‘ಹಿಂಗಾರು ಬೆಳೆ ಗೊಂದಲ ನಿವಾರಿಸಿ’

ಸಿಂಧನೂರು: ‘ತುಂಗಭದ್ರಾ ವ್ಯಾಪ್ತಿಯ ಸಿಂಧನೂರು, ಮಾನ್ವಿ ಹಾಗೂ ರಾಯಚೂರು ತಾಲ್ಲೂಕಿನ ರೈತರ ಪರಿಸ್ಥಿತಿ ಈ ವರ್ಷ ಮೂರಾಬಟ್ಟೆಯಾಗಿದ್ದು, ಯಾವ ಬೆಳೆ ಹಾಕಬೇಕೋ ಎನ್ನುವ ಗೊಂದಲ ಮೂಡಿದೆ. ಇದಕ್ಕೆ ಕೃಷಿ ಇಲಾಖೆ ಸೂಕ್ತ ಪರಿಹಾರ ಸೂಚಿಸಬೇಕು ಎಂದು ಮಾಜಿ ಸಂಸದ ಕೆ.ವಿರೂಪಾಕ್ಷಪ್ಪ ಒತ್ತಾಯಿಸಿದ್ದಾರೆ.

ಮಂಗಳವಾರ ಹೇಳಿಕೆ ನೀಡಿರುವ ಅವರು, ಮುಂಗಾರು ಬೆಳೆಗೆ ತುಂಗಭದ್ರಾ ಜಲಾಶಯದಿಂದ ತಡವಾಗಿ ನೀರು ಬಿಟ್ಟು, ಅಲ್ಪ ನೀರಾವರಿ ಬೆಳೆಗಳನ್ನು ಮಾತ್ರ ಬೆಳೆಯಬೇಕು ಎಂದು ಕೃಷಿ ಇಲಾಖೆಯ ಅಧಿಕಾರಿಗಳು ಪ್ರಚಾರ ಮಾಡಿದ್ದರು.

ಈ ಹಿನ್ನೆಲೆಯಲ್ಲಿ ರೈತರು ಮೆಕ್ಕೆಜೋಳ, ಜೋಳ, ಸೂರ್ಯಕಾಂತಿ, ಸಜ್ಜೆ, ಹತ್ತಿ ಬೆಳೆ ಬಿತ್ತನೆ ಮಾಡಿಕೊಂಡಿದ್ದರು. ಕೆಲ ಮೇಲ್ಭಾಗದ ರೈತರು ಸೆಪ್ಟೆಂಬರ್ ತಿಂಗಳ ಪೂರ್ತಿ ಭತ್ತ ನಾಟಿ ಮಾಡಿದ್ದಾರೆ. ಆದರೆ ಸದ್ಯ ಚಳಿಗಾಲ ಆರಂಭಗೊಂಡಿದ್ದು, ಭತ್ತ ವಡೆ ಬಿಡುವ ಸಮಯದಲ್ಲಿ ಚಳಿ ಉಂಟಾದರೆ ಕಾಳು ಆಗುವುದಿಲ್ಲ ಎಂದು ವಿವರಿಸಿದ್ದಾರೆ.