ತ್ಯಾಗರ್ತಿ: ಮಲೆನಾಡು ವೀಕ್ಷಿಸಲು ಸೈಕಲ್ ಪ್ರವಾಸ

ತ್ಯಾಗರ್ತಿ: ‘ಪ್ರವಾಸಿ ತಾಣಗಳ ಮಹತ್ವ ಸಾರುವುದು ಮತ್ತು ಇಂಧನ ಬಳಕೆಯಿಲ್ಲದ ಪರಿಸರ ಸ್ನೇಹಿ ಸೈಕಲ್ ಬಳಕೆಯ ಜಾಗೃತಿ ಮೂಡಿಸುವ ಉದ್ದೇಶದಿಂದ ಟೂರ್ ಆಫ್ ಕರ್ನಾಟಕ ಸಂಸ್ಥೆಯು ಸೈಕಲ್ ಮೂಲಕ ಪ್ರವಾಸ ನಡೆಸುತ್ತಿದೆ’ ಎಂದು ಸಂಸ್ಥೆಯ ಮುಖ್ಯಸ್ಥ ಬೆಂಗಳೂರಿನ ನಾಗೇಶ ರಾವ್ ಹೇಳಿದರು.

ಆನಂದಪುರದ ಮೂಲಕ ಬುಧವಾರ ಟೂರ್ ಆಫ್ ಕರ್ನಾಟಕ ಸಂಸ್ಥೆಯ ಸದಸ್ಯರು ರಿಪ್ಪನ್‌ಪೇಟೆ, ಆಯನೂರು, ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಮಡಿಕೇರಿ ಮೂಲಕ ಮಲೆನಾಡು ತಾಣಗಳಿಗೆ ಭೇಟಿ ನೀಡಿ ಬೆಂಗಳೂರು ಸೇರುವುದಾಗಿ ಹೇಳಿದರು.

11ನೇ ವರ್ಷದ ಸೈಕಲ್ ಪ್ರವಾಸ ಇದಾಗಿದ್ದು, ನಾಲ್ಕು ದಿನಗಳ ಸೈಕಲ್ ಯಾತ್ರೆಯಲ್ಲಿ ರಾಜ್ಯ, ಹೊರ ರಾಜ್ಯ ಮತ್ತು ವಿದೇಶಗಳಲ್ಲಿನ ಒಟ್ಟು 60 ಸದಸ್ಯರು ಪಾಲ್ಗೊಂಡಿದ್ದರು. ಮೈಸೂರು ಇತಿಹಾಸ ಕಥೆಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಚಾರ ನಡೆಸುತ್ತಿರುವ ಧರ್ಮೆಂದ್ರಕುಮಾರ್ ಸೇರಿ ಹಲವು ಗಣ್ಯರು ಈ ಸೈಕಲ್ ಪ್ರವಾಸದಲ್ಲಿ ಮಲೆನಾಡಿನ ಪ್ರಮುಖ ಸ್ಥಳಗಳ ಸಂದರ್ಶನ ನಡೆಸಿದರು.

ಚೇತನ್‌ರಾವ್, ಫಣೀಶ್, ಸತೀಶ್, ಪಂಚಮ್, ಕಾರ್ತಿಕ ಈ ಸಂಘಟನೆಯ ಮುಂಚೂಣಿಯಲ್ಲಿದ್ದರು.