ರಾಯಚೂರು: ವಿದ್ಯುತ್ ಇಲ್ಲದಿದ್ದರೂ ಮೋಟರ್‌ನಿಂದ 50ಅಡಿ ಎತ್ತರಕ್ಕೆ ಚಿಮ್ಮಿದ ನೀರು!

ರಾಯಚೂರು: ವಿದ್ಯುತ್‌ ಇಲ್ಲದಿದ್ದರೂ 20 ಅಡಿ ಆಳದಿಂದ ನೀರು ಜಗ್ಗಿ 50 ಅಡಿ ಮೇಲಕ್ಕೆ ಚಿಮ್ಮಿಸಬಲ್ಲ ಮೋಟರ್, ಕಬ್ಬು ನುರಿದು ಹಾಲು ಸುರಿಯುವ ಯಂತ್ರ, ಗಂಟೆಗೆ 500 ರೊಟ್ಟಿ, ಹಪ್ಪಳ ಮಾಡುವ ಯಂತ್ರ, ಚಕ್ಕುಲಿ ಸೇವು ಕುರುಕಲು ಆಹಾರ ಸಿದ್ಧಪಡಿಸಿಕೊಡುವ ಯಂತ್ರ..…

ಹೌದು! ಇದು ಕಂಡು ಬಂದಿದ್ದು ಇಲ್ಲಿಯ ಕೃಷಿ ವಿಜ್ಞಾನಗಳ ವಿಶ್ವವಿದ್ಯಾಲಯದ ಆವರಣದಲ್ಲಿ ಕರ್ನಾಟಕ ಗ್ರಾಮೀಣ ಜೀವನೋಪಾಯ ಅಭಿಯಾನ, ರಾಷ್ಟ್ರೀಯ ನಗರ ಜೀವನೋಪಾಯ ಅಭಿಯಾನದ ಆಶ್ರಯದಲ್ಲಿ ಸೆಲ್ಕೊ ಫೌಂಡೆಷನ್‌ ಆಯೋಜಿಸಿರುವ ಸೌರಶಕ್ತಿಯಿಂದ ಬಳಸಬಹುದಾದ ಉಪಕರಣಗಳ ಪ್ರದರ್ಶನದಲ್ಲಿ.

ಕಾಡು ಪ್ರಾಣಿ, ಕೀಟ, ಹಕ್ಕಿಗಳಿಂದ ರಕ್ಷಿಸುವ ಸೋಲಾರ ಉಪಕರಣ, ಸೌರ ಶಕ್ತಿ ಬಳಕೆಯ ಸೆನ್ಸಾರ್‌ ಸೈರನ್ ಪ್ರದರ್ಶನದಲ್ಲಿ ಹೆಚ್ಚು ಗಮನ ಸೆಳೆಯಿತು. ಸೌರಶಕ್ತಿ ಬಳಸಿ ಭತ್ತ ನಾಟಿ, ಕೋಳಿ ಸಾಕಾಣಿಕೆ ಕೇಂದ್ರದಲ್ಲಿ ಗೊಬ್ಬರ ಎತ್ತಿಹಾಕುವ ಯಂತ್ರ ರೈತರಲ್ಲಿ ಹೊಸ ಭರವಸೆ ಮೂಡಿಸಿದವು.

ಗ್ರಾಮೀಣ ಮಹಿಳೆಯರು, ಸ್ವಸಹಾಯ ಗುಂಪುಗಳ ಸದಸ್ಯೆಯರು, ಅಂಗವಿಕಲರು ಹಾಗೂ ರೈತರಿಗೆ ತಾವಿರುವ ಊರಲ್ಲೇ ಯಂತ್ರೋಪಕರಣಗಳನ್ನು ಬಳಸಿಕೊಂಡು ಸ್ವಯಂ ಉದ್ಯೋಗ ಆರಂಭಿಸಲು ಹಾಗೂ ಜೀವನೋಪಾಯ ಕಂಡುಕೊಳ್ಳಲು ಸಾಧ್ಯ ಎನ್ನುವುದನ್ನು ಪ್ರದರ್ಶನದ ಮೂಲಕ ಮನವರಿಕೆ ಮಾಡಲಾಯಿತು.

