ಹುಣಸೂರು: ಚುರುಕುಗೊಂಡ ತಂಬಾಕು ಕೃಷಿ

ಹುಣಸೂರು: ವರ್ಷದ ಮೊದಲ ಮಳೆ ಅನ್ನದಾತರಲ್ಲಿ ಬೇಸಾಯದ ಹುರುಪು ಮೂಡಿಸಿದ್ದು, ಭೂಮಿ ಹದಗೊಳಿಸಿ ವಾಣಿಜ್ಯ ಬೆಳೆ ತಂಬಾಕು ಸಸಿ ನಾಟಿಗೆ ಭರದ ಸಿದ್ಧತೆ ನಡೆಸಿದ್ದಾರೆ.

ಸೋಮವಾರ 1.8 ಸೆಂ.ಮೀ ಮಳೆಯಾಗಿದ್ದು, ತಂಬಾಕು ಬೆಳೆಗಾರರು ತಂಬಾಕು ಸಸಿ ನರ್ಸರಿ ಮಡಿಯಲ್ಲಿ ಆರೋಗ್ಯ ಸಸಿ ಬೆಳೆಸುವಲ್ಲಿ ತೊಡಗಿದ್ದಾರೆ. ಈ ಸಾಲಿನಲ್ಲಿ 1,200 ಕೆ.ಜಿ. ಬಿತ್ತನೆ ಬೀಜ ಹುಣಸೂರು ತಂಬಾಕು ಸಂಶೋಧನ ಕೇಂದ್ರದಿಂದ ರೈತರು ಖರೀದಿಸಿದ್ದು, ಕಳೆದ ಸಾಲಿಗಿಂತ ಈ ಸಾಲಿನಲ್ಲಿ ಶೇ 25ರಷ್ಟು ಹೆಚ್ಚುವರಿ ಬಿತ್ತನ ಬೀಜ ಮಾರಾಟವಾಗಿದೆ ಎಂದು ಹುಣಸೂರು ತಂಬಾಕು ಸಂಶೋಧನ ಕೇಂದ್ರದ ಮುಖ್ಯ ವಿಜ್ಞಾನಿ ರಾಮಕೃಷ್ಣ ತಿಳಿಸಿದರು.

ತಳಿ: ತಂಬಾಕು ಸಂಶೋಧನ ಕೇಂದ್ರ ಅಭಿವೃದ್ಧಿಪಡಿಸಿರುವ ಹೈಬ್ರೀಡ್ ತಳಿಗಳಾದ ಸಿ.ಎಚ್. 3, ಎಫ್.ಸಿ.ಎಚ್. 222, ಎಫ್.ಸಿ.ಎಚ್. 248 ತಳಿಯಲ್ಲಿ ಹೊಸ ತಳಿ 1345ರ ಬಿತ್ತನೆ ಬೀಜಯನ್ನು ಈಗಾಗಲೇ 5 ಸಾವಿರ ರೈತರು ಖರೀದಿಸಿದ್ದಾರೆ. ಇದರ ನಂತರದಲ್ಲಿ ಎಫ್.ಸಿ.ಎಚ್. 248 ತಳಿ 2 ಸಾವಿರ ರೈತರು ಬೆಳೆಯಲು ಮುಂದಾಗಿದ್ದಾರೆ. ನಂತರದಲ್ಲಿ ಎಫ್.ಸಿ.ಎಚ್. 222, ಸಿ.ಎಚ್. 3 ತಳಿ ಬೆಳೆಯಲು ಆಸಕ್ತಿ ತೋರಿದ್ದಾರೆ.

ಹೊಸ ತಳಿ: ಹೊಸದಾಗಿ ಅಭಿವೃದ್ಧಿಪಡಿಸಿರುವ 1345 ತಳಿ ತಂಬಾಕಿನಲ್ಲಿ ಪ್ರತಿ ಗಿಡದಲ್ಲಿ ಕನಿಷ್ಠ 30 ಎಲೆ ಬರಲಿದ್ದು ಪ್ರತಿಯೊಂದು ಎಲೆಯೂ ಗೋಲ್ಡ್ ಬಣ್ಣ ಹೊಂದಿರಲಿದೆ. ಸಾಮಾನ್ಯ ಗುಣಮಟ್ಟದಿಂದ ಕೂಡಿರುವುದರಿಂದ ಮಾರುಕಟ್ಟೆಯಲ್ಲಿ ರೈತನಿಗೆ ನಷ್ಟ ಇರುವುದಿಲ್ಲ ಎನ್ನುವರು ಕೇಂದ್ರದ ವಿಜ್ಞಾನಿ.

ರೋಗಬಾಧೆ: ರೈತ ಬೆಳೆಸಿರುವ ನರ್ಸರಿಯಲ್ಲಿ ರೋಗ ಕಾಣಿಸಿಕೊಂಡಿದ್ದು, ನಿರ್ವಹಣೆಗೆ ರೈಡೋಮಿಲ್ ಗೋಲ್ಡ್ ಅಥವಾ ಮಟ್ಕೋ 30 ಗ್ರಾಂ ಪ್ರತಿ 15 ಲೀಟರ್ ನೀರಿನಲ್ಲಿ ಮಿಶ್ರಣ ಮಾಡಿ ಸಸಿ ಮಡಿಗೆ ಸಿಂಪಡಿಸಬೇಕು.

ಟ್ರೇ ಪದ್ಧತಿಯಲ್ಲಿ ಸಸಿ ಬೆಳೆಸುವ ಮುನ್ನ ಮಡಿಯಲ್ಲಿ ಆರೋಗ್ಯ ಸಸಿ ಆಯ್ಕೆ ಅತಿಮುಖ್ಯ. ಬಿಸಿಲಿನ ಝಳದಲ್ಲಿ ಸಸಿ ಟ್ರೇಗೆ ವರ್ಗಾಯಿಸುವುದರಿಂದ ಗಂಟು ರೋಗ ಕಾಣಿಸಿಕೊಳ್ಳಲಿದೆ. ನಿಯಂತ್ರಿಸಲು ಕೋಕೊ ಪಿಟ್ ಸಾವಯವ ಗೊಬ್ಬರಕ್ಕೆ ವ್ಯಾಲಂ ಪ್ರೈಂ ಔಷಧಿ 5 ಎಂ.ಎಲ್. 10 ಲೀಟರ್ ನೀರಿಗೆ ಮಿಶ್ರಣ ಮಾಡಿ ಸಿಂಪಡಣೆ ಮಾಡುವುದು ಅಗತ್ಯವಾಗಿದೆ. ಕಾಂಡ ಕೊರೆಯುವ ಮತ್ತು ಹಸಿರು ಹುಳ ರೋಗ ಕಾಣಿಸಿದಲ್ಲಿ ಕೊರಾಜಿನ್ ಅಥವಾ ಎಮಾಮೆಕ್ಟಿನ್ ಬೆಂಜೊಯೇಟ್ 5 ಗ್ರಾಂ ಅನ್ನು ನೀರಿಗೆ ಬೆರೆಸಿ ಸಿಂಪಡಿಸಬೇಕು ಎಂದು ಸಲಹೆ ನೀಡಿದ್ದಾರೆ.