Womens Day: ಪ್ರೇಮಕ್ಕಳ ಮಾದರಿ ಬದುಕು..

ಹೊಸನಗರ: ಬದುಕಿನಲ್ಲಿ ಎದುರಾದ ಕಷ್ಟ ಕಾರ್ಪಣ್ಯಗಳನ್ನು ಧೈರ್ಯದಿಂದ ಎದುರಿಸಿ ಸ್ವಾಭಿಮಾನಿ ಬದುಕು ಕಟ್ಟಿಕೊಂಡವರು ತಾಲ್ಲೂಕಿನ ನಗರ ಸಮೀಪದ ಕೋಟೆ ಹಿಂದಿನಕೇರಿ ನಿವಾಸಿ ಪ್ರೇಮಕ್ಕ.

ಸಂತೆ, ಜಾತ್ರೆ, ಉತ್ಸವ ಮುಂತಾದೆಡೆ ಹಣ್ಣು, ಶರಬತ್ತು, ಮಂಡಕ್ಕಿ, ತಿಂಡಿ–ತಿನಿಸುಗಳನ್ನು ಮಾರಾಟ ಮಾಡುವುದು ಇವರ ಕಾಯಕ. ಪ್ರೇಮಕ್ಕನಿಗೆ ಈಗ 70ರ ಹರೆಯ. ಈ ಇಳಿ ವಯಸ್ಸಿನಲ್ಲೂ ವ್ಯಾಪಾರ ಮಾತ್ರ ಬಿಟ್ಟಿಲ್ಲ. ಕಡುಬಡತನವಿದ್ದರೂ ವ್ಯಾಪಾರದಿಂದ ಬಂದುದರಲ್ಲೇ ನೆಮ್ಮದಿಯ ಜೀವನ ಸಾಗಿಸುತ್ತಿದ್ದಾರೆ.

ಪ್ರೇಮಕ್ಕ14 ವರ್ಷದವರಾಗಿದ್ದಾಗ ಅವರ ಮನೆ ಬೆಂಕಿಗೆ ಆಹುತಿಯಾಯಿತು. ಅದರೊಂದಿಗೆ ಅವರ ಬದುಕು ಬೀದಿಗೆ ಬಿದ್ದಿತು. ಇದರಿಂದ ಕಂಗೆಡದ ಅವರು ತಂದೆ ಕೃಷ್ಣಪ್ಪರಿಗೆ ಹೆಗಲುಕೊಟ್ಟು ಶ್ರಮಿಸಿದರು. ಇರುವ ಸ್ವಲ್ಪ ಜಮೀನಿನಲ್ಲಿ ಕೃಷಿ ಮಾಡುತ್ತಾ ಸಂಸಾರಕ್ಕಾಗಿ ದುಡಿದರು. ಮದುವೆ ನಂತರದಲ್ಲೂ ವ್ಯಾಪಾರ ಮುಂದುವರಿಸಿಕೊಂಡು ಹೋಗುವ ಮೂಲಕ ಮಕ್ಕಳ ಬದುಕು ರೂಪಿಸಿದ್ದಾರೆ. ಪ್ರೇಮಕ್ಕೆ ಅವರ ಕಾಯಕಕ್ಕೆ ಮಗ ಆಸರೆಯಾಗಿದ್ದಾನೆ.

ನಗರದ ಸುತ್ತಮುತ್ತ ಎಲ್ಲಿಯೇ ಕಾರ್ಯಕ್ರಮಗಳಾದರೂ ಅಲ್ಲಿ ಪ್ರೇಮಕ್ಕ ತಯಾರಿಸುವ ಪಾನಕ ಸಿಗುವುದು ಕಾಯಂ.

‘ವ್ಯಾಪಾರಕ್ಕೆ ಹೋಗುವುದು ಬೇಡ ಎಂದು ಮಕ್ಕಳು ಹೇಳುತ್ತಾರೆ. ಆದರೆ, ಕೆಲಸವಿಲ್ಲದೆ ಕೂರಲು ನನ್ನಿಂದ ಸಾಧ್ಯವಿಲ್ಲ. ವ್ಯಾಪಾರದಿಂದ ತೃಪ್ತಿ ಕಾಣುತ್ತಿದ್ದೇನೆ’ ಎನ್ನುತ್ತಾರೆ ಪ್ರೇಮಕ್ಕ.