ಶಹಾಪುರ | ₹8 ಕೋಟಿ ಮೌಲ್ಯದ ಹೆಚ್ಚವರಿ ಜಮೀನು ಪತ್ತೆ

ಶಹಾಪುರ: ಸಣ್ಣ ಕೈಗಾರಿಕೆ ಅಭಿವೃದ್ಧಿ ಯೋಜನೆ(ಐಡಿಎಸ್‌ಎಂಟಿ) ಅಡಿಯಲ್ಲಿ ನಗರಸಭೆ ಭೂ ಸ್ವಾಧೀನಪಡಿಸಿಕೊಂಡ ಜಮೀನು 35 ವರ್ಷದಿಂದ ಸಾರ್ವಜನಿಕ ಉಪಯೋಗಕ್ಕೆ ಬಾರದೆ ಹಾಳು ಬಿದ್ದಿತ್ತು. ಈಗ ನಗರಸಭೆ ಸಿಬ್ಬಂದಿ ಸುಮಾರು ₹8 ಕೋಟಿ ಮೌಲ್ಯದ ಹೆಚ್ಚುವರಿ ಜಮೀನು ಪತ್ತೆ ಹಚ್ಚಿದ್ದಾರೆ.

ಅಂದಿನ ಪುರಸಭೆ 1986ರಲ್ಲಿ ಒಟ್ಟು 93 ಎಕರೆ ಜಮೀನು ಸ್ವಾಧೀನಪಡಿಸಿಕೊಂಡಿತ್ತು. ಬಳಿಕ 1988ರಲ್ಲಿ ನಿವೇಶನ ರಚನೆ ಮಾಡಿ 1,816 ಪ್ಲಾಟ್ ನಿರ್ಮಿಸಿ ಹರಾಜು ಪ್ರಕ್ರಿಯೆ ಮೂಲಕ ಮಾರಾಟ ಮಾಡಲಾಗಿತ್ತು. ಆದರೆ ತಾಂತ್ರಿಕ ತೊಂದರೆಯಿಂದ ಒಂದಿಷ್ಟು ಜಮೀನು ಹಾಗೆ ಉಳಿದಿತ್ತು.

ಮೂರು ತಿಂಗಳ ಹಿಂದೆ ಸಚಿವ ಶರಣಬಸಪ್ಪ ದರ್ಶನಾಪುರ ‘ಸ್ಥಳೀಯ ಸಂಪನ್ಮೂಲವನ್ನು ಕ್ರೋಢಿಕರಿಸುವ ಉದ್ದೇಶದಿಂದ ನಗರಸಭೆಗೆ ಬರಬೇಕಾದ ಆದಾಯ ಮೂಲ ಪತ್ತೆ ಹಚ್ಚಬೇಕು. ಸಾರ್ವಜನಿಕ ಆಸ್ತಿ ಸಂರಕ್ಷಣೆ ಮಾಡಲು ಜಮೀನು ಪತ್ತೆ ಹಚ್ಚಬೇಕು’ ಎಂದು ಸೂಚನೆ ನೀಡಿದ್ದರು. ಅದರಂತೆ ಕಾರ್ಯ ಕೈಗೆತ್ತಿಕೊಂಡ ಕಂದಾಯ ಇಲಾಖೆಯಿಂದ ಸಮಗ್ರವಾದ ದಾಖಲೆಗಳನ್ನು ಪಡೆದುಕೊಂಡು ಸರ್ವೇ ಕಾರ್ಯಕ್ಕೆ ಚಾಲನೆ ನೀಡಿದೆವು. ಫಿಲ್ಟರ ಬೆಡ್ ಹತ್ತಿರ ಇರುವ ಸರ್ವೇ ನಂಬರ್ 90/1ರಲ್ಲಿ 1.20 ಗುಂಟೆ, 92ರಲ್ಲಿ 4.26 ಹಾಗೂ 93ರಲ್ಲಿ 2.18 ಗುಂಟೆ ಸೇರಿ ಒಟ್ಟು 8.24 ಗುಂಟೆ ಜಮೀನು ಲಭ್ಯವಾಗಿದೆ' ಎಂದು ಪೌರಾಯುಕ್ತ ರಮೇಶ ಬಡಿಗೇರ ತಿಳಿಸಿದರು.

‘ಸದ್ಯ ಲಭ್ಯವಾಗಿರುವ ಜಮೀನಿನಲ್ಲಿ ನಿವೇಶನ(ಪ್ಲಾಟ್) ನಿರ್ಮಿಸಲು ನಗರ ಯೋಜನಾ ಪ್ರಾಧಿಕಾರಕ್ಕೆ ಲೇಔಟ್ ಮ್ಯಾಪ್ ಅನುಮೋದನೆಗೆ ಸಲ್ಲಿಸಿದೆ. ಸುಮಾರು 120 ಪ್ಲಾಟ್ ಲಭ್ಯವಾಗುವ ಅಂದಾಜು ಇದೆ. ನಂತರ ಹರಾಜು ಪ್ರಕ್ರಿಯೆ ಅನುಮೋದನೆಗಾಗಿ ಜಿಲ್ಲಾಧಿಕಾರಿಗೆ ವರದಿ ನೀಡಲಾಗುವುದು’ ಎಂದು ಅವರು ತಿಳಿಸಿದರು.