ಸಿಂಧನೂರು | ಬರಿದಾದ ಕೆರೆ ಒಡಲು: ದಾಹ ತಣಿಸಲು ಪರದಾಟ

ಸಿಂಧನೂರು: ಬರಗಾಲದಿಂದಾಗಿ ತಾಲ್ಲೂಕಿನ ಕುಡಿಯುವ ನೀರಿನ ಕೆರೆಗಳು ಅವಧಿಗೆ ಮುನ್ನವೇ ಖಾಲಿಯಾಗಿದ್ದು, ಗ್ರಾಮೀಣ ಪ್ರದೇಶದಲ್ಲಿ ಕುಡಿಯುವ ನೀರಿಗೆ ಹಾಹಾಕಾರ ಉಂಟಾಗಿದೆ.

ಅಗತ್ಯ ಪ್ರಮಾಣದ ಮಳೆಯಾಗದ ಕಾರಣ ಈ ಬಾರಿ ತುಂಗಭದ್ರಾ ಜಲಾಶಯದಲ್ಲಿ ನೀರಿನ ಕೊರತೆಯಿಂದಾಗಿ ಡಿಸೆಂಬರ್ ಕೊನೆಯ ವಾರದಲ್ಲೇ ತುಂಗಭದ್ರಾ ಮುಖ್ಯ ಕಾಲುವೆ ಸೇರಿ ಉಪ ಕಾಲುವೆಗಳಿಗೆ ನೀರಿನ ಹರಿವು ಸ್ಥಗಿತಗೊಳಿಸಲಾಗಿತ್ತು. ಆ ವೇಳೆಗೆ ಕೆರೆಗಳಲ್ಲಿ ನೀರು ಸಂಗ್ರಹಿಸಿಕೊಂಡಿದ್ದರೂ ತೀವ್ರ ಬರಗಾಲದ ಕಾರಣ ಅವಧಿಗೆ ಮುನ್ನವೇ ಖಾಲಿಯಾಗಿದೆ. ಜನ-ಜಾನುವಾರು ತತ್ವಾರ ಎದುರಿಸುವಂತಾಗಿದೆ.

ತಾಲ್ಲೂಕಿನ ಬಾದರ್ಲಿ, ಗೊರೇಬಾಳ, ಗುಂಜಳ್ಳಿ, ಹೆಡಗಿನಾಳ, ಹುಡಾ, ಜಾಲಿಹಾಳ, ಜವಳಗೇರಾ, ಕುನಟಗಿ, ಸಾಲಗುಂದಾ, ಸಿಂಧನೂರು, ತುರ್ವಿಹಾಳ ಹಾಗೂ ವಲ್ಕಂದಿನ್ನಿ ವ್ಯಾಪ್ತಿಯ ಹಲವು ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ತಲೆದೋರಿದೆ. ಬಾದರ್ಲಿ, ಹೆಡಗಿನಾಳ, ಸಾಲಗುಂದಾ ಹೋಬಳಿಗಳ ವ್ಯಾಪ್ತಿಯ ಹಲವು ಗ್ರಾಮಗಳು ನದಿ ಪಕ್ಕದಲ್ಲಿದ್ದರೂ ತುಂಗಭದ್ರಾ ನದಿ ಸಂಪೂರ್ಣ ಬತ್ತಿ ಹೋಗಿರುವುದರಿಂದ ಈ ಬಾರಿ ನೀರಿನ ಸಮಸ್ಯೆಗೆ ಸಿಲುಕಿವೆ.

ತಾಲ್ಲೂಕಿನ ಗಡಿ ಗ್ರಾಮ ಹಸಮಕಲ್ ಕುಡಿಯುವ ನೀರಿನ ಕೆರೆ ಬರಿದಾಗಿದ್ದು, ಗುಡದೂರು, ರಂಗಾಪುರ, ಪಾಂಡುರಂಗ ಕ್ಯಾಂಪ್, ಮುದ್ದಾಪುರ ಹಾಗೂ ಮಲ್ಲಿಕಾರ್ಜುನ ಕ್ಯಾಂಪ್‍ಗಳಿಗೆ ನೀರು ಸರಬರಾಜು  ಕಳೆದ ಹದಿನೈದು ದಿನಗಳ ಹಿಂದೆಯೇ ಸ್ಥಗಿತಗೊಂಡಿದೆ. ಖಾಸಗಿ ಘಟಕಗಳಿಂದ ಜನರು ಕುಡಿಯುವ ನೀರು ತರುತ್ತಿದ್ದು, ಜಾನುವಾರುಗಳ ದಾಹ ತಣಿಸಲು ಪರದಾಡುವಂತಾಗಿದೆ. ತಾಲ್ಲೂಕಿನ ಹಲವು ಕ್ಯಾಂಪ್ ಹಾಗೂ ಗ್ರಾಮಗಳಲ್ಲಿ ಹೈನುಗಾರಿಕೆ ರೈತರ ಉಪ ಕಸುಬಾಗಿದ್ದು, ನೀರಿನ ಕೊರತೆ ಹಾಗೂ ಮೇವಿನ ಅಭಾವದಿಂದಾಗಿ ಹೈನುಗಾರಿಕೆಯ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದೆ.