ರಾಯಚೂರು | ಕುಡಿಯುವ ನೀರಿನಲ್ಲಿ ಹುಳು ಪತ್ತೆ, ಗ್ರಾಮಸ್ಥರಲ್ಲಿ ರೋಗ ಭೀತಿ

ಕವಿತಾಳ: ಸಮೀಪದ ಹಿರೇದಿನ್ನಿ ಗ್ರಾಮದಲ್ಲಿ ಕುಡಿಯುವ ನೀರಿನಲ್ಲಿ ಹುಳುಗಳು ಬರುತ್ತಿದ್ದು ಗ್ರಾಮಸ್ಥರಲ್ಲಿ ಆತಂಕ ಮೂಡಿಸಿದೆ.

ಕುಡಿಯುವ ನೀರಿನ ಕೆರೆಯಿಂದ ಗ್ರಾಮಕ್ಕೆ ಪೂರೈಸುವ ನೀರಿನಲ್ಲಿ ಹತ್ತು ದಿನಗಳಿಂದ ಹುಳು ಬರುತ್ತಿವೆ. ಬಳಕೆಗೆ ಹಾಗೂ ಜನ ಜಾನುವಾರುಗಳಿಗೆ ಕುಡಿಯಲು ಈ ನೀರನ್ನೇ ಬಳಸುತ್ತಿದ್ದು, ರೋಗ ಹರಡುವ ಭೀತಿ ಕಾಡುತ್ತಿದೆ ಎಂದು ಸಾರ್ವಜನಿಕರು ಅಳಲು ತೋಡಿಕೊಂಡರು.

ಉದ್ದನೆ ಆಕಾರದಲ್ಲಿ ಮಳೆ ಹುಳುಗಳಂತೆ ಕಾಣುವ ಈ ಹುಳುಗಳು ಕೆಂಪು ಬಣ್ಣದ್ದಾಗಿವೆ ಜರಡಿ ಹಿಡಿದು ನೀರು ಸಂಗ್ರಹಿಸುತ್ತಿದ್ದು ಹುಳು ಜರಡಿಯಲ್ಲಿ ಉಳಿಯುತ್ತವೆ. ಊರಲ್ಲಿ ಶುದ್ದ ಕುಡಿಯುವ ನೀರಿನ ಘಟಕ ಇಲ್ಲದ ಕಾರಣ ಅನಿವಾರ್ಯವಾಗಿ ಈ ನೀರನ್ನೇ ಕುಡಿಯುವಂತಾಗಿದೆ ಎಂದು ಗ್ರಾಮದ ಕೆ.ನಿರುಪಾದಿ ಆರೋಪಿಸಿದರು.

‌‘ಕೆರೆಯಲ್ಲಿ ಹುಳು ಪತ್ತೆಯಾಗಿಲ್ಲ, ನೀರು ಸಂಗ್ರಹ ತೊಟ್ಟಿಯನ್ನು ಈಚೆಗೆ ಸ್ವಚ್ಚಗೊಳಿಸಲಾಗಿದೆ ಎನ್ನಲಾಗುತ್ತಿದೆ ಹೀಗಿದ್ದರೂ ನಲ್ಲಿಯಲ್ಲಿ ನಿತ್ಯ ಹುಳು ಬರುತ್ತಿವೆ. ಗ್ರಾಮದಲ್ಲಿಹಲವರಿಗೆ ಈಗಾಗಲೇ ನೆಗಡಿ, ಕೆಮ್ಮು, ಮೈ, ಕೈ ನೋವು , ಜ್ವರ ಕಾಣಿಸಿಕೊಂಡಿದ್ದು ಆತಂಕ ಉಂಟುಮಾಡಿದೆ. ಈ ಬಗ್ಗೆ ಅಧಿಕಾರಿಗಳು ತುರ್ತು ಕ್ರಮ ಕೈಗೊಳ್ಳಬೇಕು’ ಎಂದು ಗೋಸಿ ಈರಪ್ಪ, ಎಸ್. ಬಸವಲಿಂಗಪ್ಪ, ಎಂ. ಮಾಳಿಂಗರಾಯ, ಜೆ. ನಿರೂಪಾದಿ, ನಂದೀಶ, ಕೆ. ಸುರೇಶ, ಜಿ. ಬಸವರಾಜ, ಡಿ.ಜೆ.ಬಸವ ಮತ್ತು ಪ್ರಜ್ವಲ ಆಗ್ರಹಿಸಿದ್ದಾರೆ.