಮಲಗಿರುವ ರೋಗಿಗಳಿಗೂ ನಿದ್ದೆ ಬರುವುದಿಲ್ಲ. ಅವರ ಆರೋಗ್ಯ ಇನ್ನಷ್ಟು ಹದಗೆಡುತ್ತದೆ ಎಂಬುದನ್ನು ಮರೆಯಬಾರದು ಎಂದು ತಿಳಿಸಿದರು.

ಈಗ ಪೊಲೀಸರು ಸಮಾಜದ ವಿವಿಧ ಕ್ಷೇತ್ರಗಳ ಚಿಂತಕರಿಂದ ಡಿ.ಜೆ ಧ್ವನಿವರ್ಧಕದ ವಿರುದ್ಧ ವಿಡಿಯೊ ಸಂದೇಶಗಳನ್ನು ಮಾಡಿಸಿ, ಅವುಗಳ ತುಣುಕನ್ನು ಸಾಮಾಜಿಕ ಮಾಧ್ಯಮಗಳಲ್ಲಿ ಹಾಕುವ ಮೂಲಕ ಜನಜಾಗೃತಿ ಮೂಡಿಸುತ್ತಿದ್ದಾರೆ.