ಪ್ರದರ್ಶನದಲ್ಲಿ ಸೋಲಾರ್ ಉಪಕರಣಗಳ ಖರೀದಿಗೆ ಬ್ಯಾಂಕ್‌ಗಳಿಂದ ದೊರೆಯುವ ಸಾಲ ಸೌಲಭ್ಯ, ಸರ್ಕಾರದಿಂದ ಲಭಿಸುವ ಶೇಕಡ 30ರಷ್ಟು ರಿಯಾಯಿತಿ, ಮಾರುಕಟ್ಟೆ, ಮಾರಾಟ ವ್ಯವಸ್ಥೆಯ ಕುರಿತು ಮಹಿಳೆಯರಿಗೆ ತಿಳಿವಳಿಕೆ ನೀಡಲಾಯಿತು.

ಬಿಸಿಲ ನಾಡಲ್ಲಿ ಬೇಸಿಗೆಯಲ್ಲಿ ಶೆಡ್‌ಗಳಲ್ಲಿ ವಾಸಮಾಡುವುದು ಕಷ್ಟಕರ. ಬಬಲ್‌ಶೀಟ್, ಎಕ್ಸ್‌ಎಲ್‌ಒಇಇ ರೂಫ್‌ ಶೀಟ್‌. ರೋಕ್ವುಲ್ ಬಳಸಿ ಶೆಡ್‌ನಲ್ಲಿ ಉಷ್ಣಾಂಶ ಕಡಿಮೆ ಮಾಡುವ ವಿಧಾನ, ಚಿಕ್ಕ ಅಂಗಡಿಗಳ ನಿರ್ಮಾಣದ ಮಾಹಿತಿ ಸಹ ಮಹಿಳೆಯರನ್ನು ಆಕರ್ಷಿಸಿದವು.

‘ಗ್ರಾಮೀಣ ಮಹಿಳೆಯರು ಉದ್ಯೋಗಕ್ಕಾಗಿ ವಲಸೆ ಹೋಗುವುದನ್ನು ತಡೆದು ಊರಲ್ಲೇ ಉದ್ಯೋಗ ಭದ್ರತೆ ಒದಗಿಸುವಂತಹ ಪ್ರಯತ್ನವನ್ನು ಪ್ರದರ್ಶನದ ಮೂಲಕ ಮಾಡಲಾಗಿದೆ. ಪ್ರಾತ್ಯಕ್ಷಿಕೆಯ ಮೂಲಕ ಸೌರಶಕ್ತಿ ಬಳಕೆಯಿಂದ ಬಳಸಬಹುದಾದ ಉಪಕರಣಗಳ ಮಾಹಿತಿ ಒದಗಿಸಲಾಗಿದೆ’ ಎಂದು ಕೃಷಿ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ವಿಜಯಕುಮಾರ ಪಲ್ಲೇದ ತಿಳಿಸಿದರು.

ಮೊದಲ ದಿನ ಜಿಲ್ಲೆಯ ವಿವಿಧೆಡೆಯಿಂದ ಬಂದಿದ್ದ ಮೂರು ಸಾವಿರ ಮಹಿಳೆಯರು ಪ್ರದರ್ಶನ ವೀಕ್ಷಿಸಿ ಮಾಹಿತಿ ಪಡೆದುಕೊಂಡರು. ವೇದಿಕೆ ಕಾರ್ಯಕ್ರಮದಲ್ಲೂ ಸ್ವಸಹಾಯ ಸಂಘಗಳ ಸದಸ್ಯೆಯರಿಗೆ ವಿಷಯ ತಜ್ಞರಿಂದ ಉಪಯುಕ್ತ ಮಾಹಿತಿ ಒದಗಿಸಲಾಯಿತು.