ಶಿವಮೊಗ್ಗ: ಶುಂಠಿಗೆ ಬೆಂಕಿ ರೋಗ; ಬೆಳೆಗಾರ ಚಿಂತಾಕ್ರಾಂತ

ಶಿವಮೊಗ್ಗ: ಮಲೆನಾಡಿನಲ್ಲಿ ಶುಂಠಿ ಬೆಳೆಗೆ ಬೆಂಕಿ ರೋಗ ವ್ಯಾಪಕವಾಗಿ ಹರಡುತ್ತಿದೆ. ಹಸಿರು ಹೊದ್ದು ಕಂಗೊಳಿಸುತ್ತಿದ್ದ ಬೆಳೆ, ರಾತ್ರಿ ಕಳೆದು ಬೆಳಗಾಗುವ ಹೊತ್ತಿಗೆ ಒಣಗಿ ಹೋದಂತೆ ಕಾಣುತ್ತಿದೆ. ಬೆಳೆಯಲ್ಲಿ ಹೀಗೆ ಅತಿ ವೇಗದ ಬದಲಾವಣೆಯಾಗುತ್ತಿರುವುದನ್ನು ಕಂಡು ಬೆಳೆಗಾರರು ಚಿಂತಾಕ್ರಾಂತರಾಗಿದ್ದಾರೆ.

ಮೊದಲ ಬಾರಿಗೆ ಈ ಭಾಗದಲ್ಲಿ ಶುಂಠಿಗೆ ‘ಫೈರಿಕ್ಯುಲಾರಿಯಾ’ ಎಂಬ ಶಿಲೀಂಧ್ರ ರೋಗ ದೊಡ್ಡ ಪ್ರಮಾಣದಲ್ಲಿ ಬಾಧಿಸಿದೆ. ಬೆಳೆ ಸುಟ್ಟಂತೆ ಕಾಣುವುದರಿಂದ ರೈತರು ಅದನ್ನು ಬೆಂಕಿ ರೋಗ ಎಂಬ ಹೆಸರಿನಿಂದ ಕರೆಯುತ್ತಿದ್ದಾರೆ. ಕಳೆದ ವರ್ಷ ಕೊಡಗು ಜಿಲ್ಲೆಯಲ್ಲಿ ಕಾಣಿಸಿಕೊಂಡಿದ್ದ ಈ ರೋಗ, ಹಂಗಾಮಿನ ಕೊನೆಯಲ್ಲಿ ಚಿಕ್ಕಮಗಳೂರು ಜಿಲ್ಲೆಯ ಕೆಲವೆಡೆ ಬಾಧಿಸಿತ್ತು. ಈ ಬಾರಿ ಶಿವಮೊಗ್ಗ ಜಿಲ್ಲೆಯಲ್ಲೂ ಹೆಚ್ಚಿನ ಪ್ರಮಾಣದಲ್ಲಿ ಕಾಣಿಸಿಕೊಂಡಿದೆ ಎಂದು ಕೆಳದಿ ಶಿವಪ‍್ಪ ನಾಯಕ ಕೃಷಿ ಮತ್ತು ತೋಟಗಾರಿಕೆ ವಿಶ್ವವಿದ್ಯಾಲಯದ ಸಹ ಪ್ರಾಧ್ಯಾಪಕ ಎಂ.ವೈ.ಉಲ್ಲಾಸ್ ಹೇಳುತ್ತಾರೆ.

ಈ ರೋಗಕ್ಕೆ ತುತ್ತಾಗಿರುವ ಶುಂಠಿ ಬೆಳೆಯ ಎಲೆಗಳ ಮೇಲೆ ಕಪ್ಪು ಚುಕ್ಕೆಗಳು ಮೂಡಿ, ನಂತರ ಎಲೆಗಳು ಹಳದಿ ಬಣ್ಣಕ್ಕೆ ತಿರುಗಿ ಸುಟ್ಟಂತೆ ಭಾಸವಾಗುತ್ತವೆ. ಕೆಲವು ಶುಂಠಿ ತೋಟಗಳು ಸಂಪೂರ್ಣವಾಗಿ ನಾಶವಾಗಿವೆ. ಈ ರೋಗ ಬಾಧೆಗೊಳಗಾದ ತಾಕುಗಳು ಕಳೆ ನಾಶಕ ಸಿಂಪಡಿಸಿರುವಂತೆ ಕಾಣುತ್ತವೆ.

