ಹುಳಿಯಾರು: 600 ಅಡಕೆ ಮರ ಕಡಿದ ದುಷ್ಕರ್ಮಿಗಳು

ಹುಳಿಯಾರು: ಬರಗೂರು ಗ್ರಾಮದಲ್ಲಿ ಭಾನುವಾರ ರಾತ್ರಿ ಗಣೇಶ್‌ ಎಂಬುವವರಿಗೆ ಸೇರಿದ ಸುಮಾರು 600 ಅಡಕೆ ಮರಗಳನ್ನು ದುಷ್ಕರ್ಮಿಗಳು ಕಡಿದು ನಾಶಗೊಳಿಸಿದ್ದಾರೆ.

ಬರಗೂರು ಗ್ರಾಮ ಪಂಚಾಯಿತಿ ಅಧ್ಯಕ್ಷರಾಗಿರುವ ಗಣೇಶ್‌ ಅವರಿಗೆ ಗ್ರಾಮದ ಮುಖ್ಯ ರಸ್ತೆಯಲ್ಲಿಯೇ ಅಡಿಕೆ ತೋಟವಿತ್ತು. ರಾತ್ರಿ ಸುಮಾರು 200 ಮರಗಳನ್ನು ಕಡಿದು ಉರುಳಿಸಲಾಗಿದೆ. 400 ಮರದ ಮಧ್ಯಕ್ಕೆ ಮಚ್ಚಿನಿಂದ ಕಚ್ಚು ಹಾಕಿದ್ದಾರೆ. ಗಾಳಿಗೆ ಒಂದೊಂದೆ ಉರುಳಿ ಬೀಳುತ್ತಿದ್ದು ದುಷ್ಕರ್ಮಿಗಳ ಕೃತ್ಯಕ್ಕೆ ಗ್ರಾಮ ಹಾಗೂ ಸುತ್ತಮುತ್ತಲಿನ ಜನರು ಬೆಚ್ಚಿ ಬಿದ್ದಿದ್ದಾರೆ.

ಸುಮಾರು 6 ವರ್ಷದ ಮರಗಳಾಗಿದ್ದು ಸಾಕಷ್ಟು ಮರಗಳು ಫಸಲು ಬಿಡುತ್ತಿದ್ದವು. ಸ್ಥಳಕ್ಕೆ ಹಂದನಕೆರೆ ಪೊಲೀಸರು ಭೇಟಿ ನೀಡಿ ಪ್ರಕರಣ ದಾಖಲು ಮಾಡಿಕೊಂಡಿದ್ದಾರೆ.