ಪುನರ್ವಸತಿ ಯೋಜನೆ ಜಾರಿಗೆ ಆಗ್ರಹ: ಆದಿವಾಸಿ ಗಿರಿಜನರಿಂದ ಅರಣ್ಯ ನುಗ್ಗುವ ಅಭಿಯಾನ

ಹುಣಸೂರು: ಅರಣ್ಯ ಕಾಯ್ದೆ ಹಕ್ಕು ಮತ್ತು ನಾಗರಹೊಳೆ ಅರಣ್ಯದಿಂದ ಹೊರ ಹಾಕಲ್ಪಟ್ಟ ಆದಿವಾಸಿ ಗಿರಿಜನರಿಗೆ ಪುನರ್ವಸತಿ ಕಲ್ಪಿಸಬೇಕು ಎಂದು ಆಗ್ರಹಿಸಿ ಕೊಳವಿಗೆ ಹಾಡಿಯ ಗಿರಿಜನರು ಗುಳ್ಳೆ ಮೆಳೆ ಹಾಡಿಯ ಚಾಮಳ್ಳಿ ಒಡೆಯನ ಕಾಡಿಗೆ ನುಗ್ಗಿ ಪ್ರತಿಭಟಿಸಿದರು.

ಆದಿವಾಸಿ ಮಹಿಳಾ ಸಂಘದ ಅಧ್ಯಕ್ಷೆ ಲಕ್ಷ್ಮಿ ಮಾತನಾಡಿ, ನಮ್ಮ ಪೂರ್ವಜರು ಬಾಳಿದ ಹಾಡಿಗೆ ಭೇಟಿ ನೀಡಿ ನಮ್ಮ ಒಡೆಯನಿಗೆ ಪೂಜೆ ಸಲ್ಲಿಸುವ ಹಕ್ಕು ಪ್ರತಿಯೊಬ್ಬ ಗಿರಿಜನರ ಹಕ್ಕಾಗಿದೆ. ಈ ಹಕ್ಕುಗಳನ್ನು ಅರಣ್ಯ ಇಲಾಖೆ ವನ್ಯಜೀವಿ ರಕ್ಷಣೆ ಹೆಸರಿನಲ್ಲಿ ಗಿರಿಜನ ಮೂಲಭೂತ ಹಕ್ಕುಗಳನ್ನು ಕಸಿದುಕೊಂಡಿದೆ ಎಂದರು.

ನಾಗರಹೊಳೆ ಅರಣ್ಯವನ್ನು ಹುಲಿ ಯೋಜನೆ ಅಡಿಯಲ್ಲಿ ತಂದು ಅರಣ್ಯದೊಳಗೆ ವಾಸಿಸುತ್ತಿದ್ದ ಗಿರಿಜನ ಕುಟುಂಬವನ್ನು ಒಕ್ಕಲೆಬ್ಬಿಸಿ ದಶಕ ಕಳೆದಿದ್ದರೂ ಈವರೆಗೂ 3418 ಕುಟುಂಬಗಳಿಗೆ ಪುನರ್ವಸತಿ ಕಲ್ಪಿಸದೆ ಸರ್ಕಾರ ಗಿರಿಜನರನ್ನು ಬೀದಿಗೆ ಬಿಟ್ಟಿದೆ. ಈ ಸಂಬಂಧ ಹೈಕೋರ್ಟ್‌ ಈಗಾಗಲೇ ಸರ್ಕಾರಕ್ಕೆ ಚಾಟಿ ಬೀಸಿ ಪುನರ್ವಸತಿ ಕಲ್ಪಿಸುವಂತೆ ಆದೇಶಿಸಿದ್ದರು ಕ್ರಮವಹಿಸಿಲ್ಲ. ನ್ಯಾಯಾಂಗ ನಿಂದನೆ ಎದುರಿಸಿರುವ ಸರ್ಕಾರ ಈಗಲಾದರೂ ಗಿರಿಜನರ ಬೇಡಿಕೆ ಈಡೇರಿಸಬೇಕು ಎಂದರು.

ಡೀಡ್‌ ಸಂಸ್ಥೆ ನಿರ್ದೇಶಕ ಶ್ರೀಕಾಂತ್‌ ಮಾತನಾಡಿ, ಆದಿವಾಸಿಗಳಿಗೆ ಪುನರ್ವಸತಿ ಕೇಂದ್ರ ತೆರೆಯಲು ಹೈಕೋರ್ಟ್‌ ಆದೇಶಿಸಿದೆ. ಇದಲ್ಲದೆ ಅಸ್ಸಾದಿ ವರದಿಯಲ್ಲೂ ಸತ್ಯಾಂಶ ಹೊರ ಬಿದ್ದಿದ್ದು, ಈ ಎಲ್ಲವೂ ಸರ್ಕಾರದ ಎದುರಿದ್ದರೂ ಯಾವ ಕಾರಣಕ್ಕೆ ಪುನರ್ವಸತಿ ಕಲ್ಪಿಸಿಲ್ಲ ಎಂಬುದು ಯಕ್ಷ ಪ್ರಶ್ನೆಯಾಗಿದೆ ಎಂದರು. ಆದಿವಾಸಿ ಗಿರಿಜನರ ಪೂರ್ವಜರು ಬದುಕು ಕಟ್ಟಿಕೊಂಡ ಸ್ಥಳವನ್ನು ಆ ಕುಟುಂಬಕ್ಕೆ ಅರಣ್ಯಹಕ್ಕು ಕಾಯ್ದೆ ಅಡಿಯಲ್ಲಿ ನೀಡಬೇಕು. ನಮ್ಮ ಕಾಡು ನಮ್ಮ ಹಕ್ಕು ನಮ್ಮ ಬಾಳಿಗೆ ನೀಡಬೇಕು ಎಂದು ಆಗ್ರಹಿಸಿದರು.

ಅರಣ್ಯ ನುಗ್ಗುವ ಅಭಿಯಾನದಲ್ಲಿ ಕೊಳವಿಗೆ, ಭರತವಾಡಿ, ತೆಕ್ಕಲಹಾಡಿ ಗಿರಿಜನರು ಅರಣ್ಯ ಹಕ್ಕು ಸಮಿತಿ ಒಕ್ಕೂಟದ ಅಧ್ಯಕ್ಷ ಶಿವಣ್ಣ, ಕೊಳವಿಗೆ ಹಾಡಿ ಮುಖಂಡ ಗಣೇಶ್‌, ಕುಮಾರ್‌, ಕುಶಾಲಪ್ಪ, ಮರಿಯಯ್ಯ, ರಮೇಶ್‌, ರಿ, ಅರ್ಚನ, ರೇಷ್ಮ, ನಿಂಗರಾಜಪ್ಪ ಡೀಡ್‌ ಸಂಸ್ಥೆಯ ಪ್ರಕಾಶ್‌ ಇತರರಿದ್ದರು.