ಮಧುಗಿರಿ | ಬಡವರಿಗೆ ಇದುವರೆಗೂ ಸಿಗದ ನಿವೇಶ

ಮಧುಗಿರಿ: ತಾಲ್ಲೂಕು ಹಾಗೂ ಪಟ್ಟಣ ಅಭಿವೃದ್ಧಿಗೊಳ್ಳುತ್ತಿದೆ. ಇದರಿಂದ ಭೂಮಿ ಬೆಲೆ ಗಗನಕ್ಕೆ ಹೇರಿದೆ. ಉಳ್ಳವರು ಜಮೀನು ಹಾಗೂ ನಿವೇಶನ ಖರೀದಿ ಮಾಡುತ್ತಿದ್ದಾರೆ. ಆದರೆ, ಬಡವರು ಮಾತ್ರ ಒಂದೇ ಒಂದು ನಿವೇಶನ ಖರೀದಿ ಮಾಡಲು ಹರ ಸಾಹಸಪಡುವಂತಾಗಿದೆ.

ಮರಸಭೆ ವ್ಯಾಪ್ತಿಯಲ್ಲಿ ಬಡವರಿಗಾಗಿ ನಿವೇಶನ ಹಂಚಿಕೆ ಮಾಡಿ 25 ವರ್ಷ ಕಳೆದಿದೆ. ನಿವೇಶನಕ್ಕಾಗಿ ಪುರಸಭೆಗೆ ಅರ್ಜಿ ನೀಡುತ್ತಿದ್ದಾರೆಯೇ ಹೊರತು; ನಿವೇಶನ ಮಾತ್ರ ಇದುವರೆಗೂ ಸಿಕ್ಕಿಲ್ಲ. 

ಪಟ್ಟಣದ ವ್ಯಾಪ್ತಿಯಲ್ಲಿ ಉಚಿತ ನಿವೇಶನ ಹಂಚಿಕೆ ಮಾಡಲು ಪುರಸಭೆ ಸದಸ್ಯರೆಲ್ಲರೂ ಸೇರಿ ತೀರ್ಮಾನ ಮಾಡಬೇಕಿತ್ತು. ಆದರೆ, ಕೆಲ ಸದಸ್ಯರು ಭೂಮಿ ಖರೀದಿ ಮಾಡಿ ಬಡವಾಣೆಗಳನ್ನು ನಿರ್ಮಿಸಿಕೊಂಡು ಸ್ವಂತ ಲಾಭದ ಕಡೆ ಮುಖ ಮಾಡಿದ್ದಾರೆ. ಇದರಿಂದ ಬಡವರಿಗೆ ಉಚಿತ ನಿವೇಶನದ ಕನಸು ನನಸಾಗಿಲ್ಲ ಎಂದು ಸಾರ್ವಜನಿಕರು ಆರೋಪಿಸಿದ್ದಾರೆ.

ಚಿಕ್ಕ ಮನೆಯಲ್ಲಿಯೇ 8 ರಿಂದ 10 ಮಂದಿ ವಾಸ ಮಾಡುವ ಸ್ಥಿತಿ ಇದೆ. ಈ ಸಮಸ್ಯೆಯಿಂದ ಬಡವರು ಸಾಕಷ್ಟು ತೊಂದರೆ ಅನುಭವಿಸುತ್ತಿದ್ದಾರೆ. ಬೇಸಿಗೆ ಸಮಯದಲ್ಲಿ ಮನೆ ಮುಂಭಾಗ ಹಾಗೂ ಮಹಡಿ ಮೇಲೆ ಮಲಗಬೇಕು. ಆದರೆ, ಮಳೆಗಾಲದಲ್ಲಿ ಬಡವರ ಸ್ಥಿತಿ ಶೋಚನೀಯವಾಗಿದೆ ಎಂದು ಸ್ಥಳೀಯ ಲಕ್ಷ್ಮಣಪ್ಪ ದೂರಿದ್ದಾರೆ.

ಬಡವರಿಗೆ ಉಚಿತ ನಿವೇಶನ ಹಂಚಿಕೆ ಮಾಡಿ ಹಲವು ವರ್ಷಗಳೇ ಕಳೆದಿವೆ. ಮನೆ ಹಾಗೂ ನಿವೇಶನ ಇಲ್ಲದೆ ಬಡವರು ಬಾಡಿಗೆ ಮನೆಗಳಿಗೆ ಮೊರೆ ಹೋಗುತ್ತಿದ್ದಾರೆ. ಮನೆ ಮಾಲೀಕ ಹೇಳಿದಷ್ಟು ಬಾಡಿಗೆ ನೀಡಿ ವಾಸಿಸುವ ಸ್ಥಿತಿ ಇದೆ ಎಂದು ದೇವರಾಜ್ ಅಳಲು ತೋಡಿಕೊಂಡರು.