ಕ್ರಸ್ಟ್ ಗೇಟ್ ಮಟ್ಟ ತಲುಪಿದ ಲಿಂಗನಮಕ್ಕಿ ಅಣೆಕಟ್ಟೆ ಜಲಮಟ್ಟ

ಕಾರ್ಗಲ್: ನಿರಂತರ ಮಳೆಯಿಂದಾಗಿ ಲಿಂಗನಮಕ್ಕಿ ಅಣೆಕಟ್ಟೆಗೆ ನೀರು ಹರಿದುಬರುತ್ತಿದ್ದು, ನೀರಿನ ಮಟ್ಟ ಕ್ರಸ್ಟ್ ಗೇಟ್ ತಳಮಟ್ಟ ದಾಟಿದೆ. (1,796.60 ಅಡಿ)

‘1,819 ಅಡಿ ಗರಿಷ್ಠ ಮಟ್ಟ ಜಲಸಂಗ್ರಹಣಾ ಸಾಮರ್ಥ್ಯ ಹೊಂದಿರುವ ಜಲಾಶಯದಲ್ಲಿ 1,795 ಅಡಿಯನ್ನು ಬೆಡ್ ಲೆವೆಲ್ ಎಂದು ಗುರುತಿಸಲಾಗಿದೆ. ಈ ಮಟ್ಟದಲ್ಲಿ ಭರ್ತಿಯಾದ ನೀರು ಅಣೆಕಟ್ಟೆಯ ಅರ್ಧ ಭಾಗದ ಸಾಮರ್ಥ್ಯ ಹೊಂದಿರುತ್ತದೆ. ಅಣೆಕಟ್ಟೆ ಭರ್ತಿಯಾಗಬೇಕಾದರೆ ಇನ್ನೂ 22.40 ಅಡಿಗಳಷ್ಟು ನೀರು ಸಂಗ್ರಹ ಆಗಬೇಕಾದ ಅಗತ್ಯವಿದೆ’ ಎಂದು ಕೆಪಿಸಿ ಮುಖ್ಯ ಎಂಜಿನಿಯರ್ ಕಚೇರಿ ಅಧಿಕಾರಿಗಳು ಮಾಹಿತಿ ನೀಡಿದರು.

‘ಲಿಂಗನಮಕ್ಕಿ ಜಲಾನಯನ ಪ್ರದೇಶದಲ್ಲಿ 99.4 ಮಿ.ಮೀ. ಮಳೆಯಾಗಿದ್ದು, ಜಲಾಶಯದ ಒಳಹರಿವು 45,458 ಕ್ಯುಸೆಕ್ ಇದ್ದು, 2,176 ಕ್ಯುಸೆಕ್ ಹೊರಹರಿವು ಇದೆ’ ಎಂದು ಜಲಾಶಯ ವಿಭಾಗದ ಕಾರ್ಯ ನಿರ್ವಾಹಕ ಎಂಜಿನಿಯರ್
ಆರ್. ಶಿವಕುಮಾರ್ ಮಾಹಿತಿ ನೀಡಿದ್ದಾರೆ.