ರಾಮನಗರ: ಬಿರು ಬಿಸಿಲಿಗೆ ಹೆಚ್ಚಿದ ಕಾಳ್ಗಿಚ್ಚು

ರಾಮನಗರ: ಬೆಟ್ಟಗುಡ್ಡಗಳಿಂದ ಆವೃತ್ತವಾಗಿರುವ ರಾಮನಗರ ತಾಲ್ಲೂಕಿನಲ್ಲಿ ಬಿಸಿಲ ಬೇಗೆ ದಿನದಿಂದ ದಿನಕ್ಕೆ ಹೆಚ್ಚಾದಂತೆ, ಕಾಳ್ಗಿಚ್ಚು ಸಹ ಹೆಚ್ಚಾಗುತ್ತಿದೆ. ಸೂರ್ಯ ನೆತ್ತಿಗೆ ಬರುವ ಹೊತ್ತಿಗೆ ಹೊರಡೆಗೆ ಕಾಲಿಡುವುದಕ್ಕೂ ಆಗದಷ್ಟು ಬಿಸಿಲ ಝಳವಿದೆ. ಇದರಿಂದಾಗಿ ಕಾಳ್ಗಿಚ್ಚು ಸೇರಿದಂತೆ ಅಲ್ಲಲ್ಲಿ ಬೆಂಕಿ ಹೊತ್ತಿಕೊಳ್ಳುವುದು ಸಾಮಾನ್ಯ ಎಂಬಂತಾಗಿದೆ.

ಅರಣ್ಯ ಪ್ರದೇಶಗಳು, ಕುರಚಲು ಗಿಡಗಳು, ಒಣಗಿದ ಹುಲ್ಲು, ರಸ್ತೆ ಬದಿಯ ಗಿಡಗಂಟಿ, ರೈತರ ಹೊಲ, ಮಾವಿನ ತೋಟ, ಅಡಿಕೆ ತೋಟ, ರಾಗಿ ಮೆದೆ, ತ್ಯಾಜ್ಯದ ರಾಶಿ, ಕೈಗಾರಿಕಾ ಪ್ರದೇಶ, ಬೆಟ್ಟಗುಡ್ಡಗಳಲ್ಲೂ ಬೆಂಕಿ ಕಾಣಿಸಿಕೊಳ್ಳುತ್ತಲೇ ಇದೆ. ಹೆದ್ದಾರಿಗಳಲ್ಲಿ ವಾಹನಗಳು ಸಹ ಬೆಂಕಿಗಾಹುತಿಯಾಗುತ್ತಿವೆ. ಕೆಲ ಘಟನೆಗಳು ಮನುಷ್ಯರಿಂದಲೇ ಸಂಭವಿಸಿದ್ದರೆ, ಇನ್ನುಳಿದವು ಅತಿಯಾದ ಬಿಸಿಲಿನ ಕಾರಣಕ್ಕೆ ಸಂಭವಿಸುತ್ತಿವೆ.

87 ಪ್ರಕರಣ ವರದಿ: ‘ಜನವರಿ ತಿಂಗಳಿಂದ ಇಲ್ಲಿಯವರೆಗೆ ರಾಮನಗರ ತಾಲ್ಲೂಕಿನಲ್ಲಿ ಸುಮಾರು 87 ಕಡೆ ಬೆಂಕಿ ಅನಾಹುತದ ಘಟನೆಗಳು ವರದಿಯಾಗಿವೆ. ಸಣ್ಣ ಹಾಗೂ ದೊಡ್ಡ ಅರಣ್ಯ ಪ್ರದೇಶಗಳಿಂದಿಡಿದು ರಸ್ತೆ ಬದಿ, ರೈತರ ಹೊಲ, ತೋಟ, ತ್ಯಾಜ್ಯದ ರಾಶಿಗಳಲ್ಲೂ ಘಟನೆಗಳು ನಡೆಯುತ್ತಿದ್ದು, ದಿನಕ್ಕೆ ಕನಿಷ್ಠ ಎರಡು ಕರೆಗಳು ಬರುತ್ತವೆ’ ಎಂದು ರಾಮನಗರ ಅಗ್ನಿಶಾಮಕ ಠಾಣಾಧಿಕಾರಿ ಮೋಹನ ಮುದಿಗೌಡ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಬೇಸಿಗೆಯಲ್ಲಿ ರಸ್ತೆ ಬದಿ, ಹೊಲ ಹಾಗೂ ತೋಟದಲ್ಲಿ ಬೆಳೆದಿರುವ ಹುಲ್ಲು ಒಣಗಿರುತ್ತದೆ. ಅದನ್ನು ಸ್ವಚ್ಛಗೊಳಿಸುವ ಬದಲು ಜನರೇ ಬೆಂಕಿ ಹಚ್ಚುತ್ತಾರೆ. ಇದರಿಂದ ಸುಲಭವಾಗಿ ಒಣಗಿದ ಹುಲ್ಲು ತೆರವಾಗುತ್ತದೆ ಎಂಬುದು ಜನರ ಭಾವನೆ. ಇಂತಹ ಬೆಂಕಿ ಪ್ರಕರಣಗಳೇ ಇತ್ತೀಚೆಗೆ ಹೆಚ್ಚಾಗಿವೆ. ಈ ಕುರಿತು ಕರೆ ಬಂದ ಎಷ್ಟೋ ಕಡೆಗೆ ನಾವು ಹೋಗುವಷ್ಟರಲ್ಲಿ ಬೆಂಕಿ ತಾನಾಗಿ ನಂದಿ ಹೋಗಿರುತ್ತದೆ’ ಎಂದು ಹೇಳಿದರು.