ಶೇ 90ರಷ್ಟು ಬಾಧೆ:

‘ನಮ್ಮಲ್ಲಿ ಶೇ 90ರಷ್ಟು ಬೆಳೆಗೆ ಶಿಲೀಂಧ್ರ ಬಾಧಿಸಿದೆ. ಕಳೆದ ವರ್ಷ ಬೆಳೆಯ ಕೊನೆಯ ಹಂತದಲ್ಲಿ ರೋಗ ಕಾಣಿಸಿಕೊಂಡಿತ್ತು. ಆದರೆ ಈ ವರ್ಷ ಅತಿಯಾದ ತೇವಾಂಶವಿರುವುದರಿಂದ ಬೆಳೆಗೆ ಪೂರ್ವಾರ್ಧದಲ್ಲಿಯೇ ರೋಗದ ಹಾವಳಿ ಹೆಚ್ಚಾಗಿದೆ’ ಎಂದು ಆನಂದಪುರದ ಶುಂಠಿ ಬೆಳೆಗಾರ ಎಚ್.ಸಿ.ಸತೀಶಚಂದ್ರ ಹೇಳುತ್ತಾರೆ. ಅವರು ಮೂರು ಎಕರೆಯಲ್ಲಿ ಶುಂಠಿ ನಾಟಿ ಮಾಡಿದ್ದು, ಸಂಪೂರ್ಣ ರೋಗ ಬಾಧೆಗೆ ತುತ್ತಾಗಿದೆ.

ಔಷಧೋಪಚಾರದ ಕಿವಿಮಾತು:

ರೋಗದ ಹಾವಳಿ ಪ್ರಾರಂಭಿಕ ಹಂತದಲ್ಲಿ ಇದ್ದರೆ, ಅಂದರೆ ಕಪ್ಪುಬಣ್ಣದ ಚುಕ್ಕೆಗಳು ಎಲೆಯ ಮೇಲೆ ಕಂಡುಬಂದಲ್ಲಿ, ತಕ್ಷಣವೇ ಟೆಬುಕೊನಜೋಲ್ 1 ಎಂಎಲ್ ಪ್ರತಿ ಲೀಟರ್ ನೀರಿಗೆ ಬೆರೆಸಿ ಸಿಂಪಡಿಸಬೇಕು. ಅದರೊಟ್ಟಿಗೆ ಪ್ರಾಪಿಕೊನಜೋಲ್ 1 ಎಂಎಲ್ ಪ್ರತಿ ಲೀಟರ್‌ಗೆ ಬೆರೆಸಿ ಸಿಂಪಡಿಸಬೇಕು. ರೋಗ ಕಡಿಮೆ ಆಗುವವರೆಗೂ ಯಾವುದೇ ರಾಸಾಯನಿಕ ಗೊಬ್ಬರ ಬಳಸಬಾರದು ಎಂದು ಪ್ರೊ.ಉಲ್ಲಾಸ್ ಸಲಹೆ ನೀಡುತ್ತಾರೆ.

ಬಾಧೆ ತೀವ್ರವಾದ ತಾಕುಗಳಲ್ಲಿ ಸಾಧ್ಯವಾದಷ್ಟು ಬೇಗ ಔಷಧಿ ಸಿಂಪರಣೆ ಮಾಡುವುದು ಸೂಕ್ತ. 15 ದಿನಗಳ ಅಂತರದಲ್ಲಿ ಸಿಂಪಡಣೆ ಪುನರಾವರ್ತಿಸಬೇಕು. ಈ ರೋಗವು ಶೀಘ್ರ ಪಸರಿಸುತ್ತಿದೆ. ಇದರಿಂದ ಎಲ್ಲಾ ಬೆಳೆಗಾರರು ಶಿಲೀಂಧ್ರ ನಾಶಕಗಳನ್ನು ಸಿಂಪಡಿಸುವುದು ಹೆಚ್ಚು ಸೂಕ್ತ.

ಒಂದು ಲೀಟರ್ ನೀರಿನಲ್ಲಿ ಎರಡು ಗ್ರಾಂ ಮ್ಯಾನ್ಕೋಜೆಬ್ ಬೆರೆಸಿ ಶುಂಠಿ ಬೀಜವನ್ನು ಆ ದ್ರಾವಣದಲ್ಲಿ 30 ನಿಮಿಷ ನೆನೆಸಿಟ್ಟರೆ ರೋಗವನ್ನು ನಿಯಂತ್ರಿಸಬಹುದಾಗಿದೆ. ಭಾರತೀಯ ಸಾಂಬಾರು ಬೆಳೆ ಸಂಶೋಧನಾ ಕೇಂದ್ರದ ವಿಜ್ಞಾನಿಗಳು ಈ ರೋಗದ ಬಗ್ಗೆ ಹೆಚ್ಚಿನ ಅಧ್ಯಯನ ನಡೆಸಿದ್ದಾರೆ. ಅದರ ಪೂರ್ತಿ ವಿವರ ಅದರ ಜಾಲತಾಣದಲ್ಲಿ ಲಭ್ಯವಿದೆ ಎನ್ನುತ್ತಾರೆ.