ಕಸ ವಿಲೇವಾರಿ ಘಟಕ; ಮೂಲ ಸೌಕರ್ಯಕ್ಕೆ ಒತ್ತು

ರಾಮನಗರ: ಘನತ್ಯಾಜ್ಯ ವಿಲೇವಾರಿಗೆ ಹೆಚ್ಚುವರಿ ಘಟಕ ಸ್ಥಾಪನೆ, ನಿರಾಶ್ರಿತರಿಗೆ ಮನೆಗಳ ನಿರ್ಮಾಣ, ಉದ್ಯಾನ ಸ್ಮಶಾನಗಳ ಅಭಿವೃದ್ಧಿ...

ಇದು ಈ ಬಾರಿಯ ರಾಮನಗರ ನಗರಸಭೆ ಬಜೆಟ್‌ನ ಪ್ರಮುಖ ಅಂಶಗಳು. ಇಲ್ಲಿನ ನಗರಸಭೆಯ ಪ್ರಶಸ್ತಿ ಭವನದಲ್ಲಿ ಅಧ್ಯಕ್ಷೆ ರತ್ನಮ್ಮ ಪಾಪಣ್ಣ ನೇತೃತ್ವದಲ್ಲಿ ಉಪಾಧ್ಯಕ್ಷೆ ಮಂಗಳಾ ಶಂಭುಲಿಂಗಯ್ಯ 2019–20ನೇ ಸಾಲಿಗೆ ₨59.52ಲಕ್ಷ ಉಳಿತಾಯ ಬಜೆಟ್‌ ಅನ್ನು ಗುರುವಾರ ಮಂಡಿಸಿದರು.

ನಗರಸಭೆಯ ವ್ಯಾಪ್ತಿಯಲ್ಲಿ ಈಗಾಗಲೇ ಒಂದು ಒಣ ತ್ಯಾಜ್ಯ ವಿಂಗಡಣಾ ಘಟಕ, ಮೂರು ಹಸಿತ್ಯಾಜ್ಯ ಸಂಸ್ಕರಣ ಘಟಕ ಹಾಗೂ ಕಸದಿಂದ ವಿದ್ಯುತ್‌ ತಯಾರಿಸುವ ಬಯೋಮಿಥೇನ್‌ ಘಟಕ ಕಾರ್ಯ ನಿರ್ವಹಿಸುತ್ತಿದೆ . ಈ ಬಜೆಟ್‌ನಲ್ಲಿ ಇನ್ನೊಂದು ಘಟಕ ಸ್ಥಾಪಿಸಲು ಉದ್ದೇಶಿಸಲಾಗಿದೆ.

ನಗರದಲ್ಲಿ ಈಗಾಗಲೇ ಇ–ಶೌಚಾಲಯಗಳ ನಿರ್ಮಾಣ ಕಾಮಗಾರಿ ಪೂರ್ಣಗೊಂಡಿದ್ದು, ಮುಂದೆ ಅವಶ್ಯವಿರುವ ಕಡೆ ಹೆಚ್ಚು ಶೌಚಾಲಯಗಳನ್ನು ನಿರ್ಮಿಸಲು ಯೋಜಿಸಲಾಗಿದೆ. ಬೇಸಿಗೆಯಲ್ಲಿ ಕುಡಿಯುವ ನೀರು ನಿರ್ವಹಣೆಗೆ ಸರ್ಕಾರ ₨1 ಕೋಟಿ ಅನುದಾನ ನೀಡುವ ನಿರೀಕ್ಷೆ ಇದನ್ನು ನೀರು ಸರಬರಾಜು ಕಾಮಗಾರಿಗಳಿಗೆ ಬಳಸಲು ಯೋಜಿಸಲಾಗಿದೆ.

ಉದ್ಯಾನ ಅಭಿವೃದ್ಧಿ: ನಗರಸಭೆಯಲ್ಲಿನ ಉದ್ಯಾನಗಳ ಅಭಿವೃದ್ಧಿ ಹಾಗೂ ರಸ್ತೆ ಬದಿಯಲ್ಲಿ ಗಿಡ ನೆಡಲು ಯೋಜಿಸಲಾಗಿದ್ದು, ಇದಕ್ಕಾಗಿ ₨75 ಲಕ್ಷ ತೆಗೆದಿಡಲಾಗಿದೆ. ಎಸ್‌ಎಫ್‌ಸಿ ಅನುದಾನದಲ್ಲಿ ರಸ್ತೆ, ಚರಂಡಿ ಕಾಮಗಾರಿಗಾಗಿ ₨10 ಕೋಟಿ ಹಾಗೂ ಶುದ್ಧ ನೀರು ಘಟಕಗಳ ನಿರ್ಮಾಣಕ್ಕೆ ₨2.5 ಕೋಟಿ ಸಿಗಲಿದೆ. 14ನೇ ಹಣಕಾಸು ಯೋಜನೆಯ ಅಡಿ ಮೂಲ ಸೌಕರ್ಯ ಅಭಿವೃದ್ಧಿಗೆ ₨9 ಕೋಟಿ ಸಿಗಲಿದೆ. ಕುಡಿಯುವ ನೀರು ವ್ಯವಸ್ಥೆಯ ನಿರ್ವಹಣೆಗೆ ₨5.6 ಕೋಟಿ ಹಂಚಲಾಗಿದೆ.

