ಹೊಳೆಹೊನ್ನೂರು: ಉಪಯೋಗಕ್ಕೆ ಬಾರದ ಉಪ ಕೃಷಿ ಉತ್ಪನ್ನ ಮಾರುಕಟ್ಟೆ

ಹೊಳೆಹೊನ್ನೂರು: ಎರಡು ವರ್ಷಗಳ ಹಿಂದೆ ಉದ್ಘಾಟನೆಗೊಂಡಿರುವ ಪಟ್ಟಣದ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿ ಇಂದಿಗೂ ಕಾರ್ಯಾರಂಭ ಮಾಡಿಲ್ಲ.

ಸರ್ಕಾರ ಕೋಟ್ಯಂತರ ರೂಪಾಯಿ ಖರ್ಚು ಮಾಡಿ, ರೈತರಿಗೆ ಅನುಕೂಲವಾಗಲೆಂದು ಪಟ್ಟಣದಲ್ಲಿ ಉಪ ಮಾರುಕಟ್ಟೆ ನಿರ್ಮಾಣ ಮಾಡಿದೆ. ಎರಡು ವರ್ಷಗಳ ಹಿಂದೆ ಉದ್ಘಾಟನೆಯಾದ ಈ ಕಟ್ಟಡದಲ್ಲಿ ಇದುವರೆಗೂ ಯಾವುದೇ ವಹಿವಾಟು ನಡೆಯುತ್ತಿಲ್ಲ.

ಉಪ ಮಾರುಕಟ್ಟೆಗೆ ಸಾಕಷ್ಟು ಬಂಡವಾಳ ಹಾಕಿ, ಜಮೀನು ಖರೀದಿ ಮಾಡಿ, ಕಟ್ಟಡ, ಗೋದಾಮು, ಪ್ರಾಂಗಣ ನಿರ್ಮಾಣ ಸೇರಿ ಕೆಲವು ಮಳಿಗೆಗಳನ್ನು ಸ್ಥಾಪಿಸಲಾಗಿದೆ. ರೈತರು ಬೆಳೆದ ಬೆಳೆಗಳ ವಹಿವಾಟನ್ನು ಮಾರುಕಟ್ಟೆಯಲ್ಲೇ ನಡೆಸುವಂತೆ ಸರ್ಕಾರ ಕಾನೂನು ಜಾರಿಗೆ ತಂದಿದೆ. ಇದರಿಂದ ರೈತರಿಗೆ ಅನುಕೂಲವಾಗುವ ಜೊತೆಗೆ ಸರ್ಕಾರಕ್ಕೂ ಸೆಸ್ ಮೂಲಕ ಆದಾಯ ಬರಲಿದೆ.

ರೈತರು, ತಾವು ಬೆಳೆದ ಬೆಳೆಗಳನ್ನು ತಾಲ್ಲೂಕು ಕೇಂದ್ರ ಭದ್ರಾವತಿಗೆ ತೆಗೆದುಕೊಂಡು ಹೋಗಬೇಕಿತ್ತು. ಅದನ್ನು ತಡೆಯಲು ಉಪ ಮಾರುಕಟ್ಟೆ ನಿರ್ಮಾಣ ಮಾಡಿದ್ದರೂ ಇದುವರೆಗೂ ಯಾವುದೇ ಪ್ರಯೋಜನವಾಗಿಲ್ಲ.

ಈ ಉಪ ಮಾರುಕಟ್ಟೆ ಸಮಿತಿ ಪ್ರಾಂಗಣ ಬಿಡಾಡಿ ದನಗಳ ತಾಣವಾಗಿದೆ. ಈ ಪ್ರಾಂಗಣದ ಪಕ್ಕದಲ್ಲಿ ನಾಲ್ಕೈದು ಬಾರ್‌ಗಳಿವೆ. ಗೇಟ್ ಇದ್ದರೂ ಸಂಜೆ ವೇಳೆ ಕುಡುಕರ ಅಡ್ಡೆಯಾಗಿ ಮಾರ್ಪಟ್ಟಿದೆ. ಇದಕ್ಕೆಲ್ಲ ಆಡಳಿತ ಮಂಡಳಿಯೇ ನೇರ ಹೊಣೆ ಎಂದು ರೈತರು ದೂರುತ್ತಾರೆ.

ನಾಲ್ಕೈದು ವರ್ಷಗಳಿಂದಲೂ ಈ ಮಾರುಕಟ್ಟೆ ಸ್ಥಳ ಯಾವ ಕಾರ್ಯಕ್ಕೂ ಉಪಯೋಗವಾಗುತ್ತಿಲ್ಲ. ಅಲ್ಲದೇ ಇಷ್ಟೊಂದು ವಿಶಾಲವಾದ ಮೈದಾನ ಪಟ್ಟಣದ ಸುತ್ತಮುತ್ತ ಎಲ್ಲಿಯೂ ಇಲ್ಲದೇ ಇರುವುದರಿಂದ ಈ ಸ್ಥಳದ ಅವಶ್ಯಕತೆ ಪಟ್ಟಣಕ್ಕೆ ಇದೆ. ಮಾರುಕಟ್ಟೆಯ ಮುಖ್ಯ ಗೇಟ್ ಬಳಿ ವಾರಕ್ಕೊಮ್ಮೆ ಸಂತೆ ನಡೆಯುತ್ತಿರುವುದೇ ಉತ್ತಮ ಸಂಗತಿಯಾಗಿದೆ. ಅಧಿಕಾರಿಗಳ ನಿರ್ಲಕ್ಷ್ಯ ಹಾಗೂ ಆಡಳಿತ ಮಂಡಳಿಯ ಧೋರಣೆಯಿಂದಾಗಿ ಮಾರುಕಟ್ಟೆ ಪ್ರಾರಂಭ ಸಾಧ್ಯವಾಗಿಲ್ಲ. ಉಪ ಮಾರುಕಟ್ಟೆಯನ್ನು ಆದಷ್ಟು ಬೇಗ ಪ್ರಾರಂಭ ಮಾಡಲಿ ಎಂಬುದು ರೈತರ ಒತ್ತಾಯ.