ಹಾರೋಹಳ್ಳಿ | ‘ಗೃಹ ಲಕ್ಷ್ಮಿ’ ಯೋಜನೆ: ವಾರದಲ್ಲಿ 62.24 ಲಕ್ಷ ನೋಂದಣಿ

ಹಾರೋಹಳ್ಳಿ: ರಾಜ್ಯ ಸರ್ಕಾರದ ಗ್ಯಾರಂಟಿ ಯೋಜನೆಗಳಲ್ಲೊಂದಾದ ‘ಗೃಹ ಲಕ್ಷ್ಮಿ’ ಯೋಜನೆಗೆ ಒಂದು ವಾರದಲ್ಲಿ ರಾಜ್ಯದಾದ್ಯಂತ 62.24 ಲಕ್ಷ ಮಹಿಳೆಯರು ನೋಂದಣಿ (ಜುಲೈ 26ರವರೆಗೆ) ಮಾಡಿಕೊಂಡಿದ್ದಾರೆ. 1.28 ಕೋಟಿ ಫಲಾನುಭವಿಗಳಿದ್ದು ನೋಂದಣಿಯಲ್ಲಿ ಇದುವರೆಗೆ ಶೇ 48.43ರಷ್ಟು ಪ್ರಗತಿಯಾಗಿದೆ.

ಮನೆ ಯಜಮಾನಿ ಬ್ಯಾಂಕ್ ಖಾತೆಗೆ ಪ್ರತಿ ತಿಂಗಳು ₹2 ಸಾವಿರ ಪಾವತಿಸುವ ಸರ್ಕಾರದ ಈ ಮಹತ್ವಕಾಂಕ್ಷಿ ಯೋಜನೆಗೆ ಜುಲೈ 19ರಿಂದ ನೋಂದಣಿಗೆ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಚಾಲನೆ ನೀಡಲಾಗಿದೆ.

ಬೆಂ. ಗ್ರಾಮಾಂತರ ಮುಂದು: ನೋಂದಣಿಯಲ್ಲಿ ಇಡೀ ರಾಜ್ಯಕ್ಕೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯು ಮುಂದಿದೆ. ಇಲ್ಲಿ 2.33 ಲಕ್ಷ ಫಲಾನುಭವಿಗಳಿದ್ದು, ಶೇ 68ರಷ್ಟು ಮಹಿಳೆಯರು ನೋಂದಣಿ ಮಾಡಿಕೊಂಡಿದ್ದಾರೆ. ಎರಡನೇ ಸ್ಥಾನದಲ್ಲಿರುವ ಹಾವೇರಿ ಶೇ 65 ಹಾಗೂ ಚಿಕ್ಕಮಗಳೂರು ಶೇ 58ರಷ್ಟು ನೋಂದಣಿಯಾಗಿದೆ.

ಅತಿ ಹೆಚ್ಚು 12.19 ಲಕ್ಷ ಫಲಾನುಭವಿಗಳಿರುವ ಬೆಂಗಳೂರು ನಗರ ಜಿಲ್ಲೆಯು ಕೇವಲ ಶೇ 17ರಷ್ಟು ಪ್ರಗತಿ ಸಾಧಿಸಿದೆ. ಉಡುಪಿಯಲ್ಲಿ ಶೇ 40 ಹಾಗೂ ವಿಜಯನಗರದಲ್ಲಿ ಶೇ 42ರಷ್ಟು ಪ್ರಗತಿಯಾಗಿದೆ.

ನೇರ ನೊಂದಣಿ: ‘ಯೋಜನೆಗೆ ನೋಂದಣಿ ಮಾಡಿಕೊಳ್ಳಲು ಫಲಾನುಭವಿಗಳು ಯಾವ ಕೇಂದ್ರಕ್ಕೆ, ಎಷ್ಟು ಹೊತ್ತಿಗೆ ತೆರಳಿ ನೋಂದಣಿ ಮಾಡಿಸಬೇಕು ಎನ್ನುವ ಮಾಹಿತಿ ಫಲಾನುಭವಿಗಳ ಮೊಬೈಲ್ ಸಂಖ್ಯೆಗೆ ಸಂದೇಶ ಕಳುಹಿಸಲಾಗುತ್ತಿದೆ. ಆ ವೇಳಾಪಟ್ಟಿಯಂತೆ ನೋಂದಣಿ ಮಾಡಿಸುವ ಜೊತೆಗೆ, ಸಂದೇಶಕ್ಕೆ ಕಾಯದೆ ನೇರವಾಗಿ ನೋಂದಣಿ ಕೇಂದ್ರಗಳಿಗೆ ತೆರಳಿ, ಅಗತ್ಯ ದಾಖಲೆ ನೀಡಿ ನೋಂದಾಯಿಸಿಕೊಳ್ಳಬಹುದಾಗಿದೆ’ ಎಂದು ರಾಮನಗರ ಸಿಡಿಪಿಒ ನಾರಾಯಣಸ್ವಾಮಿ ತಿಳಿಸಿದರು.

‘ನೋಂದಣಿಗೆ ಸರ್ಕಾರ ಗಡುವು ವಿಧಿಸಿಲ್ಲ. ಫಲಾನುಭವಿಗಳು ಆತುರ ಮಾಡುವ ಅಗತ್ಯವಿಲ್ಲ. ನಿಧಾನವಾಗಿ ನೋಂದಣಿ ಮಾಡಬಹುದು. ನೋಂದಾಯಿತ ಫಲಾನುಭವಿಗಳಿಗೆ ಆಗಸ್ಟ್ 16ರ ನಂತರ ಪ್ರತಿ ತಿಂಗಳು ₹2 ಸಾವಿರ ಮೊತ್ತ ಬ್ಯಾಂಕ್ ಖಾತೆಗೆ ನೇರವಾಗಿ ಜಮಾ ಆಗಲಿದೆ’ ಎಂದು ಹೇಳಿದರು.

ಗೌರವಧನ ಹೆಚ್ಚಳಕ್ಕೆ ಒತ್ತಾಯ: ಗ್ರಾಮ ಒನ್ ಮತ್ತು ಕರ್ನಾಟಕ ಒನ್ ಕೇಂದ್ರ ನಡೆಸುವರಿಗೆ ಗೃಹ ಲಕ್ಷ್ಮಿ ನೋಂದಣಿಗೆ ನೀಡುವ ಗೌರವಧನವನ್ನು ಹೆಚ್ಚಿಸಬೇಕು. ಸದ್ಯ ಯಾವುದೇ ಶುಲ್ಕ ಪಡೆಯದೆ ನೋಂದಣಿ ಮಾಡಲಾಗುತ್ತಿದೆ. ಸರ್ಕಾರ ಗೌರವಧನ ಹೆಚ್ಚಿಸದಿದ್ದರೆ, ಕೇಂದ್ರ ನಿರ್ವಹಣೆಗೆ ಸಮಸ್ಯೆಯಾಗಲಿದೆ ಎಂದು  ಎಂದು ಗ್ರಾಮ ಒನ್ ಸಿಬ್ಬಂದಿ ಅಳಲು ತೋಡಿಕೊಂಡರು.