ನಗರದ ಸ್ವಚ್ಛತೆ ಮತ್ತು ನೈರ್ಮಲಕ್ಕೆಂದು ₨2.75 ಕೋಟಿ ಅನುದಾನ ಸಿಗಲಿದೆ. ಬೀದಿದೀಪಗಳ ನಿರ್ವಹಣೆಗೆ ₨60 ವೆಚ್ಚ ಆಗಲಿದ್ದು, ಹಳೆಯ ದೀಪಗಳಿಗೆ ಬದಲಾಗಿ ಎಲ್‌ಇಡಿ ದೀಪಗಳು ಬರಲಿವೆ. ಸ್ಮಶಾನಗಳ ಅಭಿವೃದ್ಧಿಗೆ ₨50 ಲಕ್ಷ ಇಡಲಾಗಿದೆ. ಪರಿಶಿಷ್ಟ ಜಾತಿ, ಪಂಗಡ ಮತ್ತು ಅಂಗವಿಕಲರ ಕಲ್ಯಾಣ ಕಾರ್ಯಕ್ರಮಗಳಿಗೆ ₨1.74 ಕೋಟಿ ಮೀಸಲಾಗಿದೆ. ವಿದ್ಯುತ್‌ ಬಿಲ್‌ಗಳನ್ನು ಕಟ್ಟಲು ₨1.75 ಕೋಟಿ ವಿನಿಯೋಗವಾಗಲಿದೆ. ₨5 ಲಕ್ಷ ವೆಚ್ಚದಲ್ಲಿ ಡಸ್ಟ್‌ ಬಿನ್ ಖರೀದಿಸಿ ಮನೆಮನೆಗೆ ಹಂಚುವ ಗುರಿ ಹೊಂದಲಾಗಿದೆ.

ಆದಾಯದ ಮೂಲ: ನಗರಸಭೆಯ ಬಜೆಟ್‌ ನಲ್ಲಿ ಪ್ರಮುಖವಾಗಿ ವಿವಿಧ ಯೋಜನೆಗಳಡಿ ಬಿಡುಗಡೆಯಾಗಿ ವೆಚ್ಚವಾಗದ ಬ್ಯಾಂಕ್ ಶಿಲ್ಕು ₨5.81 ಕೋಟಿ ಹಾಗೂ ಪ್ರಸಕ್ತ ಸಾಲಿನ ನಿರೀಕ್ಷಿತ ಆದಾಯ ₨42.76 ಕೋಟಿ ಇದೆ. ನಗರಸಭೆಗೆ ಆಸ್ತಿ ತೆರಿಗೆಯು ಪ್ರಮುಖ ಆದಾಯವಾಗಿದ್ದು, ಈ ವರ್ಷ ತೆರಿಗೆಯ ರೂಪದಲ್ಲಿ ₨4 ಕೋಟಿ ಹಾಗೂ ದಂಡದ ರೂಪದಲ್ಲಿ ₨75 ಲಕ್ಷ ಆದಾಯ ನಿರೀಕ್ಷಿಸಲಾಗಿದೆ. ಇದಲ್ಲದೆ ವಾಣಿಜ್ಯ ಸಂಕೀರ್ಣಗಳಿಂದ ಬಾಡಿಗೆ ₨25 ಲಕ್ಷ, ಕಟ್ಟಡಗಳಿಂದ ಬಾಡಿಗೆ ₨2.5 ಲಕ್ಷ, ಅಂಬೇಡ್ಕರ್ ಭವನ ಮತ್ತು ಪುರಭವನಗಳ ಬಾಡಿಗೆ ₨5 ಲಕ್ಷ, ಕಟ್ಟಡ ಪರವಾನಗಿ ಶುಲ್ಕದಿಂದ ₨25 ಲಕ್ಷ, ಉದ್ದಿಮೆ ಪರವಾನಗಿ ಶುಲ್ಕದಿಂದ ₨40 ಲಕ್ಷ ಆದಾಯವನ್ನು ನಗರಸಭೆಯು ನಿರೀಕ್ಷಿಸಿದೆ.

ರಸ್ತೆ ಅಗೆತ ಮತ್ತು ಪುನಃಸ್ಥಾಪನೆ ಶುಲ್ಕದಿಂದ ₨15 ಲಕ್ಷ, ಜಾಹೀರಾತು ತೆರಿಗೆಯಿಂದ ₨10 ಲಕ್ಷ, ಟೆಂಡರ್ ಫಾರಂ ಮಾರಾಟದಿಂದ ₨1 ಲಕ್ಷ, ಜನನ - ಮರಣ ಪ್ರಮಾಣ ಪತ್ರಗಳ ಶುಲ್ಕದಿಂದ ₨1.25ಲಕ್ಷ ಬರಲಿದೆ. ಕರ ಸಂಗ್ರಹಣ ಶುಲ್ಕ ₨5 ಲಕ್ಷ ಹಾಗೂ ಅಕ್ರಮ ಸಕ್ರಮದಿಂದ ₨25 ಲಕ್ಷ ಆದಾಯ ನಿರೀಕ್ಷಸಲಾಗಿದೆ. ನಗರಸಭೆ ಅýಧಿಕಾರಿ ಮತ್ತು ನೌಕರರ ವೇತನಕ್ಕಾಗಿ ₨4.25ಕೋಟಿ, ಬ್ಯಾಂಕ್ ಖಾತೆಗಳಿಂದ ಬಡ್ಡಿ ₨20ಲಕ್ಷ, ಪ್ರೋತ್ಸಾಹ ಧನದಿಂದ ₨5 ಲಕ್ಷ ಆದಾಯ ಬರುವ ಲೆಕ್ಕಚಾರವಿದೆ ಎಂದು ಮಂಗಳಾ ಮಾಹಿತಿ ನೀಡಿದರು.

ಪೌರಾಯುಕ್ತೆ ಬಿ. ಶುಭಾ, ಸದಸ್ಯರು ಹಾಗೂ ನಾಮನಿರ್ದೇಶಿತ ಸದಸ್ಯರು ಇದ್ದರು.