ತುಮಕೂರು: ಇಳಿಕೆಯತ್ತ ಸಾಗಿದ ತರಕಾರಿ

ತುಮಕೂರು: ತರಕಾರಿ ಬೆಲೆ ಇಳಿಕೆಯತ್ತ ಮುಖ ಮಾಡಿದ್ದು, ಸೊಪ್ಪಿನ ದರ ಮತ್ತಷ್ಟು ಕಡಿಮೆಯಾಗಿದೆ. ಹಣ್ಣಿನ ಧಾರಣೆಯಲ್ಲಿ ಹೆಚ್ಚಿನ ವ್ಯತ್ಯಾಸವಾಗಿಲ್ಲ. ಒಣದ್ರಾಕ್ಷಿ ಕೆ.ಜಿ ₹400 ದಾಟಿದೆ.

ಆಷಾಢ ಮಾಸ ಆರಂಭವಾಗಿದ್ದು, ಯಾವುದೇ ಶುಭಕಾರ್ಯಗಳು ನಡೆಯುತ್ತಿಲ್ಲ. ಹಾಗಾಗಿ ಬೇಡಿಕೆ ಕಡಿಮೆಯಾಗಿದ್ದು, ತರಕಾರಿ, ಬೇಳೆ, ಸಕ್ಕರೆ, ಮಾಂಸದ ಬೆಲೆ ಕಡಿಮೆಯಾಗಿದೆ ಎಂದು ಮಾರುಕಟ್ಟೆ ಮೂಲಗಳು ತಿಳಿಸಿವೆ.

ತರಕಾರಿ ಅಗ್ಗ: ದುಬಾರಿಯಾಗಿದ್ದ ಬೀನ್ಸ್, ಗಡ್ಡೆಕೋಸು ಜನರ ಕೈಗೆಟಕುವಂತಾಗಿದೆ. ಕ್ಯಾರೇಟ್ ಕೆ.ಜಿಗೆ ₹10 ಏರಿಕೆಯಾಗಿದ್ದರೆ, ಉಳಿದ ತರಕಾರಿಗಳು ತುಸು ಅಗ್ಗವಾಗಿವೆ. ಆಲೂಗಡ್ಡೆ, ಮೂಲಂಗಿ, ಬೆಂಡೆಕಾಯಿ, ಬದನೆಕಾಯಿ, ಹೂಕೋಸು, ನುಗ್ಗೆಕಾಯಿ ದರ ಕಡಿಮೆಯಾಗಿದೆ. ಈರುಳ್ಳಿ ಅಲ್ಪ ಏರಿಕೆ ದಾಖಲಿಸಿದ್ದರೆ, ಬೆಳ್ಳುಳ್ಳಿ ಯಥಾಸ್ಥಿತಿ ಕಾಯ್ದುಕೊಂಡಿದೆ.

ಸೊಪ್ಪು ಅಗ್ಗ: ಸೊಪ್ಪಿನ ದರ ಮತ್ತೆ ಇಳಿಕೆಯತ್ತಲೇ ಸಾಗಿದ್ದು, ಕೊತ್ತಂಬರಿ ಸೊಪ್ಪು ಕೆ.ಜಿ ₹20–30, ಸಬ್ಬಕ್ಕಿ ಕೆ.ಜಿ ₹20–30, ಮೆಂತ್ಯ ಸೊಪ್ಪು ಕೆ.ಜಿ ₹30–40, ಪಾಲಕ್ ಸೊಪ್ಪು (ಕಟ್ಟು) ₹20ಕ್ಕೆ ಕುಸಿದಿದೆ.

ಹಣ್ಣು: ಹಣ್ಣುಗಳ ಧಾರಣೆಯಲ್ಲಿ ಅಲ್ಪಮಟ್ಟಿಗೆ ಏರಿಳಿತ ಕಂಡುಬಂದಿದೆ. ದಾಳಿಂಬೆ, ಪೈನಾಪಲ್ ತುಸು ಇಳಿದಿದ್ದು, ಕಿತ್ತಳೆ, ಪಪ್ಪಾಯ ದುಬಾರಿಯಾಗಿದೆ. ಏಲಕ್ಕಿ ಬಾಳೆಹಣ್ಣು ದುಬಾರಿ ಸ್ಥಿತಿಯಲ್ಲೇ ಮುಂದುವರಿದಿದೆ.

ಅಡುಗೆ ಎಣ್ಣೆ: ಪಾಮಾಯಿಲ್ ಎಣ್ಣೆ ಕೊಂಚ ಏರಿಕೆಯಾಗಿದ್ದರೆ, ಉಳಿದ ಎಣ್ಣೆ ಯಥಾಸ್ಥಿತಿ ಕಾಯ್ದುಕೊಂಡಿದೆ. ಗೋಲ್ಡ್‌ವಿನ್ನರ್ ಕೆ.ಜಿ ₹145–148, ಪಾಮಾಯಿಲ್ ಕೆ.ಜಿ ₹114–115, ಕಡಲೆಕಾಯಿ ಎಣ್ಣೆ ಕೆ.ಜಿ ₹165–170ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಸಿಗುತ್ತಿದೆ.

