ಮದ್ದೂರು | ರಸ್ತೆ ಬದಿ ಫ್ಲೆಕ್ಸ್‌: ಸವಾರರಿಗೆ ತೊಂದರೆ

ಮದ್ದೂರು: ಪಟ್ಟಣದ ವ್ಯಾಪ್ತಿಯಲ್ಲಿ ಅನಧಿಕೃತ ಫ್ಲೆಕ್ಸ್ ಹಾವಳಿ ಹೆಚ್ಚಾಗಿದ್ದು, ರಾಷ್ಟ್ರೀಯ ಹೆದ್ದಾರಿಯ ಮೇಲ್ಸೇತುವೆ ಹಾಗೂ ಸರ್ವಿಸ್ ರಸ್ತೆ ಬದಿಯ ಕಂಬಗಳಿಗೆ ಫ್ಲೆಕ್ಸ್‌ ಅಳವಡಿಸಿರುವುದರಿಂದ ನಗರದ ಸೌಂದರ್ಯ ಹಾಳಾಗಿರುವುದಲ್ಲದೇ, ವಾಹನ ಸಂಚಾರಕ್ಕೂ ತೊಂದರೆಯಾಗುತ್ತಿದೆ.

ರಸ್ತೆ ಬದಿ ಫ್ಲೆಕ್ಸ್‌ ಹಾಕುವಂತಿಲ್ಲ ಎಂದು ಹೆದ್ದಾರಿ ಪ್ರಾಧಿಕಾರದ ನಿಯಮವಿದ್ದರೂ, ಅವನ್ನು ಗಾಳಿಗೆ ತೂರಲಾಗಿದೆ. ಮಳೆ, ಗಾಳಿ ಬಂದಾಗ ಹರಿದ ಫ್ಲೆಕ್ಸ್ ಹಾಗೂ ಅದರಲ್ಲಿರುವ ಮರದ ತುಂಡು ಮೇಲ್ಸೇತುವೆಯಿಂದ ಸರ್ವಿಸ್ ರಸ್ತೆಯ ಮೇಲೆ ಬೀಳುವ ಸಾಧ್ಯತೆಗಳಿದ್ದು, ಕೆಳಗಡೆ ಸಂಚರಿಸುತ್ತಿರುವ ವಾಹನ ಸವಾರರಿಗೆ ತೊಂದರೆಯಾಗುವ ಸಾಧ್ಯತೆಗಳಿದೆ.

ಸಾರಿಗೆ ಬಸ್ ನಿಲ್ದಾಣದ ಬಳಿ, ಕೊಲ್ಲಿ ವೃತ್ತ, ಶಿವಪುರ ಹಾಗೂ ಟಿ.ಬಿ ವೃತ್ತದ ಬಳಿ ಇವುಗಳ ಸಂಖ್ಯೆ ಹೆಚ್ಚಿದೆ. ವಿವಿಧ ರಾಜಕೀಯ ಪಕ್ಷಗಳ ಮುಖಂಡರ ಜನ್ಮದಿನಾಚರಣೆ, ಹಬ್ಬ, ಹರಿದಿನಗಳ ಸಂದರ್ಭದಲ್ಲಿ ವಿವಿಧ ಬಣ್ಣದ ಫ್ಲೆಕ್ಸ್‌ ರಾರಾಜಿಸುತ್ತವೆ.

‘ಪುರಸಭಾ ಅಧಿಕಾರಿಗಳು ಇವನ್ನೂ ಕಂಡೂ, ಕಾಣದಂತೆ ವರ್ತಿಸುತ್ತಿದ್ದಾರೆ. ಸಾರ್ವಜನಿಕರಿಂದ ದೂರುಗಳು ಬಂದಾಗ ಮಾತ್ರ ಕ್ರಮ ಕೈಗೊಳ್ಳುತ್ತಾರೆ. ಮುಂದೆಯಾದರೂ ಅಧಿಕಾರಿಗಳು ಸ್ವಯಂಪ್ರೇರಿತವಾಗಿ ಕ್ರಮ ಕೈಗೊಳ್ಳಲಿ’ ಎಂಬುದು ಸ್ಥಳೀಯರಾದ ಅನಿಜಿತ್‌ ಒತ್ತಾಯಿಸಿದ್ದಾರೆ.