ಹಾರೋಹಳ್ಳಿ | ಕೋಳಿ ಫಾರಂಗೆ ನೀರು: ಅಪಾರ ಹಾನಿ

ಹಾರೋಹಳ್ಳಿ: ಶನಿವಾರ ಸಂಜೆ ಬಿದ್ದ ಬಿರುಗಾಳಿ ಸಹಿತ ಮಳೆಯಿಂದ ಕೋಳಿ ಫಾರಂಗೆ ನೀರು ನುಗ್ಗಿ ಲಕ್ಷಾಂತರ ನಷ್ಟ ಉಂಟಾಗಿದೆ. 

ಹಾರೋಹಳ್ಳಿ ತಾಲ್ಲೂಕಿನ ಕೀರಣಗೆರೆಯ ಐಶ್ವರ್ಯ ಕೋಳಿ ಫಾರಂನ ಕೋಳಿ ಪೀಡ್ (ಆಹಾರ) ಸಂಗ್ರಹಿಸಿದ್ದ ಕೊಠಡಿಗೆ ಭಾರೀ ಪ್ರಮಾಣದಲ್ಲಿ ನೀರು ನುಗ್ಗಿದ್ದು, ಸುಮಾರು ₹35 ರಿಂದ ₹40 ಲಕ್ಷ ನಷ್ಟ ಉಂಟಾಗಿದೆ ಎಂದು ಅಂದಾಜಿಸಲಾಗಿದೆ.

ತಾಲ್ಲೂಕಿನ ಹಲವು ಕಡೆ ಮರಗಳು ಬಿದ್ದಿದ್ದು, ರಾತ್ರಿಯಿಂದ ವಿದ್ಯುತ್ ಸಂಪರ್ಕ ಕಡಿತಗೊಂಡಿದೆ. ಕೆಲವೆಡೆ ಮನೆಯ ಚಾವಣಿ, ಹೆಂಚುಗಳು ಹಾರಿ ಹೋಗಿವೆ.

ಸ್ವಂತ ಉದ್ಯೋಗ ಮಾಡಬೇಕೆಂದು ಸಾಲ ಮಾಡಿ ಕೋಳಿ ಫಾರಂ ಮಾಡಿದ್ದು, ಅದನ್ನು ನೀರು ನುಗ್ಗಿ ಅಪಾರ ನಷ್ಟವಾಗಿದೆ. ಹಾಗಾಗಿ ಸರ್ಕಾರ ಕೂಡಲೇ ಪರಿಹಾರ ನೀಡಬೇಕೆಂದು ಕೋಳಿ ಫಾರಂ ಮಾಲೀಕ ಎಸ್‌. ತ್ರಿನಾಥ್ ರೆಡ್ಡಿ ಮನವಿ ಮಾಡಿದ್ದಾರೆ.