ಬೇಳೆ ಇಳಿಕೆ: ಬೇಳೆ ಕಾಳು, ಧಾನ್ಯ ಇಳಿಕೆಯತ್ತ ಮುಖ ಮಾಡಿದೆ. ತೊಗರಿಬೇಳೆ, ಕಡಲೆಬೇಳೆ, ಉದ್ದಿನಬೇಳೆ, ಹೆಸರುಕಾಳು, ಅವರೆಕಾಳು, ಹುರಿಗಡಲೆ ಧಾರಣೆ ಕಡಿಮೆಯಾಗಿದೆ. ಅಲಸಂದೆ ತುಸು ಹೆಚ್ಚಳವಾಗಿದೆ. ಈವರೆಗೆ ಏರಿಕೆಯತ್ತ ಮುಖಮಾಡಿದ್ದ ಸಕ್ಕರೆ, ಬೆಲ್ಲ ಅಲ್ಪ ಇಳಿದಿದೆ.

ದ್ರಾಕ್ಷಿ ದುಬಾರಿ: ಒಣದ್ರಾಕ್ಷಿ, ಏಲಕ್ಕಿ ಧಾರಣೆ ಏರುತ್ತಲೇ ಸಾಗಿದ್ದರೆ, ಗಸಗಸೆ, ಜೀರಿಗೆ ಅಲ್ಪ ಕಡಿಮೆಯಾಗಿದೆ. ಉಳಿದಂತೆ ಯಥಾಸ್ಥಿತಿ ಮುಂದುವರಿದಿದೆ.

ದನಿಯ ಕೆ.ಜಿ ₹110–120, ಬ್ಯಾಡಗಿ ಮೆಣಸಿನಕಾಯಿ ಕೆ.ಜಿ ₹220–240, ಗೌರಿಬಿದನೂರು ಖಾರದ ಮೆಣಸಿನಕಾಯಿ ಕೆ.ಜಿ ₹170–190, ಹುಣಸೆಹಣ್ಣು ₹170–180, ಬೆಲ್ಲ ಕೆ.ಜಿ ₹50–55, ಕಾಳುಮೆಣಸು ಕೆ.ಜಿ ₹750–780, ಜೀರಿಗೆ ಕೆ.ಜಿ ₹250–260, ಚಕ್ಕೆ ಕೆ.ಜಿ ₹250–260, ಲವಂಗ ಕೆ.ಜಿ ₹820–850, ಗುಣಮಟ್ಟದ ಗಸಗಸೆ ಕೆ.ಜಿ ₹1,700–1,800, ಏಲಕ್ಕಿ ಕೆ.ಜಿ ₹3,200–3,300, ಬಾದಾಮಿ ಕೆ.ಜಿ ₹780–800, ಗೋಡಂಬಿ ಕೆ.ಜಿ ₹850–900, ಒಣದ್ರಾಕ್ಷಿ ಕೆ.ಜಿ ₹400–420ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ.

ಕೋಳಿ: ಕೋಳಿ ಮಾಂಸದ ಬೆಲೆಯಲ್ಲಿ ಹೆಚ್ಚಿನ ವ್ಯತ್ಯಾಸವಾಗಿಲ್ಲ. ಬ್ರಾಯ್ಲರ್ ಕೋಳಿ ಕೆ.ಜಿ ₹120, ರೆಡಿ ಚಿಕನ್ ಕೆ.ಜಿ ₹180, ಸ್ಕಿನ್‌ಲೆಸ್ ಕೆ.ಜಿ ₹200, ಮೊಟ್ಟೆಕೋಳಿ (ಫಾರಂ) ಕೆ.ಜಿ ₹130ಕ್ಕೆ ಸಿಗುತ್ತಿದೆ.

ಮೀನು ದುಬಾರಿ: ಬಂಗುಡೆ, ಬೂತಾಯಿ ಮೀನು ದುಬಾರಿಯಾಗಿದ್ದರೆ, ಮತ್ತೆ ಕೆಲವು ಇಳಿಕೆಯತ್ತ ಸಾಗಿವೆ. ಬಂಗುಡೆ ಕೆ.ಜಿ ₹490, ಬೂತಾಯಿ ₹490, ಬೊಳಿಂಜರ್ ₹200, ಅಂಜಲ್ ಕೆ.ಜಿ ₹1,190, ಬಿಳಿಮಾಂಜಿ ಕೆ.ಜಿ 1,440, ಕಪ್ಪುಮಾಂಜಿ ₹1,000, ಇಂಡಿಯನ್ ಸಾಲ್ಮನ್ ₹1,210, ಸೀಗಡಿ ಕೆ.ಜಿ ₹500–720, ಏಡಿ ಕೆ.ಜಿ ₹540ಕ್ಕೆ ನಗರದ ಮತ್ಸ್ಯದರ್ಶಿನಿಯಲ್ಲಿ ಮಾರಾಟವಾಗುತ್ತಿದೆ.