ನನ್ನ ಬಳಿಯೇ ಲಂಚ ಕೇಳಿದ್ದಾರೆ: ಶಾಸಕ ಮಧು ಮಾದೇಗೌಡ ಆರೋಪ

ಮದ್ದೂರು: ‘ರಾಜ್ಯ ಸರ್ಕಾರದಲ್ಲಿ ಶಾಸಕರದ್ದಾಗಲೀ ವಿಧಾನ ಪರಿಷತ್‌ ಸದಸ್ಯರದ್ದಾಗಲೀ ಲಂಚ ಕೊಟ್ಟರೆ ಮಾತ್ರ ಕೆಲಸಗಳು ಆಗುತ್ತವೆ. ನನ್ನ ಬಳಿಯೇ ಲಂಚ ಕೇಳಿದ್ದಾರೆ’ ಎಂದು ವಿಧಾನ ಪರಿಷತ್‌ ಸದಸ್ಯ ಮಧು ಜಿ.ಮಾದೇಗೌಡ ಆರೋಪಿಸಿದರು.

ಪಟ್ಟಣದ ತಾಲ್ಲೂಕು ಬ್ಲಾಕ್ ಕಾಂಗ್ರೆಸ್ ಕಚೇರಿಯಲ್ಲಿ ಮಂಗಳವಾರ ಎಸ್.ಎಂ.ಶಂಕರ್ ಟ್ರಸ್ಟ್‌ನಿಂದ ತಾಲ್ಲೂಕಿನ ಸವಿತಾ ಸಮಾಜದವರಿಗೆ ಸಲಕರಣೆಗಳ ಕಿಟ್ ನೀಡುವ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

‘ಹಣ ನೀಡಿದರೆ ಮಾತ್ರ ಈ ಸರ್ಕಾರದಲ್ಲಿ, ಸರ್ಕಾರದ ಯಾವುದೇ ಕಚೇರಿಗಳಲ್ಲಿ ಕೆಲಸಗಳು ಆಗುತ್ತವೆ. ನನ್ನ ಬಳಿಯೂ ಲಂಚ ಕೇಳಿದ್ದಾರೆ. ವಿಧಾನಪರಿಷತ್ ಸದಸ್ಯರಲ್ಲೇ ಲಂಚ ಕೇಳಿದರೆ ಸಾಮಾನ್ಯ ಜನರ ಗತಿ ಏನು ಎಂದು ನಿಮಗೆ ಅಚ್ಚರಿಯಾಗಬಹುದು. ಇದರಿಂದಾಗಿಯೇ ರಾಜ್ಯ ಸರ್ಕಾರವನ್ನು 40 ಪರ್ಸೆಂಟ್‌ ಸರ್ಕಾರ ಎಂದು ಹೇಳುವುದು’ ಎಂದು ಅವರು ದೂರಿದರು.