ಕುಷ್ಟಗಿ: ಕೃಷ್ಣೆ ಉಕ್ಕಿದರೂ ಕೆರೆಗಳಿಗಿಲ್ಲ ‘ಜಲಭಾಗ್ಯ’

ಕುಷ್ಟಗಿ: ಕೃಷ್ಣಾ ನದಿ ಉಕ್ಕಿ ಹರಿದರೆ ಬರ ಪೀಡಿತ ಕೊಪ್ಪಳ ಜಿಲ್ಲೆಯ ಕೆರೆಗಳಿಗೆ ಜೀವಕಳೆ. ಸದ್ಯ ಕೃಷ್ಣಾ ನದಿ ಉಕ್ಕಿ ಹರಿಯುತ್ತಿದೆ. ಆದರೂ ಕೃಷ್ಣಾ ಭಾಗ್ಯ ಜಲನಿಗಮ ಹಾಗೂ ಗುತ್ತಿಗೆದಾರರ ನಿರ್ಲಕ್ಷ್ಯದಿಂದಾಗಿ ತಾಲ್ಲೂಕಿನ ಕೆರೆಗಳಿಗೆ ನೀರು ತುಂಬುವ ಭಾಗ್ಯ ಇಲ್ಲದಂತಾಗಿದೆ.

ಹೆಚ್ಚುವರಿ ನೀರು ಲಭ್ಯವಾದಾಗ ಅದನ್ನು ಬರಪೀಡಿತ ತಾಲ್ಲೂಕುಗಳ ಕೆರೆಗಳಿಗೆ ಹರಿಸುವ ಮೂಲಕ ಅಂತರ್ಜಲ ಹೆಚ್ಚಿಸುವ ಉದ್ದೇಶದಿಂದ ಕೃಷ್ಣಾ ಭಾಗ್ಯ ಜಲ ನಿಗಮ ಕೆರೆ ತುಂಬಿಸುವ ಯೋಜನೆ ಕೈಗೆತ್ತಿಕೊಂಡಿದ್ದು, ಕಾಮಗಾರಿ ಬಹುತೇಕ ಪೂರ್ಣಗೊಂಡಿದೆ. ತಾಲ್ಲೂಕಿನ 18 ಹಾಗೂ ಯಲಬುರ್ಗಾ, ಕನಕಗಿರಿ ತಾಲ್ಲೂಕುಗಳ ಅನೇಕ ಕೆರೆಗಳೂ ಈ ಯೋಜನೆಯ ವ್ಯಾಪ್ತಿಯಲ್ಲಿವೆ.

ರಾಜ್ಯದ ಉತ್ತರದ ಜಿಲ್ಲೆಗಳು ಹಾಗೂ ಮಹಾರಾಷ್ಟ್ರದಲ್ಲಿ ಅತಿವೃಷ್ಠಿಯಿಂದ ಕೃಷ್ಣಾ ನದಿಗೆ ಪ್ರವಾಹ ಬಂದರೂ ನೀರಿಲ್ಲದೇ ಕೆರೆಗಳು ಭಣಗುಡುತ್ತಿವೆ. ಕೆರೆ ತುಂಬಿಸುವ ಯೋಜನೆ ಈ ಭಾಗಕ್ಕೆ ವರದಾನವಾಗುವಂತಿದ್ದರೂ ಸಂಬಂಧಿಸಿದವರ ದೂರದೃಷ್ಟಿ ಕೊರತೆಯಿಂದಾಗಿ 'ದೇವರು ವರ ಕೊಟ್ಟರು ಪೂಜಾರಿ ಕೊಡಲೊಲ್ಲ' ಎಂಬಂತಾಗಿದೆ ನಮ್ಮ ಸ್ಥಿತಿ ಎಂಬ ಅಸಮಾಧಾನ ಇಲ್ಲಿಯ ರೈತರದ್ದು.

ಕುಷ್ಟಗಿ ತಾಲ್ಲೂಕಿನ 18 ಕೆರೆಗಳ ಪೈಕಿ 11 ಕೆರೆಗಳು ಕೃಷ್ಣಾ ಭಾಗ್ಯ ಜಲನಿಗಮದ ಇಳಕಲ್‌ ಉಪ ವಿಭಾಗಕ್ಕೆ ಮತ್ತು ಉಳಿದ 7 ಕೆರೆಗಳು ಕುಷ್ಟಗಿ ಉಪ ವಿಭಾಗಕ್ಕೆ ಸೇರಿವೆ. ಈ ಹಿಂದೆ ಬಿರು ಬೇಸಿಗೆಯಲ್ಲೂ ಒಂದೆರಡು ಬಾರಿ ಕೆರೆಗಳಿಗೆ ನೀರು ತುಂಬಿಸಲಾಗಿತ್ತು. ಈಗ ನದಿಯಲ್ಲಿ ನೀರಿದ್ದರೂ ಕೆರೆಗಳಿಗೆ ನೀರು ಹರಿಸಲು ಸರ್ಕಾರ ಕ್ರಮ ಕೈಗೊಳ್ಳುತ್ತಿಲ್ಲ ಎಂದೆ ಇಲ್ಲಿಯ ಜನರು ಕೊರಗುತ್ತಿದ್ದಾರೆ.

ಈ ಕುರಿತು 'ಪ್ರಜಾವಾಣಿ'ಗೆ ವಿವರಿಸಿದ ಇಳಕಲ್‌ ಉಪ ವಿಭಾಗದ ಎಇಇ ಅಮರೇಗೌಡ ಪಾಟೀಲ, ನದಿಯಲ್ಲಿ ಸಾಕಷ್ಟು ನೀರಿದೆ. ನದಿ ಬಳಿ ಇರುವ ಜಾಕ್‌ವೆಲ್‌ದಲ್ಲಿ 9000 ಅಶ್ವಶಕ್ತಿಯ 7 ಮೋಟರ್‌ಗಳು ಮತ್ತು ಬಲಕುಂದಿ ಬಳಿ 6000 ಅಶ್ವಶಕ್ತಿಯ 7 ಮೋಟರ್‌ಗಳು ಸಿದ್ಧವಾಗಿವೆ. ಕೇವಲ ಎರಡು ಮೋಟರ್‌ಗಳನ್ನು ಚಾಲೂ ಮಾಡಿದರೆ ಸಾಕಷ್ಟು ನೀರು ಕೆರೆ ತಲುಪುತ್ತದೆ. ಆದರೆ ಗುತ್ತಿಗೆದಾರ ಜಮೀನು ಹಾಳಾಗಿರುವ ರೈತರಿಗೆ ಪರಿಹಾರ ಬಾಕಿ ಮೊತ್ತ ಪಾವತಿಸದ ಕಾರಣ ನೀರು ಹರಿಸಲು ಸಾಧ್ಯವಾಗಿಲ್ಲ ಎಂದು ವಿವರಿಸಿದರು.

’ಕಲಾಲಬಂಡಿ ಚೇಂಬರ್‌ಗೆ ನೀರು ಬಂದರೆ ಮಾತ್ರ ಕುಷ್ಟಗಿ ಉಪವಿಭಾಗದ ಉಳಿದ ಕೆರೆಗಳಿಗೆ ನೀರು ಹರಿಸಲು ಸಾಧ್ಯ’ ಎಂದು ಕುಷ್ಟಗಿ ಉಪ ವಿಭಾಗದ ಎಇಇ ರಮೇಶ್‌ ಸ್ಪಷ್ಟಪಡಿಸಿದರು.