ತ್ಯಾಜ್ಯಕ್ಕೆ ಬೆಂಕಿ: ನಗರ, ಪಟ್ಟಣ, ಗ್ರಾಮೀಣ ಭಾಗದಲ್ಲಿ ತ್ಯಾಜ್ಯಕ್ಕೆ ಬೆಂಕಿ ಹಾಕುವುದು ಇತ್ತೀಚೆಗೆ ಸಾಮಾನ್ಯವಾಗಿದೆ. ಸ್ಥಳೀಯರೇ ಬೆಂಕಿ ಹಚ್ಚುತ್ತಾರೆ. ಪ್ಲಾಸ್ಟಿಕ್ ಸೇರಿದಂತೆ ಇತರ ರೀತಿಯ ತ್ಯಾಜ್ಯಗಳು ಬೆಂಕಿಯಲ್ಲಿ ಉರಿದು ಬೂದಿಯಾಗುತ್ತವೆ. ಕೆಲವೊಮ್ಮೆ ಅಕ್ಕಪಕ್ಕ ಇರುವ ಆಸ್ತಿಪಾಸ್ತಿಗೂ ಹಾನಿಯಾಗುವುದುಂಟು.

‘ಬೆಂಕಿ ಘಟನೆಗೆ ಸಂಭವಿಸಿದಂತೆ ದಿನಕ್ಕೆ ಕನಿಷ್ಠ ಎರಡು ಕರೆಗಳು ಬರುತ್ತವೆ. ಅವುಗಳಲ್ಲಿ ದೊಡ್ಡ, ಮಧ್ಯಮ, ಸಣ್ಣ, ಅತಿ ಸಣ್ಣ ಎಂಬುದಾಗಿ ವಿಂಗಡಣೆ ಮಾಡಿಕೊಂಡು ನಾವು ಕಾರ್ಯಾಚರಣೆ ನಡೆಸುತ್ತೇವೆ. ವಾಹನಗಳ ಎಂಜಿನ್‌ಗಳಲ್ಲಿ ಉಷ್ಠಾಂಶ ಹೆಚ್ಚಾಗಿ ರಸ್ತೆಯಲ್ಲಿ ಬೆಂಕಿಗೆ ಆಹುತಿಯಾದಾಗಲೂ ಸ್ಥಳಕ್ಕೆ ಹೋಗಿ ಬೆಂಕಿ ಆರಿಸುತ್ತೇವೆ. ನಮ್ಮ ವ್ಯಾಪ್ತಿ ಮೀರಿದ ಪ್ರದೇಶದಲ್ಲಿ ಅಗ್ನಿ ಅವಘಡ ಸಂಭವಿಸಿದಾಗ, ನಮಗೂ ಕರೆ ಬರುತ್ತದೆ. ಆಗ ನಾವೂ ಸಹ ಅಲ್ಲಿಗೆ ಹೋಗಿ ಅಗ್ನಿ ನಂದಿಸುವ ಕಾರ್ಯಾಚರಣೆಯಲ್ಲಿ ಪಾಲ್ಗೊಳ್ಳುತ್ತೇವೆ’ ಎಂದು ಮೋಹನ ಮುದಿಗೌಡ ತಿಳಿಸಿದರು.

