ಬಿಳಿಕೆರೆ: 650 ಕೆ.ಜಿ ಗೋಮಾಂಸ ವಶ

ಹುಣಸೂರು/ಬಿಳಿಕೆರೆ: ಗೋಮಾಂಸ ಸಾಗಿಸುತ್ತಿದ್ದ ಇಬ್ಬರು ಆರೋಪಿಗಳ ಸಮೇತ 650 ಕೆ.ಜಿ. ಗೋಮಾಂಸವನ್ನು ಬಿಳಿಕೆರೆ ಪೊಲೀಸರು ವಶಪಡಿಸಿಕೊಂಡಿದ್ದಾರೆ.
ತಾಲ್ಲೂಕಿನ ದಲ್ಲಾಳು ಕೊ‍ಪ್ಪಲು ಬಳಿ ರತ್ನಾಪುರಿ ಗ್ರಾಮದ ನಯಾಜ್ ಪಾಶಾ ಮತ್ತು ಮುಬಾರಕ್ ಎಂಬವವರು ಸರಕು ಸಾಗಾಣೆ ವಾಹನದಲ್ಲಿ ಅಕ್ರಮವಾಗಿ ಗೋಮಾಂಸ ಮತ್ತು 7 ಜಾನುವಾರುಗಳ ತಲೆಗಳನ್ನು ಸಾಗಿಸುತ್ತಿದ್ದರು. ಖಚಿತ ಮಾಹಿತಿ ಆಧರಿಸಿ ಮೈಸೂರು ರಸ್ತೆಯಲ್ಲಿ ಕಾರ್ಯಾಚರಣೆ ನಡೆಸಿದ ಪೊಲೀಸರು ಆರೋಪಿಗಳನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.
ಗೋಮಾಂಸವನ್ನು ಮೈಸೂರಿಗೆ ಸಾಗಿಸುತ್ತಿರುವುದನ್ನು ಆರೋಪಿಗಳು ಖಚಿತಪಡಿಸಿದ್ದು, ಪ್ರಕರಣ ದಾಖಲಿಸಿ ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ಸಿಪಿಐ ರವಿಕುಮಾರ್ ತಿಳಿಸಿದ್ದಾರೆ.
ಉಪವಿಭಾಗಾಧಿಕಾರಿ ವೀಣಾ ಅವರ ಸೂಚನೆಯಂತೆ ಗೋ ಮಾಂಸವನ್ನು ಹೂಳಲಾಗಿದೆ ಎಂದರು.
ಕಾರ್ಯಾಚರಣೆಯಲ್ಲಿ ಪಿಎಸ್ಐ ರಾಮಚಂದ್ರನಾಯಕ, ಸಿಬ್ಬಂದಿ ರವಿ, ಚಂದ್ರು, ಸತೀಶ್, ನಂದೀಶ್ ಮತ್ತು ಮಹದೇವ್ ಭಾಗವಹಿಸಿದ್ದರು.