ಮೈಸೂರು | ವಂಚನೆ: ದಂಪತಿಗೆ ಜೈಲು ಶಿಕ್ಷೆ

ಮೈಸೂರು: ವಂಚನೆ ಪ್ರಕರಣದ ಅಪರಾಧಿಗಳಾದ ಹೆಬ್ಬಾಳು ನಿವಾಸಿಗಳಾದ ವಾಸು ಮತ್ತು ತೇಜಾವತಿ ದಂಪತಿಗೆ 1ನೇ ಅಧಿಕ ಸಿಜೆಎಂ ನ್ಯಾಯಾಲಯವು 1 ವರ್ಷ ಕಠಿಣ ಕಾರಾಗೃಹ ಶಿಕ್ಷೆಯೊಂದಿಗೆ ₹20 ಸಾವಿರ ದಂಡ ವಿಧಿಸಿ ಆದೇಶಿಸಿದೆ.

‘ದಂಪತೊ ವಿಜಯ ನಗರದ ನಿವಾಸಿ ಆಶಾ ಅವರಿಂದ ₹12 ಲಕ್ಷ ಪಡೆದು, ಭದ್ರತೆಗಾಗಿ 4 ಚೆಕ್‌ ನೀಡಿದ್ದರು. ಬಳಿಕ ಮನೆ ಮಾರಾಟ ಮಾಡಿ ತಲೆ ಮರೆಸಿಕೊಂಡಿದ್ದರು. ಈ ಬಗ್ಗೆ ಆಶಾ ಅವರು ಹೆಬ್ಬಾಳು ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು.

ಪ್ರಕರಣ ದಾಖಲಿಸಿಕೊಂಡ ಪೊಲೀಸರು, ಆರೋಪಿಗಳ ವಿರುದ್ಧ ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು. ವಿಚಾರಣೆ ನಡೆಸಿದ ನ್ಯಾಯಾಧೀಶೆ ಎ.ಜಿ.ಶಿಲ್ಪಾ ಅವರು ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ಆದೇಶ ಪ್ರಕಟಿಸಿದ್ದಾರೆ. ಹಿರಿಯ ಸಹಾಯಕ ಅಭಿಯೋಜಕ ಕೆ.ಪ್ರಕಾಶ ವಾದ ಮಂಡಿಸಿದ್ದರು.