ಹೊಸನಗರ: ಗಬ್ಬೆದ್ದು ನಾರುತ್ತಿದ್ದ ಶೌಚಾಲಯವೀಗ ಸ್ವಚ್ಛ, ಸುಂದರ

ಹೊಸನಗರ: ಗ್ರಾಮದಲ್ಲಿ ಗಬ್ಬೆದ್ದು ನಾರುತ್ತಿದ್ದ ಸಾರ್ವಜನಿಕ ಶೌಚಾಲಯವನ್ನು ನಳನಳಿಸುವಂತೆ ಸುಂದರವಾಗಿ ಮಾರ್ಪಡಿಸಿ ಗಮನ ಸೆಳೆದಿದ್ದಾರೆ ತಾಲ್ಲೂಕಿನ ಗಡಿಭಾಗದ ಮಾಸ್ತಿಕಟ್ಟೆಯ ಯುವಕರು. 

ಮಾಸ್ತಿಕಟ್ಟೆ ಗ್ರಾಮದ ಸಾರ್ವಜನಿಕ ಶೌಚಾಲಯ ಗಬ್ಬೆದ್ದು ನಾರುತ್ತಿತ್ತು. ಗೋಡೆ ಪಾಚಿ ಕಟ್ಟಿ ಭೂತಬಂಗಲೆಯಂತೆ ಕಾಣುತ್ತಿತ್ತು. ಶುಚಿತ್ವವೇ ಇಲ್ಲವಾಗಿ ಮೂಗು ಮುಚ್ಚಿಕೊಂಡು ನಡೆದಾಡಬೇಕಿತ್ತು. ಇಂತಹ ದುರಾವಸ್ಥೆ ತಲುಪಿದ ಶೌಚಾಲಯವನ್ನು ಇಲ್ಲಿನ ಸಮಾನ ಮನಸ್ಕ ಯುವಕರು ಒಗ್ಗೂಡಿ ಮಾದರಿ ಶೌಚಾಲಯವನ್ನಾಗಿ ರೂಪಿಸಿ ಗ್ರಾಮಸ್ಥರಿಂದ ಭೇಷ್ ಎನಿಸಿಕೊಂಡಿದ್ದಾರೆ.

ಉದ್ಯೋಗ ನಿಮಿತ್ತ ದೂರದ ಊರಿನಲ್ಲಿದ್ದ ಯುವಕರು ರಜೆಗೆಂದು ತಮ್ಮ ಊರಿಗೆ ಬಂದಾಗ ಶೌಚಾಲಯ ದುರಾವಸ್ಥೆ ತಲುಪಿರುವುದನ್ನು ನೋಡಿ ಮರುಗಿದ್ದಾರೆ. ಆಗ ಪರಸ್ಪರ ಮಾತನಾಡಿಕೊಂಡು ಸಾಂಘಿಕವಾಗಿ ಒಟ್ಟಾದ ಯುವಕರು ಹಾಳಾದ ಶೌಚಾಲಯನ್ನು ಸಂಪೂರ್ಣ ಸ್ವಚ್ಛಗೊಳಿಸಿದ್ದಾರೆ. ಮಾತ್ರವಲ್ಲ ಬಣ್ಣ ಬಳಿದು ಸುಂದರವಾಗಿ ಮಾರ್ಪಡಿಸಿದ್ದಾರೆ.

ಮಾಸ್ತಿಕಟ್ಟೆ ಸುತ್ತಮುತ್ತಲಿನ ಪ್ರವಾಸಿ ತಾಣ ವೀಕ್ಷಿಸಲು ವರ್ಷಕ್ಕೆ ಲಕ್ಷಕ್ಕೂ ಹೆಚ್ಚು ಪ್ರವಾಸಿಗರು ಬರುತ್ತಾರೆ. ಅವರಿಗೆಲ್ಲಾ ಇಲ್ಲಿರುವ ಒಂದೇ ಒಂದು ಸಾರ್ವಜನಿಕ ಶೌಚಾಲಯ ಬಳಕೆ ಅನಿವಾರ್ಯ. ಆದರೆ, ಶೌಚಾಲಯ ಸ್ಥಿತಿ ಮಾತ್ರ ನೋಡುವಂತಿರಲಿಲ್ಲ. ಇದನ್ನು ನೋಡಿ ಹಿಡಿಶಾಪ ಹಾಕಿ ವಾಪಸ್ಸಾಗುವುದು ಸಾಮಾನ್ಯವಾಗಿತ್ತು. ಅನಿವಾರ್ಯದ ಕಾರಣ ಮಹಿಳೆಯರು, ಮಕ್ಕಳು ಮೂಗು ಮುಚ್ಚಿಕೊಂಡು ಶೌಚಾಲಯ ಉಪಯೋಗಿಸುತ್ತಿದ್ದರು.

ಇದನ್ನು ಮನಗಂಡ ಯುವಕರು ಶೌಚಾಲಯ ಸ್ವಚ್ಛತಾ ಕಾರ್ಯಕ್ಕೆ ಇಳಿದರು. ಇದಕ್ಕೆ ಸ್ಥಳೀಯರ ಸಹಕಾರವೂ ಸಿಕ್ಕಿತು. ಯುವಕರ ಮಾದರಿ ಕಾರ್ಯಕ್ಕೆ ಸ್ಥಳೀಯ ಗ್ರಾಮ ಪಂಚಾಯಿತಿ ಕೂಡ ಸಹಕಾರ ನೀಡಿದೆ. ಸುಣ್ಣಬಣ್ಣದ ವೆಚ್ಚವನ್ನು ಭರಿಸಿದೆ.

ಈ ಮಾದರಿ ಕಾರ್ಯದಲ್ಲಿ ಸಚಿನ್ ಮಾಸ್ತಿಕಟ್ಟೆ, ಪ್ರಿಯಾದ್ ಮಾಸ್ತಿಕಟ್ಟೆ, ಜೈರಾಮ್ ಹುಲಿಕಲ್, ವೆಂಕಟೇಶ್, ಮೋಹನ್ ಚಂದ್ರಗದ್ದೆ, ಮಣಿ ಮಾಸ್ತಿಕಟ್ಟೆ, ಕಿರಣ್ ಗೌಡ್ರು, ಪೂರ್ಣೇಶ್, ಚೇತನ್ ಪಾಜಿಗದ್ದೆ, ಕೃಷ್ಣಾನಂದ ಕಿಣಿ, ಅವಿನಾಶ್, ಅನುಷ್, ಮಂಜು, ಮನೋಜ್, ಪ್ರೀತಮ್ ಮಂಜುನಾಥ್, ಸುನಿಲ್, ಶರತ್, ಪ್ರೇಮ್ ರೈಲ್ವೆ ಭಾಗವಹಿಸಿದ್ದರು.