ಮೈಸೂರು: ಆಗಸದಲ್ಲಿ ರಂಗಿನ ಓಕುಳಿ

ಪ್ರಕೃತಿಯ ಪ್ರತಿಯೊಂದರಲ್ಲಿಯೂ ಚೈತನ್ಯ ಎಂಬುದಿದೆ. ಅದನ್ನು ಗುರುತಿಸುವ ಕಣ್ಣುಗಳಿರಬೇಕಷ್ಟೇ. ಇದಕ್ಕೆ ಸ್ಪಷ್ಟ ಉದಾಹರಣೆ ಎಂದರೆ ಆಗಸ. ನೀಲಿ ಬಣ್ಣದ ಆಕಾಶದಲ್ಲಿ ಮೋಡಗಳು ಸುಮ್ಮನೇ ತೇಲುತ್ತವೆ ಎಂದುಕೊಂಡರೆ ಅದು ತಪ್ಪು. ಆಗಸದಲ್ಲಿ ಇವಿಷ್ಟೇ ಅಲ್ಲ, ಕ್ಷಣ ಕ್ಷಣಕ್ಕೂ ಬದಲಾಗುವ ಬಣ್ಣಗಳನ್ನು ಕಾಣಬಹುದು.

ಈ ಬಣ್ಣಗಳ ಬದಲಾವಣೆ ಸ್ಪಷ್ಟವಾಗಿ ಗೋಚರವಾಗುವುದು ಸಂಜೆಯ ವೇಳೆ. ಸುಮ್ಮನೆ ಮುಸ್ಸಂಜೆ ಹೊತ್ತಿನಲ್ಲಿ ಪಡುವಣದತ್ತ ಮುಖ ಮಾಡಿದರೆ ಪ್ರಕೃತಿಯ ಬಣ್ಣದ ಬದಲಾವಣೆಯ ಅಪೂರ್ವ ಕ್ಷಣವನ್ನು ಕಣ್ತುಂಬಿಕೊಳ್ಳಬಹುದು.

ಹೊಂಬಣ್ಣದ ಜತೆಗೆ ನೇರಳೆ, ಕಿತ್ತಳೆ, ಅರಿಸಿನ... ಹೀಗೆ ನಾನಾ ಬಣ್ಣಗಳು ಕ್ಷಣಕ್ಕೊಂದರಂತೆ ಬದಲಾಗುತ್ತಲೇ ಇರುತ್ತವೆ. ಈ ಸೃಷ್ಟಿ ಚೈತನ್ಯದ ವಿಸ್ಮಯ ಬುಧವಾರ ಸಂಜೆ ಕುಕ್ಕರಹಳ್ಳಿ ಕೆರೆ ಏರಿ ಮೇಲೆ ಕ್ಯಾಮೆರಾ ಕಣ್ಣಿಗೆ ಸೆರೆಯಾಗಿದ್ದು ಹೀಗೆ...