ಅರಣ್ಯದಲ್ಲಿ ಬೀಟಿಂಗ್ ವ್ಯವಸ್ಥೆ: ಅರಣ್ಯ‍ ಪ್ರದೇಶದಲ್ಲಿ ಬೆಂಕಿ ಹೊತ್ತಿಕೊಂಡಾಗ ಅಗ್ನಿಶಾಮಕ ವಾಹನಗಳು ಸುಲಭವಾಗಿ ಅಲ್ಲಿಗೆ ಹೋಗಿ ಕಾರ್ಯಾಚರಣೆ ನಡೆಸಲು ಸಾಧ್ಯವಾಗುವುದಿಲ್ಲ. ಹಾಗಾಗಿ, ಅರಣ್ಯ ಇಲಾಖೆ ಸಹಯೋಗದೊಂದಿಗೆ ಬೀಟಿಂಗ್ ವ್ಯವಸ್ಥೆಯನ್ನು ಅಗ್ನಿಶಾಮಕ ಇಲಾಖೆ ಮಾಡಿಕೊಂಡಿದೆ. ಎರಡೂ ಇಲಾಖೆಯವರ ನೇತೃತ್ವದ ಈ ಬೀಟಿಂಗ್ ಸಿಬ್ಬಂದಿ ಅಗ್ನಿ ಕಾಣಿಸಿಕೊಂಡಾಗ ನಂದಿಸುವ ಕಾರ್ಯಾಚರಣೆ ಕೈಗೊಳ್ಳುತ್ತಾರೆ.

ಜಲ ವಾಹನವು 4,500 ಲೀಟರ್ ಸಾಮರ್ಥ್ಯದ್ದಾಗಿರುವುದರಿಂದ ಬೆಂಕಿ ನಂದಿಸಲು ಕೆಲವೊಮ್ಮೆ ಅಷ್ಟು ನೀರು ಸಹ ಸಾಲುವುದಿಲ್ಲ. ಅದಕ್ಕಾಗಿ ಪಂಪ್ ಬಳಸಿ ಸ್ಥಳೀಯವಾಗಿಯೇ ಸಿಗುವ ಕೆರೆ, ಹಳ್ಳ ಅಥವಾ ಇತರ ನೀರಿನ ಮೂಲಗಳಿಂದ ನೀರು ಸಂಗ್ರಹಿಸಿ ಕಾರ್ಯಾಚರಣೆ ನಡೆಸುತ್ತೇವೆ. ಇದರಿಂದಾಗಿ ನೀರು ತುಂಬಿಸಿಕೊಳ್ಳುವುದಕ್ಕಾಗಿ ವಾಪಸ್ ಠಾಣೆಗೆ ಬರುವುದು ತಪ್ಪುತ್ತದೆ ಎಂದು ಅಗ್ನಿಶಾಮಕ ಸಿಬ್ಬಂದಿ ಹೇಳಿದರು.

ಅರಣ್ಯ, ರಸ್ತೆ ಬದಿ, ಸಾರ್ವಜನಿಕ ಹಾಗೂ ಸಾರ್ವಜನಿಕ ಸ್ಥಳಗಳಲ್ಲಿ ಬೆಂಕಿ ಕಾಣಿಸಿಕೊಂಡಾಗ ಸ್ಥಳಕ್ಕೆ ಅಗ್ನಿಶಾಮಕ ಸಿಬ್ಬಂದಿ ಬರುವುದಕ್ಕೆ ಮುಂಚೆ ಹೆಚ್ಚಿನ ಆಸ್ತಿ ನಷ್ಟವಾಗುವ ಸಾಧ್ಯತೆ ಇರುತ್ತದೆ. ಅಂತಹ ಸಂದರ್ಭಗಳಲ್ಲಿ ಜನರು ಸಹ ಲಭ್ಯ ನೀರನ್ನು ಬಳಸಿಕೊಂಡು ಬೆಂಕಿ ನಂದಿಸಲು ಪ್ರಯತ್ನಿಸಬೇಕು. ಅಂತಹ ಪರಿಸ್ಥಿತಿಯನ್ನು ಹೇಗೆ ನಿಭಾಯಿಸಬೇಕು ಎಂಬುದರ ಕುರಿತು ಠಾಣೆಯು ಸಾರ್ವಜನಿಕರಿಗೆ ಉಚಿತವಾಗಿ ತರಬೇತಿ ನೀಡುತ್ತದೆ ಎನ್ನುತ್ತಾರೆ ಸಿಬ್ಬಂದಿ.