ಶ್ರೀರಂಗಪಟ್ಟಣ: ಪಂಚಾಯಿತಿ ಅಧ್ಯಕ್ಷ ಇಲ್ಲಿ ಗ್ರಾಮ ಸೇವಕ

ಶ್ರೀರಂಗಪಟ್ಟಣ: ಗ್ರಾಮದಲ್ಲಿ ನೀರಿನ ಸಮಸ್ಯೆಯಾದರೆ ಇವರೇ ನೀರುಗಂಟಿ, ಬೀದಿಯಲ್ಲಿ ಕಸ ಕಂಡು ಬಂದರೆ, ಚರಂಡಿಯಲ್ಲಿ ಹೂಳು ತುಂಬಿಕೊಂಡಿದ್ದರೆ ಇವರೇ ಪೌರ ಕಾರ್ಮಿಕ.  ಇವರು ಪೌರ ಕಾರ್ಮಿಕ, ನೀರುಗಂಟಿ ಅಲ್ಲ, ಪಂಚಾಯಿತಿ ಅಧ್ಯಕ್ಷ!

ಪಂಚಾಯಿತಿ ಸದಸ್ಯನಾಗಿ ಆಯ್ಕೆಯಾದರೆ ಸಾಕು ದೊಡ್ಡ ನಾಯಕ ಎನ್ನುವಂತೆ ಓಡಾಡುವವರ ಮಧ್ಯೆ, ಅಧ್ಯಕ್ಷನಾದರೂ ಪಂಚಾಯಿತಿ ನೌಕರನಂತೆ ಕೆಲಸ ಮಾಡುತ್ತಿರುವ ತಾಲ್ಲೂಕಿನ ಅರಕೆರೆ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಎಂ.ಕೆ.ಮಂಜುನಾಥ್‌, ದಿನ ಬೆಳಗಾದರೆ ಬೀದಿ ಕಸ ಗುಡಿಸುವ, ಚರಂಡಿಯ ಕೆಸರು ಬಳಿಯುವ, ಮನೆಗಳಿಗೆ ಕುಡಿಯುವ ನೀರು ಪೂರೈಸುವ ಕಾಯಕ ಮಾಡುತ್ತಿದ್ದಾರೆ.

ಮಂಜುನಾಥ್‌  ಅಧ್ಯಕ್ಷರಾಗಿ 8 ತಿಂಗಳು ಕಳೆದಿದ್ದು, ಆ ಬಳಿಕ, ‘ ಬೀದಿಯಲ್ಲಿ ಕಸ ಚೆಲ್ಲಾಡುತ್ತಿದೆ. ಚರಂಡಿ ಕಟ್ಟಿಕೊಂಡಿದೆ ’ ಎಂದು ಯಾರೊಬ್ಬರೂ ಪಂಚಾಯಿತಿ ಕಚೇರಿಗೆ ದೂರು ನೀಡಿಲ್ಲ. ಪೌರ ಕಾರ್ಮಿಕರು ಇಲ್ಲದಿದ್ದರೆ, ಮಂಜುನಾಥ್‌ ತಾವೇ ಪೊರಕೆ ಹಿಡಿದು ಕಸ ಗುಡಿಸುತ್ತಾರೆ. ಚರಂಡಿಗೆ ಇಳಿದು ಕೆಸರನ್ನೂ ಎತ್ತುತ್ತಾರೆ. ಸಾರ್ವಜನಿಕ ಸ್ಥಳಗಳಲ್ಲಿ ಗಿಡ ಗಂಟಿ ಬೆಳೆದಿದ್ದರೆ ಕಿತ್ತು ಹಸನು ಮಾಡುತ್ತಾರೆ. ತಾನು ಅಧ್ಯಕ್ಷನಲ್ಲ, ಸಮಾಜ ಸೇವಕ ಎಂಬ ಇವರ ಸೇವೆಗೆ ಪಕ್ಷಾತೀತವಾಗಿ ಎಲ್ಲರಿಂದಲೂ ಸೈ ಎನಿಸಿಕೊಂಡಿದ್ದಾರೆ.

ಅವಿವಾಹಿತರಾಗಿರುವ 53 ವರ್ಷದ ಎಂ.ಕೆ. ಮಂಜುನಾಥ್‌ ಮಂಡ್ಯಕೊಪ್ಪಲು ಕ್ಷೇತ್ರದಿಂದ ಮೂರನೇ ಬಾರಿ ಪಂಚಾಯಿತಿ ಸದಸ್ಯರಾಗಿ ಆಯ್ಕೆಯಾಗಿದ್ದಾರೆ. ಈ ಬಾರಿ ಅಧ್ಯಕ್ಷ ಗಾದಿ ಸಿಕ್ಕಿದೆ. ಕೆಲಸ ಮಾಡದ ಮೈಗಳ್ಳತನದ ಮೂವರು ನೀರುಗಂಟಿಗಳನ್ನು ಮುಲಾಜಿಲ್ಲದೆ ಕೆಲಸದಿಂದ ತೆಗೆದು ಹಾಕಿ ಆ ಕೆಲಸವನ್ನು ತಾವೇ ಮಾಡುತ್ತಿದ್ದಾರೆ. ಮೂರು ಗ್ರಾಮಗಳಿಗೆ ಕೇವಲ ನಾಲ್ವರು ಪೌರಕಾರ್ಮಿಕರಿದ್ದಾರೆ.

ಹಾಗಾಗಿ ಅವರ ಜತೆಗೂಡಿ ಇವರೂ ಕಸ ಗುಡಿಸುತ್ತಾರೆ. ಇದು ಉತ್ಪ್ರೇಕ್ಷೆಯಲ್ಲ, ಸತ್ಯ.

ಅರಕೆರೆ, ಮಂಡ್ಯಕೊಪ್ಪಲು ಮತ್ತು ಚಿಂದೇಗೌಡನಕೊಪ್ಪಲು ಗ್ರಾಮಗಳು ಅರಕೆರೆ ಪಂಚಾಯಿತಿ ವ್ಯಾಪ್ತಿಗೆ ಸೇರಲಿದ್ದು, ಈ ಬಾರಿಯ ಬಿರು ಬೇಸಿಗೆಯಲ್ಲೂ ಮೂರೂ ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ತಲೆದೋರದಂತೆ ನೋಡಿಕೊಂಡಿದ್ದಾರೆ. ನೀರಿನ ಸಮಸ್ಯೆ ಬಗ್ಗೆ ಯಾರೇ ದೂರು ತಂದರೂ ಮಂಜುನಾಥ್‌ ತಕ್ಷಣ ಸ್ಥಳಕ್ಕೆ ಧಾವಿಸುತ್ತಾರೆ. ತಾವೇ ನೀರುಗಂಟಿ ಯ ಕೆಲಸ
ಮಾಡುತ್ತಾರೆ.